تەننيستەن قازاقستان ۇلتتىق قۇراماسى 6-8 ارالىعىندا حورۆاتيا قۇراماسىنا قارسى كەزدەسۋ وتكىزەدى. دەۆيس كۋبوگىنىڭ شيرەك فينالدىق كەزدەسۋىنىڭ اياسىندا وتەتىن ويىن الدىندا دياس دوسقاراەۆ بىرنەشە ساۋالىمىزعا جاۋاپ بەردى. قازاقستان قۇراماسىنىڭ كاپيتانى دايىندىق جاقسى جۇرگىزىلگەنىن مالىمدەدى.
- دياس مىرزا, اپتا بۇرىن اۋستريا ەلىندە جاتتىعۋدى باستادىڭىزدار. ماتچقا دەگەن پىسىقتاۋلارىڭىز قالاي ءوتتى؟
- ءيا, اۋستريانىڭ ۆەنا قالاسىندا اپتا بۇرىن جاتتىعۋ باستادىق. ەندى مىنە, كەشە عانا حورۆاتيانىڭ ۆاراجدين قالاسىنا كەلىپ وتىرمىز. ماتچ وتەتىن ارەناعا بوي ۇيرەتىپ جاتىرمىز. ال دايىندىقتىڭ وزىنە كەلەر بولساق, وتە ساپالى جاتتىعۋلار وتكىزدىك. جىگىتتەردىڭ بارلىعى جان-جاقتان جينالدى. كوبىسى جارىستاردان كەلىپ وتىر. جالپى, فيزيكالىق جاعدايلارى جامان ەمەس. ەندى تەك ءدال وسى بولاتىن ويىنعا باعىتتالعان ءبىرلى-ەكىلى جۇمىستار جۇرگىزەمىز. سەربيا قۇراماسىنا قارسى ويناعان كەزىمىزدە دە ۆەنا قالاسىنا بارىپ اپتا بۇرىن دايىندىق جۇمىستارىن وتكىزىپ ەدىك. سول كەزدە جاقسى ويىن ورنەگىن كورسەتتىك. ماڭىزدى ويىن الدىندا جاقسىلاپ دايىندالعانىمىز ءجون. ەڭ باستىسى تەننيسشىلەرىمىز جەرگىلىكتى اۋا-رايىنا, ساعات بەلدەۋىنە ۇيرەنىسىپ ۇلگەردى.
- حورۆاتيا قۇراماسى جايلى نە ايتاسىز؟ ولاردا قول قۋسىرىپ وتىرماعان بولار؟
- ارينە, ولاردا تىڭعىلىقتى دايىندالىپ جاتىر. بۇل جۇپتىڭ جەڭىمپازى جارتىلاي فينالعا جولداما الادى. سوندىقتان دا, بۇكىل الەم تاماشالايتىن ويىن وتە ماڭىزدى. حورۆاتيا قۇراماسى ويىنشىلار قۇرامىن وزگەرتتى. باستاپقىدا يۆو كارلوۆيچتى تىركەۋى كەرەك بولعان حورۆاتتار ول ويىنشىدان باس تارتىپ ورنىنا نيكولا نەكتيچتى قوستى. دەگەنمەن, بۇل كوماندانىڭ نەگىزگى ويىنشىسى مارين چيليچ ەكەنى انىق. الەمنىڭ ءۇشىنشى راكەتكاسىنا قارسى ويناۋ ەشكىمگە دە وڭاي سوقپايدى. ودان بولەك بورنا چوريچ دەگەن تەننيسشىسى قازىر وتە جوعارعى دەڭگەيدە ونەر كورسەتىپ ءجۇر. مىسالى, مايامي مەن ينديانا ۋەلستەگى جارىستاردا ول ءوزىنىڭ مىقتى ەكەنىن كورسەتتى. فەدەرەردىڭ ءوزىن ۇتىپ جىبەرە جازدادى. وسىنداي ءىرى ءتۋرنيردىڭ جارىتاي فينالىندا ويناۋ كەرەمەت جەتىستىك. ولاردان بولەك, يۆان دوديگ پەن نيكولا مەكتيچتى دە ۇمىتپاۋىمىز كەرەك. جالپى العاندا, حورۆاتيا قۇرامىنداعى 5 تەننيسشى توپ-50-گە كىرەتىن ويىنشىلار.
- سوندا بۇل كەزدەسۋدىڭ ءفاۆوريتى حورۆاتيا, ال قازاقستانعا كەلەسى كەزەڭگە وتەتىن مۇمكىندىك مۇلدە جوق پا؟
- ويىنعا دەيىن جانە قاعاز جۇزىندە فاۆوريت حورۆاتيا.بۇل تۇجىرىممەن ءبارى كەلىسەدى دەپ ويلايمىن. ونىڭ ۇستىنە ويىن دا حورۆاتيا الاڭىندا وتەدى. ءبىز حارد توسەنىشىندە مىقتى ەدىك. ال ولار بىزگە ىڭعايسىز بولسىن دەپ قۇم توسەنىشىن تاڭداپ وتىر. حورۆات قۇراماسى تەك وسى ويىننىڭ عانا ەمەس, سونىمەن قاتار بۇكىل دەۆيس كۋبوگى جارىسىنىڭ ءفاۆوريتى. بىراق, بۇل جوعارعى دەڭگەيدەگى تارتىس بولعاندىقتان ءبارى دە بولادى. 5 ويىندىق تەكە تىرەستى ءتۇرلى وقيعا ورىن الادى. قازاقستان قۇراماسى وسىعان دەيىن نەبىر اتاقتى قۇرامالاردى جەڭدى. ءبىزدىڭ جىگىتتەردە تاجىريبيە جەتكىلىكتى. سوندىقتان دا, حورۆاتياعا قارسى تەرەزەسى تەڭ ويىن وتكىزە الاتىن دەڭگەيدەمىز.
- اڭگىمەڭىزگە راحمەت!
اڭگىمەلەسكەن ەرمۇحامەد ماۋلەن
حورۆاتيا, ۆاراجدين.