2017 جىلى قازاقستان رەسپۋبليكاسى ءبىلىم بەرۋدى مەن عىلىمدى دامىتۋدىڭ مەملەكەتتىك باعدارلاماسىن ىسكە اسىرۋ قورىتىندىسى تۋرالى قر پرەمەر-ءمينيسترى باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا ءبىلىم جانە عىلىم ءمينيسترى ە. ساعاديەۆ پەن ۇلتتىق ەكونوميكا ءمينيسترى ت. سۇلەيمەنوۆ باياندادى.
ءبىلىم جانە عىلىم ءمينيسترى ە. ساعاديەۆتىڭ ايتۋىنشا, 2017 جىلى 64,4 مىڭ ورىنعا 849 مەكتەپكە دەيىنگى مەكەمە اشىلدى, ونىڭ 717-ءسى جەكەمەنشىك مەكتەپكە دەيىنگى ۇيىمدار. 3-6 جاس ارالىعىنداعى بالالاردىڭ بالاباقشاعا كەزەكتىلىگى وتكەن جىلمەن سالىستىرعاندا 25,3%-عا ازايىپ, بۇگىندە 125,2 مىڭ ادامدى قۇرادى. 2017 جىلى ەلىمىزدەگى بالاباقشالاردىڭ ورتا ەسەپپەن 15%-ءى ينكليۋزيۆتى ءبىلىم بەرۋگە جاعداي جاساعان.
ورتا ءبىلىم بەرۋ سالاسىندا جاڭارتىلعان ءبىلىم مازمۇنىنا كوشۋ جالعاسۋدا. 2017–2018 وقۋ جىلىندا 1, 2, 5, 7 سىنىپتار جاڭا جۇيەگە كوشىرىلدى. 5 كۇندىك وقۋ اپتاسى ەنگىزىلدى. 2019 جىلدان باستاپ 10–11 سىنىپتاردا جاراتىلىستانۋ باعىتىنىڭ «فيزيكا», «حيميا», «بيولوگيا», «ينفورماتيكا» 4 ءپانىن اعىلشىن تىلىندە وقىتۋعا دايارلىق جۇرگىزىلۋدە.
تجكب سالاسىندا ونىڭ ساپاسىن, قولجەتىمدىلىگىن جانە تارتىمدىلىعىن ارتتىرۋدىڭ جاڭا تاسىلدەرى ازىرلەندى. 2017 جىلعى 1 قىركۇيەكتەن باستاپ 260 بىلىكتىلىك بويىنشا جاڭا مودۋلدىك باعدارلامالار ەنگىزىلە باستادى, وندا ماماندىقتىڭ 3 بىلىكتىلىگىن يگەرۋ قاراستىرىلعان.
مەملەكەت باسشىسىنىڭ تاپسىرماسى بويىنشا 2017 جىلدان باستاپ 583 كوللەدجدە «بارشاعا ارنالعان تەگىن تجكب» جوباسى ىسكە اسىرىلۋدا. 100,8 مىڭ ادامعا مەملەكەتتىك تاپسىرىس بەرىلگەن, ونىڭ ىشىندە 21 مىڭى — ءونىمدى جۇمىسپەن قامتۋ باعدارلاماسى بويىنشا.
جوعارى ءبىلىم بەرۋ سالاسىندا جوو-لاردىڭ اكادەميالىق جانە باسقارۋشىلىق دەربەستىگىن كەڭەيتۋ ءۇشىن ءتيىستى زاڭ جوباسى ازىرلەنىپ, قر پارلامەنتى ماجىلىسىنە ەنگىزىلگەن. QS WUR الەمنىڭ ۇزدىك ۋنيۆەرسيتەتتەرىنىڭ رەيتىنگىسىنە 2017 جىلى قازاقستاندىق 8 جوو كىردى.
«عىلىم سالاسىندا عىلىم مەن ەكونوميكانىڭ شىنايى سەكتورىنىڭ ءوزارا بايلانىسىن كۇشەيتۋ جانە عىلىمي قىزمەت ناتيجەلەرىن كوممەرتسيالاندىرۋ بويىنشا جۇمىستار جۇرگىزىلىپ جاتىر. حالىقارالىق عىلىمي-تەحنيكالىق ورتالىقتىڭ گرانتتىق قارجىلاندىرۋى اياسىندا 12 جوبا ىسكە اسىرىلدى», — دەدى ە. ساعاديەۆ.
مەملەكەتتىك باعدارلامانى ورىنداۋ مونيتورينگىنىڭ ناتيجەلەرى تۋرالى ۇلتتىق ەكونوميكا ءمينيسترى ت. سۇلەيمەنوۆ باياندادى.
قر ۇەم دەرەكتەرىنە سايكەس, 2017 جىلى قازاقستان رەسپۋبليكاسىندا ءبىلىم بەرۋ جانە عىلىمدى دامىتۋدىڭ 2016–2019 جىلدارعا ارنالعان مەملەكەتتىك باعدارلاماسىنىڭ 8 ماقساتتى ينديكاتورىنىڭ 7-ءى ورىندالدى, مەمباعدارلامانىڭ 51 كورسەتكىشىنەن – 45-ءى ورىندالدى. 2017 جىلى جوسپارلانعان 166 شارانىڭ 161-ءى ىسكە اسىرىلدى.
سونىمەن قاتار, ءبىلىم بەرۋ سالاسىنا سالىنعان ينۆەستيتسيالار 23%-كە وسكەن. ينۆەستيتسيالاردىڭ جالپى كولەمى 265 ملرد تەڭگەنى قۇرادى. مۇنداي وسىمگە ءمجا جوبالارىن بەلسەندى تۇردە ىسكە اسىرۋ ىقپال ەتتى. 2017 جىلى ءبىلىم بەرۋ سالاسىندا جالپى سومماسى 31,2 ملرد تەڭگە كولەمىندە 101 جوباعا كەلىسىم جاسالدى. ال 2015–2016 جىلدارى اتالعان باعىت بويىنشا 4,3 ملرد تەڭگە سومماسىنا 8 كەلىسىم جاسالعان بولاتىن.
وتىرىس بارىسىندا جامبىل وبلىسىنىڭ اكىمى ا. مىرزاحمەتوۆتىڭ, اقتوبە وبلىسىنىڭ اكىمى ب. ساپارباەۆتىڭ, باتىس قازاقستان وبلىسىنىڭ اكىمى ا. كولگىنوۆتىڭ باياندامالارى تىڭدالدى.
ماسەلەنى قاراۋ قورىتىندىسى بويىنشا قر پرەمەر-ءمينيسترى باقىتجان ساعىنتاەۆ بۇگىندە جولداۋدى جانە پرەزيدەنتتىڭ بەس الەۋمەتتىك باستاماسىن ىسكە اسىرۋعا بايلانىستى ءبىلىم بەرۋ جۇيەسىنە وتە ماڭىزدى مىندەتتەر جۇكتەلگەنىن اتاپ ءوتتى.
وسىعان وراي ءبىلىم جانە عىلىم مينيسترلىگىنە مەملەكەتتىك باعدارلامانى جانداندىرۋ بويىنشا جۇمىستاردى جەدەلدەتۋ جانە جوعارى ءبىلىم بەرۋدىڭ قولجەتىمدىلىگى مەن ساپاسىن ارتتىرۋ جانە ستۋدەنت جاستاردىڭ جاتاقحاناداعى جاعدايلارىن جاقسارتۋ بويىنشا بەس الەۋمەتتىك باستامانى ىسكە اسىرۋ جونىندەگى ەلباسى تاپسىرمالارىنىڭ ورىندالۋىن قامتاماسىز ەتۋ تاپسىرىلدى.
قر پرەمەر-ءمينيسترى باقىتجان ساعىنتاەۆ بەلگىلەنگەن ستاندارتتارعا سايكەس مەملەكەتتىك باعدارلاما ينديكاتورلارىنىڭ ورىندالۋىن قاتاڭ قاداعالاۋدى تاپسىردى.