قىزىلوردا وبلىسىنىڭ بالىق وسىرۋشىلەرى مەن بالىق شارۋاشىلىعى قۇرىلىمدارى بىرلەسىپ «سىر سۋى مارجانى» زاڭدى تۇلعالار قاۋىمداستىعىن قۇردى.
وبلىستىق كاسىپكەرلەر پالاتاسىنىڭ ءباسپاسوز قىزمەتى تاراتقان اقپاراتتا قاۋىمداستىقتىڭ نەگىزگى ماقساتى - قاۋىمداستىق مۇشەلەرىنىڭ مۇددەسىن تانىتۋ جانە قورعاۋ ەكەندىگى ايتىلادى.
- وسى ۋاقىتقا دەيىن بالىق شارۋاشىلىعىمەن اينالىساتىن كاسىپكەرلەر ماسەلەلەرىن ارقايسىسى ءوز بەتىنشە شەشىپ كەلدى. سەبەبى, باستارىن بىرىكتىرەتىن ارنايى ۇيىم بولمادى. سول سەبەپتى بۇل ازاماتتاردىڭ پروبلەمالارىن شەشۋدە قيىندىقتار بولدى. قۇرىلعان قاۋىمداستىق الداعى ۋاقىتتا اتالمىش سالاداعى جۇيەلى ماسەلەلەردى جەدەل ءارى ساپالى شەشۋگە مۇمكىندىك بەرەدى دەگەن سەنىمدەمىز, - دەدى وبلىستىق كاسىپكەرلەر پالاتاسىنىڭ ساراپشىسى الما ءپىرمانوۆا.
وبلىستىق كاسىپكەرلەر پالاتاسى بالىق شارۋاشىلىعىنا بايلانىستى ءتۇرلى ءىس-شارالار ۇيىمداستىرىپ كەلەدى. بيىل اقپان-ناۋرىز ايلارىندا بىرنەشە رەت «بالىق شارۋاشىلىعىن دامىتۋدىڭ پروبلەمالارى مەن مۇمكىندىكتەرى» تاقىرىبىندا تەوريالىق سەمينار-ترەنينگتەر وتكىزدى. سەمينار-ترەنينگتە بالىق شارۋاشىلىعى نىساندارىنىڭ تۇرلەرىمەن تانىستىرۋ, كولدىك-تاۋارلى بالىق شارۋاشىلىعىنىڭ ەرەكشەلىكتەرى, بالىق ءوسىرۋ, تاماقتاندىرۋ, كۇتىم جاساۋ جولدارى جانە وبلىستا وسى سالانى دامىتۋ مۇمكىنشىلىكتەرىنە قاتىستى ماسەلەلەر تالقىلاندى.
باقتيار تايجان, «ەگەمەن قازاقستان»