ءبىلىم مەن عىلىمنىڭ ىرگەلى ورداسىنىڭ اجارىن اشقان ايشىقتى كۇن. قازاق مەملەكەتتىك قىزدار پەداگوگيكالىق ۋنيۆەرسيتەتىندە ء«از-ناۋرىز – جاڭارۋ مەن جاڭعىرۋدىڭ باستاۋى» اتتى مەرەكەلىك ءىس-شارا ءوتتى, دەپ حابارلايدى وقۋ ورنىنىڭ ءباسپاسوز ورتالىعى.
استانانىڭ 20-جىلدىعىنا ورايلاستىرىلعان سالتاناتتى جيىن اياسىندا وقۋ ورنىنىڭ «اق شاتىر» جازعى الاڭىنا جينالعان كوپشىلىك نازارىنا ۋنيۆەرسيتەتتىڭ ونەر ۇجىمدارى مەن جەكەلەي ورىنداۋشىلارى دايىنداعان كونتسەرتتىك باعدارلاما ۇسىنىلدى. سونىمەن قاتار, مۋزىكالىق-حورەوگرافيالىق ەتنو-مودەرن قويىلىمىنا قازاقستاننىڭ بەلگىلى ونەر تارلاندارى مەن ساحنا ونەرىنىڭ جاس تالانتتارى دا قاتىستى.
ولاردىڭ قاتارىندا ساكەن مايعازيەۆ, سەكەن تۇرىسبەك, گۇلنار سيقىمباەۆا, ۇلبوسىن بەلعوزيەۆا, كوركەم سەيسەنبەك, ساندۋعاش ستامعازيەۆا, گۇلشات تاكەجانوۆا, ايگۇل قوسانوۆا سىندى مادەنيەت مايتالماندارى بار. سونداي-اق, قازاق حالقىنىڭ ۇلتتىق سالت-داستۇرلەرىنەن سىر شەرتەتىن مۋزىكامەن ارلەنگەن تەاترلاندىرىلعان كورىنىس تە مەرەكە اجارىن ايشىقتاي ءتۇستى.
ساحنا شىمىلدىعى «ۇلار» فولكلورلى-ەتنوگرافيالىق ءانسامبلىنىڭ ورىنداۋىنداعى «ناۋرىز» انىمەن اشىلدى. قىزدار ۋنيۆەرسيتەتىنىڭ رەكتورى گاۋحار الدامبەرگەنوۆا جۇرتشىلىقتى ۇلتىمىزدىڭ ۇلىق مەرەكەسىمەن قۇتتىقتاپ, بۇل مەيرام ۇرپاقتار ساباقتاستىعىنىڭ جəنە حالقىمىزدىڭ تەرەڭنەن تامىر تارتاتىن سالت-ءدəستۇرى مەن مəدەنيەتىنىڭ سيمۆولىنا اينالعانىن ايتتى.
– ايبىنى اسقاق استانانىڭ 20 جىلدىق مەرەيتويىنا وراي كوزىقاراقتى كوپشىلىك قاۋىم «ۇستازدار ۇستاحاناسى» دەپ ات قويىپ, ايدار تاققان قازاق مەملەكەتتىك قىزدار پەداگوگيكالىق ۋنيۆەرسيتەتىندە ۇيىمداستىرىلىپ وتىرعان ء«از-ناۋرىز – جاڭارۋ مەن جاڭعىرۋدىڭ باستاۋى» اتتى مەرەكەلىك جيىنعا قوش كەلدىڭىزدەر! ناۋرىزدى ۇلىقتاۋ – حالقىمىزدىڭ سالتى مەن ءداستۇرىن جاڭعىرتۋ دەپ بىلەمىز. بۇل – قازاقستان رەسپۋبليكاسىنىڭ پرەزيدەنتى – ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنداعى ۇلتتىق كودتى ساقتاۋمەن استاسىپ جاتقان دۇنيە. ويتكەنى, ۇلتتىق كود – رۋحاني بولمىستىڭ وزەگى.
ءبىز بۇگىن ەگەمەندىكتىڭ ەكىنشى مۇشەلىنە اياق باستىق. بۇل ايشىقتى كەزەڭ ەلىمىزدىڭ وزىندىك دارا جول تاڭداپ, بەرىك بەرەكەنىڭ بەلەسىنە بەتتەگەنىن دالەلدەپ بەردى. ءاربىر ازاماتىن باۋىر ەتى بالاسىنداي باۋىرىنا باسقان وتانىمىزدىڭ گۇلدەنۋىنە جول اشتى. حالقىمىزدىڭ اتىن الەمگە ايگىلەپ, مارتەبەسىن ءوسىردى. بارشاڭىزدى ۇلىستىڭ ۇلى كۇنى – ناۋرىز مەيرامىمەن شىن جۇرەكتەن قۇتتىقتاي وتىرىپ, جاقسىلىقتىڭ جارشىسى, جاڭا جىلدىڭ باستاۋى شاڭىراقتارىڭىزعا شاتتىق پەن نەسىبە اكەلسىن! دەندەرىڭىزگە ساۋلىق, وتباسىلارىڭىزعا باق پەن بەرەكە تىلەيمىن, – دەدى گاۋحار تورەمۇراتقىزى.
سونداي-اق, مەرەكەلىك شاراعا ارنايى قوناق رەتىندە قاتىسقان مەملەكەت جانە قوعام قايراتكەرى ءشامشا بەركىمباەۆا, Almaty Management University رەكتورى گۇلميرا قورعانباەۆا, م. اۋەزوۆ اتىنداعى قازاق مەملەكەتتىك دراما تەاترىنىڭ ديرەكتورى اسحات ماەميروۆ, جامبىل اتىنداعى قازاق مەملەكەتتىك فيلارمونياسىنىڭ ديرەكتورى دالەل ءۋاش قىزدار ۋنيۆەرسيتەتىنىڭ ۇجىمىن ناۋرىز مەيرامىمەن قۇتتىقتادى.
«مەملەكەت بولاشاعىنىڭ كىلتى – قازىرگى جاڭا تەحنولوگيالاردى جەتە مەڭگەرگەن, سونىمەن قاتار ءتۇپ-تامىرىنان اجىراماعان, سالتى مەن ءداستۇرىن, تاريحىن بىلەتىن ءبىلىمدى دە بىلىكتى ازاماتتاردىڭ قولىندا. وسى ورايدا ۇلىستىڭ ۇلى كۇنى – ناعىز سالت-ءداستۇرىمىزدى دارىپتەيتىن, ۇلتتىق ناقىشىمىزدى ناسيحاتتايتىن ورەلى دە, ونەگەسى مول مەيرام. جىل باسى قۇتتى بولسىن,» – دەستى ءسوز العاندار.
مەرەكەلىك ءىس-شارانىڭ ەكىنشى بولىمىندە ۋنيۆەرسيتەت الاڭىندا جالعاسىن تاپتى. مۇندا اقشاڭقان كيىز ۇيلەر تىگىلىپ, فاكۋلتەتتەر ءتۇبى ءبىر تۇركى حالىقتارىنىڭ اس ءمازىرىن دايىنداپ, ونەرلەرىن كورسەتىپ, ءوزارا سايىسقا ءتۇستى. اتاپ ايتقاندا, فيزيكا-ماتەماتيكا فاكۋلتەتى قىرعىز, الەۋمەتتىك-گۋمانيتارلىق فاكۋلتەتى ءازىربايجان, جاراتىلىستانۋ فاكۋلتەتى تۇرىك, ونەر جانە مادەنيەت فاكۋلتەتى ۇيعىر, پەداگوگيكا-پسيحولوگيا فاكۋلتەتى تۇركىمەن, قازاق فيلولوگياسى جانە الەم تىلدەرى فاكۋلتەتى تاتار, شارۋاشىلىق باسقارماسى قازاق جانە ۋنيۆەرسيتەت اكىمشىلىگى وزبەك ۇلتتارىنىڭ بەينەسىندە حالىقتاردىڭ وزىندىك بەدەرىن سومدادى. ءبىر بۇل عانا ەمەس. مۇندا دەكوراتيۆتى-قولدانبالى شىعارماشىلىق كورمە جəنە ۇلتتىق سپورت سايىستارى دا ۇيىمداستىرىلدى.
قىزدار ۋنيۆەرسيتەتىندەگى ۇلىستىڭ ۇلى كۇنىن تويلاۋعا الماتى قالاسىنداعى ەڭبەكتەگەن بالادان ەڭكەيگەن قارتقا دەيىن كەلدى. مەرەكەلىك شارادا ستۋدەنتتەر مەن قوناقتارعا ناۋرىزكوجە جانە باسقا دا ۇلتتىق تاعامدار تاراتىلدى. كيىز ءۇي ۇلگىسىندە ارنايى دايىندالعان ساحنادا حالىقارالىق جانە رەسپۋبليكالىق ونەر بايقاۋلارىنىڭ لاۋرەاتى «توميريس» بي ءانسامبلى, «مۋزارت Life», «ايگۇل», «ۆوكس اكاپەللا», «ارۋ» توپتارى, «قىزدار» كۆارتەتى جانە كوڭىلدى تاپقىرلار كومانداسىنىڭ قاتىسۋىمەن وتكەن گالا-كونتسەرت كوپشىلىكتىڭ ىستىق ىقىلاسىنا بولەندى.
وسىلايشا ناۋرىز مەيرامى تاعىلىم مەن تاربيەنىڭ قاراشاڭىراعى قىزدار ۋنيۆەرسيتەتىندە ءوزىنىڭ ءسان-سالتاناتىمەن جانە ەرەكشە تارتىمدىلىعىمەن كوپشىلىكتى ءتانتى ەتتى.