قازاقستان مەن موڭعوليا ۇكىمەتارالىق كوميسسياسىنىڭ جەتىنشى وتىرىسى ءوتتى

اتالمىش ءىس-شاراعا ەلىمىزدىڭ تاراپىنان تەڭ توراعا ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆا مەن موڭعوليا تاراپىنان تەڭ توراعا وسى ەلدىڭ ەڭبەك جانە حالىقتى الەۋمەتتىك قورعاۋ ءمينيسترى سودنامين چينزوريگ, سونىمەن بىرگە قوس ەلدىڭ ورتالىق مەملەكەتتىك ورگاندارىنىڭ وكىلدەرى قاتىستى.

ۇكىمەتارالىق كوميسسيا وتىرىسىندا ساۋدا, ەكونوميكا, ينۆەستيتسيا, كاسىپكەرلىك, جەر قويناۋىن پايدالانۋ, اۋىل شارۋاشىلىعى, قورشاعان ورتانى قورعاۋ, مادەنيەت, ءبىلىم بەرۋ جانە عىلىم, دەنساۋلىق ساقتاۋ, قۇقىقتىق بازانى دامىتۋ, حالىقتى الەۋمەتتىك قامسىز­داندىرۋ سياقتى سالالارداعى ىنتىماقتاستىقتى نىعايتۋ جولدارى تالقىلاندى.

جالپى, قازاقستان مەن موڭعوليا تاريحي تاجىريبەگە باي, مادەني ءارى گۋمانيتارلىق بايلانىستارى ورنىققان, سون­داي-اق سالت-ءداستۇرى جاعىنان دا ۇقساستىقتارى كوپ ەلدەر. بۇدان بولەك, قازاقستان مەن موڭعوليا اراسىندا سەنىم مەن ءوزارا ورتاق مۇددەلى قاعيدالار جاعىنان دا تۇراقتى ءارى سىندارلى قارىم-قاتىناستار ورناعان.

 كەزدەسۋدى ەلىمىزدىڭ ەڭبەك جانە حالىقتى الەۋمەتتىك قورعاۋ ءمينيسترى م.ابىلقاسىموۆا اشىپ, موڭعوليا قازاقستانمەن ديپلو­ماتيالىق قارىم-قاتى­ناس ورناتقان العاشقى مەملەكەت­تەر­دىڭ ءبىرى ەكەنىن ەرەكشە اتاپ ءوتتى. 

ء«بىز موڭعوليا تاراپىنان بولعان زەينەتاقىمەن قام­سىزداندىرۋ سالاسىنداعى ەكى­جاقتى ىنتىماقتاستىقتى جالعاس­تىرۋدى جانە وسى جوبا بويىنشا باستالعان ءتيىستى ۇكىمەتارالىق كەلىسىمدى دايىنداۋ ۇدەرىسىن بيىل ىسكە اسىرۋدى قولدايمىز», دەدى م.ابىلقاسىموۆا.

كەلەلى كەزدەسۋدەگى ماڭىزدى ماسەلەلەردىڭ ءبىرى مونعوليا مەن ەۋرازيالىق ەكونوميكالىق وداق اراسىنداعى ىنتىماقتاس­ت­ىق شەڭبەرىندە ەكى ەل ارا­سىن­داعى ساۋدا-ەكونوميكا­لىق ىن­تى­ماقتاستىقتى دامىتۋ جانە كەڭەيتۋ بولدى.

تاراپتار ءوزارا جەتكىزىلىم­دەر قۇرىلىمى سالىستىرمالى تۇردە شەكتەۋلى ەكەندىگىن جانە بۇل ولاردىڭ ءوندىرىسى مەن ەكس­پورتتىق الەۋەتىن كور­سەت­پەيتىنىن اتاپ ءوتتى. بۇل رەتتە ەكى ەل وكىلدەرى كەزدەسۋدە اتال­عان ولقىلىقتىڭ ورنىن تول­تى­رۋعا قاجەتتى شارالاردىڭ بىر­نەشەۋىن قابىلدادى. ەكى ەل تاۋار اينالىمىن ودان ءارى دا­مىتۋ ماقساتىندا الەۋەتتى ەكس­پورت­تىق تاۋارلار تىزىمىمەن الماستى.

كەزدەسۋ قورىتىندىسىندا ساۋدا-ەكونوميكالىق, عىلىمي-تەحنيكالىق جانە مادەنيەت سالاسىنداعى ارىپتەستىك بويىنشا قازاقستان-موڭعوليا ۇكىمەتارالىق كوميسسياسىنىڭ حاتتاماسىنا قول قويىلدى. سونداي-اق ماڭىزدى كەزدەسۋ بارىسىندا ۇكىمەتارالىق كوميس­سيانىڭ كەلەسى, ياعني سەگىزىنشى وتىرىسى 2020 جىلى موڭعوليا استاناسى ۇلان-باتور قالاسىندا وتەتىنى ءمالىم بولدى.

ميراس اسان, «ەگەمەن قازاقستان»