وبلىس ورتالىعىندا ۇلتتىق ناقىش ورنەكتەرىمەن ەرەكشەلەنەتىن مۋلتيبرەندتىك «قازونەر» ورتالىعى اشىلدى. ساۋدا ورنىنىڭ اشىلۋىنا ءانشى روزا القوجا قاتىستى. ەلىمىزدىڭ 100 برەندى قاتارىنان ورىن العان «مەن سىيعا تارتقان ورامال» ساۋدا بەلگىسىنىڭ بۇيىمدارى «حالىق ماركاسى» تۇتىنۋ بەلگىسىنە دە يە.
ءيا, قازاق «ورامال تون بولمايدى, جول بولادى» دەپ ىرىمدايدى. ءانشى روزا القوجا قالىپتاستىرعان برەند – «مەن سىيعا تارتقان ورامالدىڭ» ويۋمەن ورنەكتەلگەن ورامالدارىن, «مادەني مۇرا» ورتالىعى جاساعان بىلعارى قول سومكەلەر مەن ءاميانداردى, «كەربەز» فيرماسىنىڭ ساعاتتارىن, «مەرحات» زەرگەرلىك شەبەرحاناسىنىڭ كۇمىس سىرعا-ساقينالارىن ەندى ءبىر جەردەن – «قازونەردەن» ساتىپ الۋعا بولادى.
– قازىر ورامالدارعا سۇرانىس تا از ەمەس. سولتۇستىك وڭىرلەردە ورامال تاعاتىن قىز-كەلىنشەكتەردىڭ كوبەيىپ كەلە جاتقانى قۋانتادى. انالارىمىزدىڭ باسىنان اق جاۋلىق تۇسپەگەن عوي. العاش رەت «مەن سىيعا تارتقان ورامال» دۇكەنى الماتىدا اشىلدى. قازاقتىڭ دا برەندتىك بۇيىمى بولسىن دەپ, «القوجا» دەگەن اتپەن ورامالدار شىعارۋدى قولعا الدىق. ەندى مىنە, پاۆلوداردا 20-شى دۇكەن ەسىك اشىپ وتىر. بۇل ورامالدار ۇلتتىق ناقىشتا ورنەكتەلگەن. قىتايدان, كورەيادان جەتكىزىلگەن ماتالار ءوزىمىزدىڭ تسەحتا بويالادى, شەتى كومكەرىلەدى, مونشاقتار تاعىلادى. ءبىز تىگەتىن ءارتۇرلى ءتۇستى ورامالدار ايەلدەرگە, قىز-كەلىنشەكتەر, اپالارعا ۇنايدى دەپ ويلايمىز, – دەيدى ءانشى.
جەرگىلىكتى جاس كاسىپكەر اسەت سەيىتاحمەتتىڭ ايتۋىنشا, ۇلتتىق ناقىشتاعى بۇيىمدارعا قازىر سۇرانىس جوعارى. ەندىگى ماقسات – قازىر زاماناۋي ۇلگىدە كيىنسەك تە ۇلتتىق بولمىسىمىزدى ايقىندايتىن كيىمدەردى, بۇيىمداردى قولجەتىمدى ەتۋ. سوندىقتان ءانشى روزا القوجاعا جاسالعان ۇلتتىق بۇيىمداردى ءبىر جەرگە بىرىكتىرۋ تۋرالى ۇسىنىس قولداۋ تاپتى.
– روزا قىزىمىزعا وتە ريزامىز. ورىندايتىن اندەرى دە سونداي اسەرلى, ءار جۇرەكتەن ورىن الادى. كەرەكۋ وڭىرىنە كوكتەم, كۇز ايلارىندا كەلىپ, بىزگە جاقسى اندەر سىيلايدى. ءوزىم دە, ءانسامبلدىڭ مۇشەلەرى دە ەندى ىلعي دا «مەن سىيعا تارتقان ورامالدىڭ» بۇيىمدارىن, كۇمىستەرىن ساتىپ الماقپىز, – دەيدى وبلىس ورتالىعىنداعى «ساعىم جىلدار» اجەلەر ءانسامبلىنىڭ جەتەكشىسى باقىتجامال اپا. – ءبىز قازاق ايەلدەرى قوناققا بارا قالساق تا, تۋعان كۇن, مەرەكەلەرگە سىي-سياپاتقا ورامال ساتىپ الامىز. كەلىن بولىپ تۇسكەن كەزدە باسىنا ورامال جاۋىپ, اۋلەتتىڭ اماناتى تاپسىرىلادى. ورامال تاعۋ – ايەلگە پارىز. سوندىقتان ورامالدى قاستەرلەي بىلەيىك.
فاريدا بىقاي, «ەگەمەن قازاقستان»
پاۆلودار
سۋرەتتى تۇسىرگەن دارحان ومىرزاق