فرانتسيانىڭ وڭتۇستىگىندەگى ود دەپارتامەنتىندە بولعان شابۋىلدان 4 ادام قايتىس بولدى, مارقۇمداردىڭ قاتارىندا پوليتسيا وفيتسەرى دە بار. ودان بولەك 16 ادام جاراقاتتانعان.
فرانتسيا ءىىم مالىمەتىنشە, سۋپەرماركەتكە كەلۋشىلەردى تۇتقىنعا العان شابۋىلشى ارنايى اسكەر قولىنان قازا تاپتى. ونىڭ ەسىمى – رەدۋان لاكديم, 26 جاستاعى ماروككونىڭ تۋماسى. ەسىرتكى, ۇساق زاڭ بۇزۋشىلىقتارمەن بۇرىن دا كوزگە تۇسكەنىن, الايدا راديكالدىق كوزقاراستارىمەن ايگىلەنبەگەنىن ايتادى. كۋاگەرلەردىڭ سوزىنشە, لاكديم «يسلام مەملەكەتى» ۇيىمىنىڭ اسكەرى ەكەنىن ايتقان ءارى پاريجدەگى 2015 جىلعى قاراشادا بولعان اۋقىمدى تەرراكت كەزىندە باستى كۇدىكتى رەتىندە تۇتقىندالعان سالاح ابدەسلامدى تۇرمەدەن بوساتۋدى تالاپ ەتكەن.
«ەلىمىز يسلام تەررورلىق شابۋىلىنا ۇشىرادى», - دەپ مالىمدەدى فرانتسيا پرەزيدەنتى ەممانۋەل ماكرون. سونىمەن بىرگە اتىستا قازا تاپقان پوليتسيا وفيتسەرى بەلترامنىڭ ءولىمىن «ناعىز قاھارماندىق» دەپ اتادى. ارنو بەلترام قىزمەت ەتكەن ود دەپارتامەنتى الدىندا كوڭىل ايتىپ كەلۋشىلەردىڭ قاتارى تولاستار ەمەس.