وقو-دا قازاقستانداعى وزبەكستان جىلىنا وراي حالىقارالىق ۆەلوشەرۋ ءوتتى

قازاقستان جەرىندە جۇرەك جالعاپ العان قاتىسۋشىلار, الداعى 100 كم قاشىقتىقتى ءجۇرىپ ءوتۋدى ماقسات ەتتى. اتالعان ۆەلوشەرۋگە قاتىسۋعا قازاقستان جانە وزبەكستان ازاماتتارى ءوتىنىش بىلدىرگەن. قازاقستاننان الماتى, استانا, تاراز جانە شىمكەنت قالالارىنىڭ تۇرعىندارى قاتىستى. قاتىسۋشىلار اراسىندا ەڭ ۇلكەنىنىڭ جاسى – 60 جاستا بولسا, ەڭ كىشكەنتايى- 11 جاستا. ايتا  كەتەيىك, قاتىسۋشىلاردىڭ بارلىعى كاسىپقوي ۆەلوسيپەدشىلەر ەمەس. ولاردىڭ بارلىعىنا ارنايى جاعداي جاسالىپ, ءاربىر 25 شاقىرىم سايىن جۇرەك جالعايتىن تاعامدار ۇيىمداستىرىلعان شاتىرلار ورنالاستىرىلعان بولاتىن.

ۆەلوشەرۋگە قاتىسۋشىلار 130 شاقىرىمدى  باسىپ ءوتىپ, كەشكى 18:00-دە شىمكەنت قالاسىنىڭ ورتالىعىنا كەلىپ جەتتى. ولاردى كۇتىپ العان وڭتۇستىكقازاقستاندىقتار زور قوشەمەتپەن قارسى الدى.

سونداي-اق, وبلىس باسشىسى «قازاق پەن وزبەك – ءتۇبى ءبىر تۋىسقان حالىقتار. ەكى ەلدىڭ اراسىنداعى تاريحي قارىم-قاتىناس بۇرىنعى جىبەك-جولى كەزەڭىنەن بايلىنىس تاۋىپ, باۋىرلاستىق پەن دوستىققا نەگىزدەلىپ كەلەدى. ەكى ەلدىڭ مادەنيەتى مەن سالت-ءداستۇرى, ءدىنى, ءتىلى ۇقساس. قازاقستان مەن وزبەكستان بۇل بايلانىستى تاۋەلسىزدىك جىلدارى ساقتاپ قانا قويماي, نىعايتىپ, جاڭا دەڭگەيگە كوتەرۋدە. وزبەكستان پرەزيدەنتىنىڭ قازاقستانعا جۇمىس ساپارى اياسىندا ەلباسىمىز نۇرسۇلتان ءابىش ۇلى نازارباەۆ شاۆكات ميرزيوەۆپەن كەزدەستى. كەزدەسۋدە وزبەك كوشباسشىسىنىڭ بيىلعى ناۋرىز ايىنداعى مەملەكەتتىك ساپارى بارىسىندا ەكى ەل اراسىندا قول جەتكىزىلگەن ۋاعدالاستىقتاردىڭ ىسكە اسىرىلۋ ماسەلەلەرى تالقىلاندى. كەزدەسۋ ناتيجەسىندە 2018 جىلى قازاقستان رەسپۋبليكاسىنداعى وزبەكستان جىلى بولىپ جاريالانۋىنا بايلانىستى, ەكى ەلدىڭ دوستاستىعىن ارتتىرۋ ءۇشىن بۇگىن حالىقارالىق ۆەلوشەرۋى ۇيىمداستىرىلىپ,  ءوز مارەسىنە جەتىپ وتىر. 130 شاقىرىمدى قۇرايتىن بۇگىنگى بۇقارالىق سپورتتىق ءىس-شاراعا قاتىسۋشىلار قالا تۇرعىندارىنا ۇلگى بولىپ, جاستارىمىزدىڭ سپورتقا دەگەن قىزىعۋشىلىعىنىڭ ارتاتىنىنا سەنىمدىمىن» ,- دەدى مەجەگە جەتكەن ۆەلوشەرۋشىلەردى كۇتىپ العان وبلىس اكىمى جانسەيىت تۇيمەباەۆ.

سونداي-اق شارا بارىسىندا بىرقاتار قاتىسۋشىلاردى  ديپلوممەن ماراپاتتادى.

حالىقارالىق ۆەلوشەرۋگە قازاقستان ۆەلوسپورت فەدەراتسياسىنىڭ ۆيتسە-پرەزيدەنتى رايىمبەك باتتالوۆ باستاعان قوناقتار دا قاتىستى.