وڭتۇستىك قازاقستان وبلىسىنىڭ اكىمى ج.تۇيمەباەۆ «ناۋرىز قازىعۇرتتان باستالادى» مەرەكەسىندە وڭىردەگى زيالى قاۋىم وكىلدەرى جانە ارداگەرلەردىڭ باسىن قوسىپ ارنايى جيىن وتكىزدى. ونداعى ماقسات – ەل ىشىندەگى ءتۇرلى وقيعالاردىڭ سەبەپ سالدارىن تالقىلاپ, ولقىلىقتاردى بولدىرماۋدىڭ جولدارىن اقىلداسۋ.
باسقوسۋعا وبلىس اكىمىنىڭ ورىنباسارلارى, باسقارما باسشىلارى, زيالى قاۋىم وكىلدەرى, وبلىستىق, قالالىق جانە اۋداندىق ارداگەرلەر كەڭەسىنىڭ توراعالارى قاتىستى.
جيىنعا توراعالىق ەتكەن ءوڭىر باسشىسى وتكەن جىلدىڭ قورىتىندىسى بويىنشا وبلىسىمىزدىڭ قىلمىس سانىن حالىق سانىنا شاققاندا 0,3 پايىزبەن رەسپۋبليكادا ەڭ سوڭعى 16 - ورىندا ەكەنىن ايتىپ, ەندى تاعى دا تومەندەتۋگە جۇمىس ىستەۋ كەرەكتىگىن جەتكىزدى.
«بۇكىل قازاقستاننىڭ حالقى 18 ميلليون بولسا, وسىنشا حالىق كەيبىر دامىعان مەملەكەتتەردىڭ ءبىر عانا قالاسىندا ءومىر سۇرەدى. ولار مادەنيەتتى ءتاپ-ءتاۋىر, تاتۋ-ءتاتتى عۇمىر كەشىپ جاتىر. ال, ءبىز كەيدە ۇلانعايىر اتىراپقا سىيماي جاتامىز. ولاي بولمايدى. ىنتىماقپەن, باۋىرمالدىقپەن, تاتۋلىقپەن عۇمىر كەشۋىمىز كەرەك. سوندا عانا وركەندەگەن ەلدەردى قۋىپ جەتەمىز. بىزدە دە ءبىر ەل, ءبىر باسشى بار. ەندەشە ەلدە ءبىر جاعادان باس, ءبىر جەڭنەن قول شىعارىپ, بىرلەسە وتىرىپ مەملەكەتتىك باعدارلامالاردى ورىنداۋ جولىندا ايانباي ەڭبەك ەتەيىك», – دەدى جانسەيىت قانسەيىت ۇلى.
وبلىس اكىمىنىڭ ءسوزىن قۋاتتاعان زيالىلار قازىرگى تاڭدا, جالپى قوعامىمىزدا بالا تاربيەسىنە دەگەن جاۋاپكەرشىلىكتىڭ السىرەپ بارا جاتقانىن جاسىرمادى. ەل اعالارى ىنتىماق پەن بەرەكە بولماعان جەرگە قۇت قونبايتىنىن ايتتى.
«كۇندەلىكتى كۇيبىڭ تىرشىلىكپەن ارپالىسىپ ءجۇرىپ قازىرگى اتا انالاردىڭ بالا تاربيەسىنە نەمقۇرايلى قاراۋ سالدارىنان وسىنداي جاعىمسىز جاعدايلار ورىن الىپ, كورشى تۇرىپ, ءبىر-بىرىمەن سوتتاسىپ جاتقاندار دا بار. مىنە, بۇل ماسەلەلەردە ءاربىر اۋىلداعى ارداگەر اعالار, اۋىل بيلەرى مەن زيالى قاۋىم وكىلدەرىنىڭ اتقاراتىن جۇمىسى وراسان بولماق. ىستەپ تە ءجۇر, بىراق ءالى دە جەتكىلىكسىز. سىزدەر ءوز اۋىلدارىڭىزدا وسىنداي جاعدايلاردى بولدىرماۋ ماقساتىندا بىرىگىپ, جاستارعا اقىل ايتىپ, توقتاۋ سالىپ وتىرساڭىزدار», – دەدى وبلىستىق ارداگەرلەر كەڭەسىنىڭ توراعاسى جەڭىسبەك ماۋلەنقۇلوۆ.
جيىن سوڭىندا ايماق باسشىسى «زورلىق-زومبىلىقسىز – وڭتۇستىك» اكتسياسىن باستاۋدى ءجون سانايتىنىن ايتتى. وسى اكتسيا اياسىندا بارشا اۋدان, قالا اكىمدىكتەرىنە زورلىق-زومبىلىقتىڭ, قىلمىس پەن قۇقىقبۇزۋشىلىقتىڭ الدىن الۋ بويىنشە كەشەندى جۇمىستاردى ۇيىمداستىرۋدى تاپسىردى. اعا بۋىن, زيالى قاۋىم وكىلدەرىن دە وسى باستاماعا قولداۋ كورسەتىپ, بەلسەندى جۇمىس ىستەۋگە شاقىردى.
عالىمجان ەلشىباي,
«ەگەمەن قازاقستان»
وڭتۇستىك قازاقستان وبلىسى