ەلباسى «بولاشاققا باعدار: رۋحاني جاڭعىرۋ» ماقالاسىندا: «لاتىن الىپبيىنە كوشۋدىڭ تەرەڭ لوگيكاسى بار. بۇل قازىرگى زامانعى تەحنولوگيالىق ورتانىڭ, كوممۋنيكاتسيانىڭ, سونداي-اق XXI عاسىرداعى عىلىمي جانە ءبىلىم بەرۋ پروتسەسىنىڭ ەرەكشەلىكتەرىنە بايلانىستى», دەپ ءوز كوزقاراسىن ايقىن بىلدىرگەن بولاتىن. جاقىندا عانا «قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى» پرەزيدەنتتىڭ جارلىعى دا قولدانىسقا ەنگىزىلدى. ءبىز جازۋىمىزدى جاڭعىرتۋ ارقىلى انا ءتىلىمىز بەن قوعامدىق سانامىزدى جاڭعىرتۋعا زور مۇمكىندىك الدىق.
ءالىپبيىمىزدى لاتىن قارپىنە كوشىرۋ ەلىمىزبەن حالقىمىزدىڭ بولاشاعى ءۇشىن قولعا الىنىپ وتىرعانىن جانە بۇكىل الەممەن بىرلەسە تۇسۋىمىزگە, اعىلشىن ءتىلى مەن ينتەرنەت ءتىلىن جەتىك يگەرۋىمىزگە, ەڭ باستىسى – قازاق ءتىلىن جاڭعىرتۋعا جاعداي تۋعىزاتىنىن بارشا قازاقستاندىقتار جاقسى تۇسىنەدى دەپ ويلايمىز.
جۋىردا عانا ەلباسى ەندى پارلامەنت تە, ۇكىمەت تە ءوز جۇمىستارىن مەملەكەتتىك تىلدە جۇرگىزۋ جونىندە ورىندى نۇسقاۋ بەردى. بۇل ءبىزدىڭ قوعامنىڭ كوپتەن بەرى كۇتىپ جۇرگەن ءزارۋلى ءبىر ماسەلەسى بولاتىن. ەلباسىنىڭ وسى تاپسىرماسى قازاقستاننىڭ بارلىق وبلىستىق اكىمدىكتەرىنەن باستاپ, مەنشىك يەسىنە قاراماستان بۇكىل مەكەمەلەردە جۇزەگە اسىرىلا باستاعانى دا ءجون بولار ەدى.
قازىر قوعامدى تاعى دا ءبىر ماسەلە الاڭداتىپ وتىر. لاتىن ءالىپبيى قولدانىسقا ەنگىزىلەدى دەگەن اڭگىمەدەن سوڭ, اسىرەسە, ءالى كۇنگە دەيىن ءوز انا تىلدەرىن جەتىك بىلمەيتىندەردىڭ قاۋىپتەرى كۇشەيىپ, بولاشاعىنا الاڭداپ, بالالارىن ورىس ءتىلدى مەكتەپتەرگە بەرەتىنى جونىندە ايتا باستادى. ويتكەنى ەرتەڭگى كۇنى بالالارىن لاتىن قارپىندە وقىتىپ, ءبىلىم بەرۋگە ۇركە قاراپ وتىر.
لاتىن قارپىن تەك قازاق ءتىلدى مەكتەپتەردە عانا قولداناتىن بولساق, كۇنى ەرتەڭ اتا-انالاردىڭ بالالارىن وزدەرى بىلەتىن تىلدەگى, ياعني كيريلل گرافيكاسىمەن ورىس تىلىندە وقىتاتىن مەكتەپتەرگە بەرەرى دە قازىردەن بەلگىلى بولۋدا. ءتۇپتىڭ-تۇبىندە بۇل قوعامدى ءبىرى لاتىن ءالىپبيىن مەڭگەرگەن, ال ەكىنشىسى لاتىن قارپىن بىلمەيتىن, تەك كيريلل گرافيكاسىمەن عانا جۇمىس ىستەي الاتىن توپتارعا ءبولىپ جىبەرمەي مە دەگەن الاڭ بار. سايىپ كەلگەندە بۇل تۇتاس قازاق ۇلتىن تىلدىك نەگىزدە بولشەكتەۋگە اكەلىپ سوعاتىنداي سەزىلەدى. وسى الاڭداۋشىلىق تۋرالى ساۋالدى مەن ۇكىمەت باسشىسى باقىتجان ساعىنتاەۆتىڭ اتىنا جولدادىم.
قالىپتاسىپ وتىرعان وسى ءبىر جاعدايعا بايلانىستى جانە ەلباسىنىڭ ءبىرتۇتاس ۇلت قالىپتاستىرۋ جونىندەگى يدەياسىنا وراي لاتىن ءالىپبيىن قازاقستاندى مەكەندەپ وتىرعان بارلىق ۇلت وكىلدەرى ءبىلۋى كەرەك دەپ سانايمىز. بۇل ماڭىزدى ماسەلەنى ەلىمىزدەگى بارلىق دياسپورالارعا ۇعىندىرۋ ءۇشىن وسى باستان ءتۇسىندىرۋ جۇمىستارى جۇرگىزىلۋى قاجەت. ويتكەنى بولاشاقتا لاتىن الىپبيىمەن جۇمىس ىستەيتىن ءتىل – مەملەكەتتىك ءتىل! ال, مەملەكەتتىك ءتىل بارلىق قازاقستاندىقتارعا ورتاق ءتىل.
وسىعان وراي, جالپى قازاقستانداعى مەكتەپكە دەيىنگى ءبىلىم بەرۋ مەكەمەلەرىندە, بۇكىل بالاباقشالاردا ەندىگى ارادا وقۋ-تاربيە جۇمىستارىنىڭ ءبارى دە تەك لاتىن الىپبيىنە نەگىزدەلگەن مەملەكەتتىك تىلدە جۇرگىزىلۋىن ويلاستىرۋدى جانە بالاباقشالاردا لاتىن ءالىپبيىن قازىردەن باستاپ وقىتىپ, ۇيرەتۋدى قاجەت دەپ سانايمىز. ۇكىمەتتىڭ وسى ماسەلەگە قاتىستى كەشەندى ءىس-شارا اتقارۋىن سۇرايمىز
مۇرات باقتيار ۇلى,
سەنات دەپۋتاتى