2019 جىلى قاراعاندى وبلىسىندا جوعارعى قىسىمدى «سارىارقا» ماگيسترالدى گاز قۇبىرىنىڭ قۇرىلىسى باستالادى. ايماعىمىزدىڭ 120 ەلدى مەكەنى مەن التى ءىرى قالاسىن تابيعي گازبەن قامتۋ جوسپارلانۋدا.
قاراعاندى وبلىسى اكىمىنىڭ ورىنباسارى اناتولي شكارۋپانىڭ ايتۋىنشا, ناۋرىز ايىنىڭ باسىندا پرەزيدەنتتىڭ تاپسىرماسىنا قاتىستى جاڭا جۇمىس توبى ۇيىمداستىرىلدى. ونىڭ قۇرامىنا قاراعاندى ءوبلىسىنىى وكىلدەرى دە ەندى, سەبەبى «سارىارقا» گاز قۇبىرىنىڭ نەگىزگى بولىگى, اتاپ ايتساق, 820 شاقىرىمى ءبىزدىڭ ايماق تەرريتورياسى ارقىلى وتەدى. بۇگىنگى تاڭدا بەلسەندى فازادا جەر ۋچاسكەلەرىن گاز قۇبىرىنىڭ جۇيەلىك بولىگىنە بۇرۋ جانە جەر ءۇستى قۇرىلىمدار استىنا جىبەرۋ بويىنشا جۇمىستار ءجۇرىپ جاتىر,- دەدى اناتولي شكارۋپا.
قاراعاندى وبلىسىنىڭ اۋماعىندا ءۇش اۆتوماتتاندىرىلعان گاز تاراتۋ ستانساسىن قۇرۋ كوزدەلۋدە, ولار ۇيلەر مەن كاسىپورىندارعا گاز تاراتۋ كەزىندە گاز قىسىمىن ازايتۋ ءۇشىن قاجەت. ولار جەزقازعان, تەمىرتاۋ جانە قاراعاندىدا پايدا بولادى.
ەنەرگەتيكا مينيسترلىگى مەن قازترانسگاز مالىمەتتەرى بويىنشا, بۇل نىساندارعا قاتىستى مەرزىم 2020-شى جىلدىڭ ورتاسى دەپ جوسپارلانىپ وتىر. سول كەزدە ءبىز ءوزىمىزدىڭ گاز تاراتۋ جۇيەلەرىمىزدى ماگيسترالدى گاز قۇبىرىنا قوسا الامىز. 2019-شى جىلى ءبىز گاز تاراتۋ جۇيەلەرىنىڭ قۇرىلىسىن باستاۋىمىز كەرەك.
اناتولي شكارۋپانىڭ سوزىنشە, ارى قاراي وبلىستىڭ ەلدى مەكەندەرىن ماگيسترالدى گاز قۇبىرىنا قوسۋ قارجىلىق مۇمكىندىكتەرگە قاتىستى بولماق. - بارلىعىن بىردەن قوسۋ مۇمكىن ەمەس. ءبىزدىڭ جوبارا ءۇش گاز تاراتۋ جۇيەلەرى بار, ولارعا ەڭ جاقىن ورنالاسقان ەلدى مەكەندەر ءبىرىنشى بولىپ قوسىلادى,- دەپ ءتۇسىندىردى اناتولي شكارۋپا.
گاز جەكە ۇيلەر مەن كوپقاباتتى تۇرعىن ۇيلەرگە بەرىلەدى دەپ جوسپارلانۋدا. سونىمەن قاتار گاز قۇبىرىنىڭ قۇرىلىسى ايماقتارداعى ەكولوگيالىق جاعدايدى تۇزەتەدى دەگەن ءۇمىت بار. گازداندىرۋ اتموسفەراعا تارالاتىن زياندى زاتتار مولشەرىن ازايتۋعا كومەكتەسەدى, جانەدە جانار ماي رەتىندە ارزان تابيعي گازدى قولدانۋ ارقىلى كاسىپكەرلەرگەدە ءوز پايداسىن تيگىزەدى.
استانانى, قازاقستاننىڭ ورتالىق جانە سولتۇستىك ايماقتارىن گازبەن قامتيتىن «سارىارقا» ماگيسترالدى گاز قۇبىرىن قۇرۋ ءتورت كەزەڭ بويىنشا جۇرگىزىلمەك.ءبىرىنشى كەزەڭدە ۇزىندىعى 1081 شاقىرىمدى قۇرايتىن قىزىلوردا-جەزقازعان-قاراعاندى-استانا باعىتى بويىنشا ماگيسترالدى گاز قۇبىرىنىڭ قۇرىلىسى جوسپارلانعان. ەكىنشى كەزەڭدە استانا مەن كوكشەتاۋ ارالىعىندا, ءۇشىنشى كەزەڭدە پەتروپاۆلوۆسكقا دەيىن گاز قۇبىرىن سالۋ كوزدەلگەن. سوڭعى ءتورتىنشى كەزەڭدە «جەزقازعان» جانە «تەمىرتاۋ» كومپرەسسورلىق ستانسالارىن قۇرۋ قاراستىرىلعان.