بۇل تۋرالى اتىراۋ قالاسىنىڭ اكىمى سەرىك شاپكەنوۆ "BI Group" كومپانيالار توبىنىڭ "زامان" تۇرعىن ءۇي كەشەنى قۇرىلىسىنىڭ تانىستىرىلىمىندا ايتتى, دەپ حابارلايدى اتىراۋ وبلىستىق وڭىرلىك كوممۋنيكاتسيالار قىزمەتى.
شاھار باسشىسى جەرگىلىكتى اتقارۋشى بيلىك بيزنەس جۇرگىزۋدى ءتيىمدى ەتۋ ارقىلى اتىراۋدا ايماقتىڭ ينۆەستيتسيالىق تارتىمدىلىعىلىعىن ارتتىرۋعا بارلىق جاعداي جاساپ وتىرعانىن ايتتى.
– مەملەكەت باسشىسىنىڭ تاپسىرماسىنا سايكەس وبلىس باسشىلىعى جەرگىلىكتى اتقارۋشى ورگاندار الدىنا ينۆەستيتسيا تارتۋ, كاسىپكەرلىك سۋبەكتىلەرىن كوبەيتۋگە قاتىستى ناقتى مىندەتتەر قويىپ وتىر, – دەدى سەرىك شاپكەنوۆ. – وسى باعىتتا قول جەتكىزگەن تابىستارىمىز دا بار, جىل ساناپ كوپتەگەن ءىرى كومپانيالار اتىراۋعا قىزىعۋشىلىق تانىتىپ كەلەدى, ولار ايماقتىڭ ينۆەستيتسيالىق تارتىمدىلىعىن باسا ايتادى.
شاپكەنوۆتىڭ ايتۋىنشا, 2017 جىلى اتىراۋ قالاسىندا 20 كوپ قاباتتى تۇرعىن ءۇي, 1020 پاتەر سالىنعان. 2018 جىلى وسى كورسەتكىشتى 38 ءۇي, 3678 پاتەرگە جەتكىزۋ جوسپارلانىپ وتىر.
– جەكە سالۋشىلاردىڭ ۇيلەرىنە ايرىقشا كوڭىل بولىنەدى, ولار سالعان پاتەرلەر "نۇرلى جەر", "7-20-25" يپوتەكالىق نەسيەلەۋ باعدارلاماسى بويىنشا بەرىلەدى, دەدى قالا اكىمى. – سالۋشىلار قاتارىندا BI Group كومپانيالار توبى دا بار, استانا, الماتى قالالارىنان كەيىن اتىراۋدا فيليال اشىپ, قۇرىلىسپەن اينالىسۋدا. كومپانيا تەمىر-بەتون بۇيىمدارى زاۋىتىن سالىپ, ايماقتىڭ الەۋمەتتىك-ەكونوميكالىق دامۋىنا وڭ ىقپال ەتپەك.