كەشە شايبالى حوككەيدەن جولداستىق كەزدەسۋ اياسىندا «بارىس» مۇز سارايىندا استانا قالاسى اكىمدىگى №10 حوككەي مەكتەبىنىڭ شاكىرتتەرى اقكول قالاسى بالالار ءۇيىنىڭ تاربيەلەنۋشىلەرىن قابىلدادى, دەپ حابارلايدى قالالىق اكىمدىكتىڭ ءباسپاسوز قىزمەتى.
«رۋحاني جاڭعىرۋ» باعدارلاماسى اياسىندا وتكەن حوككەي ماتچىندا 2005 جىلى تۋىلعان ەر بالالار باق سىناستى. ءبىر ساعاتقا سوزىلعان ويىن 5:6 ەسەبىمەن اياقتالدى. جەڭىس قوناقتاردىڭ ەنشىسىندە.
قازىرگى كەزدە استانادا حوككەي سەكتسياسى بالالار اراسىندا كەڭىنەن تانىمال. شايبالى حوككەيدەن №10 بالالار-جاسوسپىرىمدەر سپورت مەكتەبىندە 5 جاستان اسقان بالالار, قازاقستاندىق حوككەي ليگاسىنىڭ جاستارى مەن جاسوسپىرىمدەر ليگاسىنىڭ (جحل) كوماندالارى تاربيەلەنەدى. مەكتەپ تۇلەكتەرىنىڭ وتاندىق كلۋبتارعا مۇشە بولۋ مۇمكىندىگى بار.