نۇرسۇلتان نازارباەۆ سيريا ماسەلەسى جونىندەگى استانا پروتسەسىنە كەپىل ەلدەردىڭ سىرتقى ىستەر مينيسترلەرىمەن كەزدەستى, دەپ حابارلايدى اقوردانىڭ ءباسپاسوز قىزمەتى.
كەزدەسۋگە رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆ, تۇركيا رەسپۋبليكاسىنىڭ سىرتقى ىستەر ءمينيسترى مەۆليۋت چاۆۋشوعلى, يران يسلام رەسپۋبليكاسىنىڭ سىرتقى ىستەر ءمينيسترى موحامماد دجاۆاد زاريف قاتىستى.
اڭگىمەلەسۋ بارىسىندا تاراپتار استانا الاڭى فورماتىندا سيرياداعى قاقتىعىستى توقتاتۋ جونىندەگى كەلىسسوزدەردىڭ ناتيجەلەرى مەن پەرسپەكتيۆالارىن تالقىلادى.
مەملەكەت باسشىسى استانا پروتسەسى ارقىلى وق اتپاۋ جونىندە بىرقاتار ۋاعدالاستىققا قول جەتكىزىلگەنىن اتاپ ءوتتى.
– سيريا داعدارىسى ءبىز ءۇشىن دە, ءوڭىرىمىز ءۇشىن دە وزەكتى بولىپ وتىر. ۇرىس قيمىلدارى سالدارىنان 400 مىڭ ادام, سونىڭ ىشىندە بالالار, ايەلدەر مەن قارتتار قازا تاپتى. بۇل قاقتىعىس بۇكىل وڭىردە قولايسىز احۋال تۋعىزدى. دەگەنمەن, استانا پروتسەسى سيرياداعى سوعىس پەن قانتوگىستى تەزىرەك توقتاتۋعا دەگەن ءۇمىتتى ۇيالاتتى. استانا كەلىسسوزدەرى جەنەۆا پروتسەسىن جانداندىردى, – دەدى قازاقستان پرەزيدەنتى.
نۇرسۇلتان نازارباەۆ وڭىردە بىتىمگەرشىلىك ورناتۋ جونىندەگى بۇۇ قاۋىپسىزدىك كەڭەسىنىڭ قارارىن قازاقستاننىڭ قولداعانىن ايتتى.
رەسەي سىرتقى ىستەر ءمينيسترى سەرگەي لاۆروۆ استانادا كەلىسسوز الاڭىن ۇسىنعانى ءۇشىن قازاقستان پرەزيدەنتىنە العىس ايتىپ, سيرياداعى قاقتىعىستى شەشۋ جولدارىن ىزدەستىرۋدىڭ ماڭىزدىلىعىن اتاپ ءوتتى.
– شىعىس گۋتادا سوڭعى ەكى كۇندە 20 مىڭعا جۋىق بەيبىت تۇرعىن وسى اۋماقتان شىعۋعا مۇمكىندىك الدى. ءبىز قازىر بىرىككەن ۇلتتار ۇيىمىمەن بىرلەسىپ, ولاردى ۋاقىتشا قونىستانعان جەرىنەن ءوز ۇيلەرىنە ورالعانعا دەيىن قاجەتتى زاتتارمەن قامتاماسىز ەتۋ ماسەلەسىن شەشىپ جاتىرمىز, – دەدى رەسەي سىرتقى ىستەر ءمينيسترى.
س.لاۆروۆ استانا كەلىسسوزدەرى سيرياداعى قاقتىعىستى رەتتەۋ جولدارىن ىزدەستىرۋگە سەپتىگىن تيگىزگەنىن اتاپ ءوتتى.
– استانا بارشا جۇرت مويىنداعان پروتسەسكە باستاماشىلىق ەتتى. ەڭ باستىسى, استاناداعى كەلىسسوزدەر سيريا قاقتىعىسى اياسىندا بارلىق باعىتتاعى كۇش-جىگەردى جۇمىلدىرا ءبىلدى. بۇل دەگەنىمىز – تەرروريزمگە قارسى كۇرەس جۇرگىزۋ, دەەسكالاتسيا ايماقتارىن قۇرۋ. ۇرىس قيمىلدارىن توقتاتۋ رەجىمى زورلىق-زومبىلىق دەڭگەيىن ايتارلىقتاي تومەندەتۋگە مۇمكىندىك بەردى. سونداي-اق, بۇل گۋمانيتارلىق ماسەلەلەردى تيىمدىرەك شەشۋ دەگەن ءسوز, – دەدى رەسەي سىرتقى ىستەر ءمينيسترى.
سەرگەي لاۆروۆ كەلىسسوزدەردىڭ جوعارى دەڭگەيدە ۇيىمداستىرىلعانىنا توقتالىپ, استانا الاڭىنىڭ قولايلى ساياسي احۋال قالىپتاستىرۋ ىسىندەگى ماڭىزدىلىعىن ايتتى.
– جانجالداسۋشى تاراپتاردى بىتىستىرۋگە باعىتتالعان استانانىڭ بەرىك ۇستانىمى جانە كەلىسىمگە كەلۋ جولدارىن تابۋدى كوزدەيتىن قازاقستاننىڭ سىرتقى ساياساتى بىزگە ءتيىمدى جۇمىس ىستەۋگە سەپتىگىن تيگىزۋدە, – دەدى رەسەيدىڭ سىرتقى ىستەر ءمينيسترى.
تۇركيانىڭ سىرتقى ساياسات ۆەدومستۆوسىنىڭ باسشىسى م.چاۆۋشوعلى استانا پروتسەسىنىڭ تيىمدىلىگىنە توقتالىپ, كەلىسسوز جۇرگىزۋدىڭ وسى فورماتىن قولدايتىنىن اتاپ ءوتتى.
– استاناداعى كەلىسسوزدەردىڭ باستالعانىنا دا ءبىر جىلدان استى. ءبىز وسى پروتسەسس بارىسىندا ۇلكەن جەتىستىكتەرگە جەتىپ, العا جىلجي الدىق. كەشە استانادا سەنىم شارالارى جونىندەگى جۇمىس توبى ءبىرىنشى رەت كەزدەسۋ وتكىزدى. وندا كەپىلگە الىنعاندار مەن تۇتقىنداردى ءوزارا الماسۋ ماسەلەسى قاراستىرىلدى. استانا الاڭىنا ءتان وسىنداي قارقىندى ساقتاپ قالعىمىز كەلەدى. ءبىز بۇل پروتسەستى ىلگەرىلەتۋگە تىڭ سەرپىن بەرە الدىق, – دەدى تۇركيانىڭ سىرتقى ىستەر ءمينيسترى.
سونىمەن قاتار م.چاۆۋشوعلى سيرياداعى قاقتىعىستىڭ ساياسي شەشىمىن ىزدەۋ قاجەتتىگىن ايتتى.
يراننىڭ سىرتقى ىستەر ءمينيسترى موحامماد دجاۆاد زاريف شىعىس گۋتاداعى پروبلەمالاردىڭ بار ەكەنىنە قاراماستان, تاراپتار سيرياداعى قاقتىعىس پەن زورلىق-زومبىلىق دەڭگەيىن تومەندەتكەنىن اتاپ ءوتتى.
– شىعىس گۋتادا جاعدايدىڭ ۋشىققانىنا قاراماستان, كەيبىر گۋمانيتارلىق ماسەلەلەردى شەشە وتىرىپ, احۋالدى ءبىرشاما جۇمسارتتىق. سيرياداعى بەيبىت تۇرعىندار قورعاۋعا الىندى. ءبىز كەشە تاراپتار اراسىندا سەنىم شارالارىن نىعايتۋ جونىندەگى جۇمىستاردى باستادىق, – دەدى يراننىڭ سىرتقى ىستەر ءمينيسترى.
موحامماد دجاۆاد زاريف سيرياداعى داعدارىستى رەتتەۋدىڭ ساياسي جولدارى مەن ۇستانىمدارىن قالىپتاستىرۋ ىسىندە استانا الاڭىنىڭ ماڭىزى ەرەكشە ەكەنىن اتاپ ءوتتى.