ەلىمىزدە «جاڭعىرۋ جولى» اتتى جاستاردىڭ ەرىكتى قوزعالىسى قۇرىلدى

كونفەرەنتسياداعى العىسوزىندە گ.ابدىقالىقوۆا نۇرسۇلتان نازارباەۆتىڭ «پرەزيدەنتتىڭ بەس الەۋمەتتىك باستاماسى» اتتى حالىققا ۇندەۋىندەگى «مەن وركەندەگەن قازاقستان – ەڭ الدىمەن مەملەكەتى ءوزىن قورعاپ, قولدايتىنىن, قامقورلىق جاسايتىنىن سەزىنەتىن, تيىسىنشە ەلىن جان جۇرەگىمەن سۇيەتىن, وزدەرىنە سەنىمدى ادامدار دەپ سانايمىن» دەگەن ەلباسى ءسوزىن مىسالعا كەلتىرە وتىرىپ, قازاقستاندىقتاردىڭ اۋقىمدى الەۋمەتتىك جاڭعىرۋعا قادام باسقانىن اتاپ ءوتتى.

«وسىناۋ وزەكتى پرەزيدەنتتىك باستامالار ۇلتتىڭ باقۋاتتىلىعىنىڭ نەگىزى بولىپ تابىلاتىن الەۋمەتتىك بىرلىكتى نىعايتۋعا باعىتتالىپ وتىر. جوبا ەڭ الدىمەن جاستارعا ارنالۋىنىڭ ءوزى كەزدەيسوقتىق ەمەس. ويتكەنى جاستار كەلەشەكتە ەلدىڭ دامۋىنىڭ ناقتى قادامدارىن انىقتايدى. سوندىقتان «جاڭعىرۋ جولى» قوزعالىسىنىڭ قۇرىلۋى قازاقستاننىڭ جاستاردى قولداۋىنىڭ كورىنىسى. قوزعالىستىڭ نەگىزگى مىندەتى بەلسەندى جاستاردىڭ باسىن بىرىكتىرە وتىرىپ, «رۋحاني جاڭعىرۋ» باعدارلاماسىنداعى تاپسىرمالاردى ىسكە اسىرۋعا ۇلەس قوسۋى ءتيىس», دەدى مەملەكەتتىك حاتشى.

– «جاڭعىرۋ جولى» جاستار قوزعالىسىنىڭ قۇرىلعان كۇنى ناۋرىز مەرەكەسىمەن تۇسپا-تۇس كەلۋىنىڭ سيمۆوليكالىق ءمانى زور. جاستارمەن بىرىگىپ جۇمىس ىستەۋگە قازاقستان حالقى اسسامبلەياسى باسا ءمان بەرىپ كەلەدى. جاستار قوزعالىسىنىڭ مۇنداي فورماتى قوعامدىق سانانى جاڭعىرتۋ مىندەتىن ىسكە اسىرۋدىڭ دالمە-ءدال بەينەسى. جاڭعىرۋ جولى – جاستار جولى, – دەگەن  ل.پروكوپەنكو قوزعالىستىڭ نەگىزگى ماقساتتارى مەن مىندەتتەرى جونىندە كەڭىنەن اڭگىمەلەپ بەردى. ءوز سوزىندە ول, مەملەكەت باسشىسىنىڭ باتىل قادامى جاستاردىڭ دامۋى ءۇشىن الەۋمەتتىك, ەكونوميكالىق ليفت بولىپ وتىرعانىن اتاپ ءوتتى. اسسامبلەيانىڭ جاستار قوزعالىسى وسىنداي باستامالارعا قولداۋ كورسەتۋدە سەنىمدى ارىپتەس بولماق.

قاتىسۋشىلار الدىندا سويلەگەن سوزىندە نۇرلان ەرمەكباەۆ جاستاردىڭ وزەكتى ماسەلەلەرىنە توقتالىپ ءوتىپ, ونىڭ ىشىندە جاستارعا ۇنەمى وزدەرىنىڭ قابىلەتتەرىن دامىتىپ, جاڭا ءبىلىم كوزدەرىن مەڭگەرۋگە, سونداي-اق  ءوزىن-ءوزى جەتىلدىرۋگە كەڭەس بەردى. 

«تەك جان-جاقتى دامىعان, ءبىلىمدى, ەركىن ويلاي الاتىن جاستاردىڭ ارقاسىندا عانا ءبىزدىڭ ەلىمىز دامۋدىڭ داڭعىل جولىنا شىعادى. سوندىقتان قازىرگى زاماناۋي ۇردىستەردى ەسكەرە وتىرىپ, جاستار ۇنەمى جاڭا ءبىلىم كوزدەرىن ىزدەستىرۋگە, ءوزىن-ءوزى تاربيەلەۋگە جانە قابىلەتتەرىن دامىتۋعا, ۋاقىتقا بايلانىستى جىلدام وزگەرەتىن الەمدە جاڭا بايلانىستاردى ورناتۋعا ۇمتىلۋلارى ءتيىس» - دەپ اتاپ ءوتتى نۇرلان ەرمەكباەۆ.

ءمينيستردىڭ ايتۋىنشا, «پرەزيدەنتتىڭ بەس الەۋمەتتىك باستاماسى» جاستاردىڭ ۇلكەن ومىرگە قانات قاعۋىنا سەنىمدى نەگىز بولا الادى. جاڭا «7-20-25» يپوتەكالىق باعدارلاماسى بارلىق قىزمەتكەرلەرگە, ءتىپتى جالاقىسى تومەن بولسا دا, ءوز باسپانالارىن الۋعا مۇمكىندىك بەرەدى. قوسىمشا 20 مىڭ گرانت ءبولۋ جانە 75 مىڭ ورىنعا ارنالعان ستۋدەنتتىك جاتاقحانالار سالۋ اۋىلدار مەن شاعىن قالالارداعى جاستاردىڭ قازاقستاننىڭ جەتەكشى ءبىلىم بەرۋ ورتالىقتارىندا وقۋعا ءتۇسۋ قولجەتىمدىلىگىن جەڭىلدەتەدى, سونداي-اق ۋنيۆەرسيتەتتەر مەن كوللەدجدەردىڭ ستۋدەنتتەرى ءۇشىن تۇرعىن ءۇي ماسەلەسىن شەشەدى.

جيىن بارىسىندا كوپشىلىكتىڭ قولداۋىمەن قوزعالىس توراعاسى بولىپ سايلانعان قحا مۇشەسى ماكسيم سپوتكايعا  قحا توراعاسىنىڭ ورىنباسارى - حاتشىلىق مەڭگەرۋشىسى لەونيد پروكوپەنكو اسسامبلەيانىڭ تۋىن تابىستادى.

«قازىرگى تاڭدا ەلىمىزدە ساياسي, ەكونوميكالىق, الەۋمەتتىك جانە رۋحاني جاڭعىرۋ پروتسەستەرى ءجۇرىپ جاتىر. وسىعان بايلانىستى ساياسي, ەكونوميكالىق, قوعامدىق كۇشتەردىڭ بارلىعىن مەملەكەت باسشىسى يدەياسىنىڭ توڭىرەگىنە توپتاستىرۋ قاجەت. سوندىقتان, ءبىز استانا, الماتى مەن قازاقستاننىڭ بارلىق وڭىرلەرىندەگى ەتنومادەني بىرلەستىكتەردىڭ جاستارى قحا-نىڭ جاستارعا قاتىستى بارلىق قوعامدىق ۇيىمدارىنىڭ بىرىگۋىمەن «جاڭعىرۋ جولى» رەسپۋبليكالىق جاستار قوزعالىسىن قۇرۋ تۋرالى تۋرالى شەشىمگە كەلدىك. ەرىكتى قوزعالىسقا قازاقستاننىڭ كەز كەلگەن ازاماتى مۇشە بولىپ, قاتىسا الادى», – دەيدى اتالعان قوزعالىستىڭ توراعاسى ماكسيم سپوتكاي. جيىن سوڭىندا «جاڭعىرۋ جولى» قوزعالىسىنىڭ 2018-2020 جىلدارعا ارنالعان ستراتەگياسى بەكىتىلىپ, ءىس-شارالار جوسپارى كەلىسىلدى. 

ايا ءومىرتاي,

«ەگەمەن قازاقستان