بۇگىن استانادا قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتاەۆ ەلىمىزگە رەسمي ساپارمەن كەلگەن تاجىكستان رەسپۋبليكاسىنىڭ پرەزيدەنتى ەمومالي راحمونمەن كەزدەستى, دەپ حابارلايدى primeminister.kz.
كەزدەسۋ بارىسىندا ەنەرگەتيكا, اۋىل شارۋاشىلىعى, كولىك, ترانسشەكارالىق سۋدى پايدالانۋ, ازاماتتىق اۆياتسيا, كوشى-قون, دەنساۋلىق ساقتاۋ, مادەنيەت, ءبىلىم جانە عىلىم سالالارىنداعى ەكى ەل اراسىنداعى ساۋدا-ەكونوميكالىق ىنتىماقتاستىقتىڭ قازىرگى جاعدايى مەن ونى كەڭەيتۋ ماسەلەلەرى تالقىلاندى. بۇدان وزگە, وڭىرارالىق قاتىناستاردىڭ پەرسپەكتيۆالىق باعىتتارى, قازاقستان مەن تاجىكستاننىڭ ىسكەرلىك قۇرىلىمدارى اراسىنداعى تىكەلەي بايلانىستار, سونداي-اق ەكى ەلدىڭ ەكسپورتتىق الەۋەتىن جۇزەگە اسىرۋ ماسەلەلەرى قارالدى.
ەسكە سالا كەتەيىك, كەشە, 14 ناۋرىزدا مەملەكەت باسشىسى ن. نازارباەۆ تاجىكستان پرەزيدەنتى ە. راحمونمەن شاعىن جانە كەڭەيتىلگەن قۇرامدا كەزدەسۋ وتكىزدى. كەزدەسۋلەر بارىسىندا ەكىجاقتى ىنتىماقتاستىق ماسەلەلەرى جانە ولاردى ودان ءارى دامىتۋ پەرسپەكتيۆالارى تالقىلاندى.
قر مەن تر اراسىنداعى ديپلوماتيالىق قاتىناستار 07.01.1993 جىلى ورناعان. تاجىكستان — قازاقستاننىڭ ورتالىق ازيا ايماعىنداعى ەكىنشى ءىرى ساۋدا سەرىكتەسى, ونىڭ ۇلەسىنە ءوڭىر ەلدەرىمەن جالپى ساۋدا اينالىمىنىڭ شامامەن 20% تيەسىلى.
2017 جىلدىڭ قاڭتار–جەلتوقسان ايلارىنداعى تاۋار اينالىم $776,3 ملن قۇرادى, بۇل وتكەن جىلدىڭ وسىنداي كەزەڭىمەن سالىستىرعاندا 31,5%-كە جوعارى كورسەتكىش ($590,2 ملن). قازاقستاننان تاجىكستانعا ەكسپورت 2017 جىلى 23,3%-كە ءوسىپ, $458,7 ملن قۇرادى.