قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا سىبايلاس جەمقورلىققا قارسى كۇرەس ماسەلەلەرى جونىندەگى ازاماتتىق باستامالاردىڭ ءىى كونگرەسىنە قاتىستى.
ءىس-شاراعا مەملەكەتتىك ورگاندار, ديپلوماتيالىق كورپۋس, حالىقارالىق ۇيىمدار جانە ەلىمىزدەگى ازاماتتىق قوعامداستىق وكىلدەرى قاتىستى. كونگرەسس سىبايلاس جەمقورلىققا قارسى ءىس-ارەكەت ماسەلەسى بويىنشا مەملەكەت پەن قوعامدى جۇمىلدىراتىن بىرەگەي الاڭعا اينالدى.
ونىڭ نەگىزگى مىندەتى – بارلىق دەڭگەيدە, ءاربىر ەلدى مەكەندە جانە اۋىلدىق وكرۋگتەردە جۇرگىزىلىپ جاتقان قوعامدىق باقىلاۋدىڭ باستى قاعيداتتارىن ورنىقتىرۋ.
مەملەكەتتىك حاتشى ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋدىڭ نەگىزگى باسىمدىعىنىڭ ءبىرى سىبايلاس جەمقورلىققا قارسى كۇرەس جانە زاڭ ۇستەمدىگى ەكەنىن اتاپ ءوتتى.
گ.ابدىقالىقوۆا 2014 جىلى قازاقستان پرەزيدەنتى «مۇلدە توزبەۋشىلىك» احۋالىن قالىپتاستىرۋ ارقىلى سىبايلاس جەمقورلىققا قارسى قوزعالىسقا بۇكىل قوعامدى تارتۋعا باعىتتالعان سىبايلاس جەمقورلىققا قارسى ستراتەگيانى بەكىتكەنىن ايتتى. وسى ۋاقىت ىشىندە 64 شارا اتقارىلىپ, اكىمشىلىك كەدەرگىنى ازايتۋعا, تۇرمىستىق جەمقورلىق دەڭگەيىن تومەندەتۋگە ەلەۋلى سەپتىگىن تيگىزدى. ماسەلەن, قازىر بارلىق وڭىردە ازاماتتارعا بيۋدجەت قاراجاتىنىڭ يگەرىلۋىن, ماقساتقا ساي قولدانىلۋىن, الەۋمەتتىك نىساندار قۇرىلىسىنىڭ ساپاسى مەن مەرزىمىن باقىلاۋعا مۇمكىندىك بەرەتىن قوعامدىق باقىلاۋ كارتاسى ىسكە قوسىلدى. ەلدە جۇرگىزىلىپ جاتقان سىبايلاس جەمقورلىققا قارسى ساياساتقا دەگەن جۇرتشىلىقتىڭ سەنىمى كۇشەيدى.
كەزەكتى زاڭنامالىق وزگەرىستەر سىبايلاس جەمقورلىق سيپاتىنداعى قۇقىق بۇزۋشىلىقتىڭ الدىن الۋ جۇيەسىن جەتىلدىرۋدىڭ قۇقىقتىق نەگىزدەرىن قالىپتاستىردى.
قازاقستان بۇۇ-نىڭ سىبايلاس جەمقورلىققا قارسى كونۆەنتسياسىن; ۇيىمداسقان ترانسۇلتتىق قىلمىسقا قارسى كونۆەنتسيانى; ەۋروپا كەڭەسىنىڭ قىلمىستىق ارەكەتتەردەن تۇسكەن كىرىستەردى جىمقىرۋ, انىقتاۋ, تارتىپ الۋ جانە تاركىلەۋ تۋرالى كونۆەنتسيالارىن راتيفيكاتسيالادى.
– بۇگىندە ءبىز «سىبايلاس جەمقورلىققا قارسى كۇرەس جونىندەگى ىستانبۇل جوسپارى» مونيتورينگىنىڭ ءوزارا باعا بەرۋگە ارنالعان سۋبوڭىرلىك باعدارلاماسىنا بەلسەندى تۇردە اتسالىسىپ وتىرمىز, – دەدى مەملەكەتتىك حاتشى.
سوڭىندا مەملەكەتتىك حاتشى گ.ابدىقالىقوۆا سىندارلى وي-پىكىرلەردىڭ ورتاعا سالىنىپ, ءتيىمدى ديالوگ ورنايتىنىنا نيەتتەستىك ءبىلدىرىپ, كونگرەسكە قاتىسۋشىلارعا زور تابىس تىلەدى.