تۇربات اۋىلىندا كاسىپكەردىڭ كومەگىمەن بالاباقشا اشىلدى

بۇگىندە اۋىل تۇرعىندارىن جۇمىسپەن قامتۋ, شاعىن بيزنەستى دامىتۋ ماقساتىندا جۇزەگە اسىرىلىپ جاتقان يگى ىستەر كوپ. كۇنى كەشە اۋقىمدى الەۋمەتتىك جوبالارعا جول اشاتىن «پرەزيدەنتتىڭ بەس الەۋمەتتىك باستاماسىندا» شا­عىن نەسيە بەرۋدى كوبەيتۋ, اسىرەسە, اۋىل-ايماقتار ءۇشىن, اۋىل­داعى كاسىپكەرلىكتى دامىتۋ ءۇشىن اي­رىقشا ماڭىزدى ەكەنى ايتىل­دى. اۋىلداستارىنىڭ الاڭسىز جۇمىس ىستەۋىنە سەپتىگىن تيگىزۋ قازىعۇرتتىق كاسىپكەردىڭ دەمەۋشىلىك جاساۋىنا نەگىز بولعان.

سونداي-اق كاسىپكەر بۇل قادامىن ەلباسىنىڭ «بولاشاققا باعدار: رۋحاني جاڭعىرۋ» ماقا­لاسىندا تاياۋ جىلدارداعى مىندەت­تەر رە­تىندە ايقىندالعان «تۋعان جەر» باعدارلاماسىمەن بايلانىستىرادى. بۇل ورايدا جەرگىلىكتى قوعامنىڭ ماسەلەلەرىن شەشۋدە ازاماتتاردىڭ, ۇكىمەتتىك ەمەس ۇيىمدار, مەتسەناتتار, بيزنەس وكىلدەرى مەن مەملەكەتتىك ورگاندار كۇشىن بىرىكتىرۋگە باعىتتالعان «اتامەكەن» كىشى باعدارلاماسى ىسكە اسىرىلىپ جاتقانى ءمالىم. نەگىز­گى ماقساتى ءاربىر ازامات ءوزىنىڭ تۋىپ-وسكەن جەرىنە, اۋىلىنا كو­مەك كورسەتۋ, ال نەگىزگى باعىتى اۋدان­دارداعى وزەكتى ماسەلەلەردى انىق­تاۋ, حالىقتىق باستامالاردى كوتە­رۋ, سونى بىرلەسىپ شەشۋ بولىپ تابىلاتىن باعدارلاما قازىعۇرتتىق كاسىپكەرلەر تاراپىنان قولداۋ تابۋدا. «مەرۋەرت انا» بالاباقشاسىنىڭ اشىلۋى سونىڭ ءبىر كورىنىسى.

جالپى, قازىعۇرت اۋدانىندا 68 بالاباقشا جۇمىس ىستەيدى. ونىڭ 13-ءى مەملەكەتتىك بولسا, 55-ءى مەملەكەت-جەكەمەنشىك ارىپتەستىگى اياسىندا سالىنعان. بالاباقشانىڭ اشى­لۋ سالتاناتىندا اۋدان اكى­مى تولەگەن تەلعاراەۆ بۇگىندە بالالاردى بالاباقشامەن قامتۋ دەڭگەيى 87,5 پايىزعا جەتكەنىن اتاپ ءوتتى. «تاۋەلسىزدىكتىڭ العاشقى جىلدا­رىندا ەلىمىزدە ەكونوميكالىق قيىندىقتىڭ سالدارىنان كوپتەگەن بالاباقشالار ءوز جۇمىستارىن توقتاتىپ, جەكەشەلەنىپ باسقا ماق­­ساتتارعا پايدالانعان بولاتىن. سول وتپەلى كەزەڭدە ەلىمىزدە بۇل­دىرشىندەرگە ارنالعان مەكەمەلەرگە تاپشىلىق بايقالاتىن. وسى ورايدا ەلباسى تاپسىرماسى نەگىزىندە «بالاپان» مەملەكەتتىك باعدارلاماسى ىسكە استى. ماسەلەن, بىلتىر مەملەكەت-جەكەمەنشىك ارىپ­تەستىگى اياسىندا «بالاپان» باع­دار­لاماسىمەن 33 بالاباقشا پاي­دالانۋعا بەرىلدى. سونداي-اق «تۋعان جەر», «اتامەكەن» باعدار­لاما­لا­رىنىڭ ارقاسىندا اۋدانىمىزدا جاڭا بالاباقشالار سانى ءوسىپ جاتىر. ناتيجەسىندە بالالاردى بالاباقشامەن قامتۋ دەڭگەيىن بيىل 90 پايىزدان اسىرۋدى كوزدەپ وتىرمىز. سونىمەن قاتار ءبىزدىڭ اۋداندا ءۇش اۋىسىمدى مەكتەپتەر ماسەلەسى دە شەشىلگەن. ال اپاتتى جاعدايدا تۇرعان مەكتەپتەردىڭ ماسەلەسى بيىل تولىعىمەن شەشىلەتىن بولادى. كە­لەسى كەزەكتە ىڭعايلاستىرىلعان مەك­­تەپتەردى تيپتىك مەكتەپكە اۋىس­تى­راتىن بولامىز», دەدى اۋدان اكىمى.

«مەرۋەرت انا» بالاباقشاسىندا بۇلدىرشىندەر ءۇشىن بارلىق جاعداي جاسالعان. نىساننىڭ جالپى اۋماعى 0,45 گەكتاردى قۇرايدى. جەر­گىلىكتى 30 تۇرعىن تۇراقتى جۇ­مىسپەن قام­تىلدى. بالاباقشا مەڭگەرۋشىسى اداس يساقۇلوۆانىڭ ايتۋىنشا, قىزمەتكەرلەردىڭ ورتاشا ايلىق جالاقىسى 40-60 مىڭ تەڭگە. مەكەمە بوبەكجايعا ارنالعان بارلىق قۇرال-جابدىقتارمەن قامتىلعان. سونداي-اق بالالاردى تاسىمالداۋعا ارنالعان جايلى اۆتوكولىك تە بار. بالاباقشا قىزمەتكەرلەرى بالالارعا ساپالى ءبىلىم, سانالى تاربيە بەرۋدى باستى مىندەتى سانايدى.

عالىمجان ەلشىباي,

«ەگەمەن قازاقستان»