مەملەكەت باسشىسىنىڭ «پرەزيدەنتتىڭ بەس الەۋمەتتىك باستاماسى» اتتى قازاقستان حالقىنا ۇندەۋى حالىقتىڭ الەۋمەتتىك قامتىلۋىنا, اسىرەسە جاستار جاعدايىنا باسا نازار اۋدارۋىمەن ەرەكشەلەنەدى.
ءبىرىنشى باستاماداعى «7 – 20 – 25» باعدارلاماسى, ياعني تۇرعىن ءۇي الۋ بارىسىندا نەسيەنىڭ پايىزدىق مولشەرى 7 پايىزعا جانە العاشقى تولەمى 20 پايىزعا ءتۇسىرىلىپ, ونى 25 جىلعا دەيىن تولەۋگە مۇمكىندىك بەرىپ وتىر. بۇل ءوز كەزەگىندە ءبىزدىڭ وڭىرىمىزدە كەزەكتە تۇرعان مىڭداعان ادامعا, وسى باعدارلاما ارقىلى تۇرعىن ءۇي الۋعا جول اشادى. سونىمەن بىرگە وڭىردە تۇرعىن ءۇي قۇرىلىسىنىڭ دامۋىنا ۇلكەن سەرپىن بەرە وتىرىپ, ءوڭىردىڭ دامۋىنا, شاعىن ورتا بيزنەستىڭ ورىستەۋىنە جانە جاڭا جۇمىس ورىندارىنىڭ اشىلۋىنا مۇمكىندىك بەرەدى.
ەلباسىمىز ەكىنشى باستاماسىندا جالاقىسى تومەن قازاقستاندىقتاردى قولداۋ ءۇشىن سالىق جۇكتەمەسىن 10 ەسەگە ازايتىپ, 1 پايىز عانا سالىق سالۋدى ۇسىندى. بۇل جالاقىسى از قازاقستان ازاماتتارى ءۇشىن ۇلكەن قولداۋ. نارىق باعاسى ايلىق ايىرماشىلىقتى العا تارتىپ وتىرعانى جاسىرىن ەمەس, وسى تۇرعىدان العاندا بۇل ماسەلەنىڭ سالىق سالاسىندا ەسكەرىلگەنى دۇرىس-اق.
ءۇشىنشى باستامادا ستۋدەنت جاستاردىڭ جاتاقحاناداعى جاعدايىن جاقسارتۋدى, سونىمەن بىرگە جاستاردىڭ وقۋ اقىسىن تولەۋدە جەڭىلدىك بولۋ ءۇشىن, قوسىمشا 20 مىڭ گرانت ءبولۋدى ۇسىندى. بۇل وڭىرىمىزدەگى دەنساۋلىق, ءبىلىم سالاسىندا قاجەتتى ماماندارمەن قامتاماسىز ەتۋگە, قاجەتتى تەحنيكالىق مامانداردى تارتۋعا مۇمكىندىك بەرەدى. سونىمەن بىرگە وبلىس ورتالىعى – اقتاۋ قالاسىنداعى ستۋدەنتتەردى جاتاقحانامەن قامتۋعا, ولاردىڭ جاقسى ءبىلىم الۋىنا, تۇرمىس جاعدايىن جاقسارتۋعا جول اشادى.
سونداي-اق شاعىن نەسيە بەرۋدى كوبەيتۋ باستاماسى جاپپاي كاسىپكەرلىكتى دامىتۋعا, اسىرەسە اۋىلداعى جاستاردى كاسىپكەرلىككە باۋلۋعا سەپ بولادى. بۇل نارىقتىق ەكونوميكا تالابى, ەل دامۋى, تۇرعىنداردىڭ جۇمىسپەن قامتىلۋى ءۇشىن ماڭىزدى ماسەلە. كاسىپكەرلەردى قولداۋ قورى ارقىلى شاعىن نەسيە بەرۋ ءاربىر ازاماتقا ءوزىنىڭ كاسىبىن اشىپ, مۇمكىندىگىن ىسكە اسىرۋعا ءتيىمدى بولارى ءسوزسىز.
بەسىنشى باستاما رەتىندە ەلدى گازبەن قامتاماسىز ەتۋدى جالعاستىرۋ جايى ايتىلدى. بۇل – ەلىمىز ءۇشىن وزەكتى ماسەلە. ءبىزدىڭ وبلىسىمىز تولىقتاي گازبەن قامتىلعانىمەن, ورتالىق جانە سولتۇستىك وڭىرلەر ءالى دە گازسىز وتىر. بارلىق ءوڭىردى گازبەن قامتۋ قازاقستاندىقتار ءۇشىن قۋانىشتى حابار ەكەندىگى ءسوزسىز. ونىڭ ىشىندە ەلوردامىزدى, بيىل 20 جىلدىق مەرەيتويى تويلانعالى وتىرعان استانا قالاسىن گازداندىرۋدى, ەكولوگيالىق جاعدايىن جاقسارتۋدى ماڭعىستاۋ جۇرتشىلىعى ءبىراۋىزدان قولدايدى.
سەرىكباي ترۇموۆ,
ماڭعىستاۋ وبلىستىق ءماسليحاتىنىڭ حاتشىسى
ماڭعىستاۋ وبلىسى