«بەس الەۋمەتتىك باستامانى» «اق جول» پارتياسى دا زور ريزاشىلىقپەن قابىلدادى. پارتيامىزدىڭ نەگىزگى باعىتتارىنىڭ ءبىرى – كاسىپكەرلىكتى, بيزنەستى قولداۋ بولعاندىقتان اتالعان جوبانىڭ ەلىمىزدىڭ كاسىپكەرلەرىنە ءتيىمدى جاقتارىنا توقتالا كەتسەك دەيمىن.
«7 – 20 – 25» باعدارلاماسى – ءوز ەلىمىزدەگى تۇرعىن-ءۇي ماسەلەسىن تولىقتاي شەشۋگە باعىتتالعان ءىرى قادام. بۇل دەگەنىمىز – ەلىمىزدە باسپانا ماسەلەسىن شەشۋمەن قاتار, قۇرىلىس كومپانيالارىنا جۇمىس كولەمىن بەرۋ, مىڭداعان جۇمىس ورىندارىنىڭ اشىلۋى, قۇرىلىس ماتەريالدارى نارىعىنداعى كاسىپكەرلەرگە بەرىلەتىن ۇلكەن مۇمكىندىك!
«2022 جىلدىڭ سوڭىنا دەيىن 25 مىڭ ورىندىق جاڭا ستۋدەنتتىك جاتاقحانالار سالىنادى. بۇل الداعى جىلدارداعى تۇتىنۋ مولشەرى كوبەيۋىن ەسەپكە العاننىڭ وزىندە ماسەلەنى تولىقتاي شەشۋگە مۇمكىندىك بەرەدى», – دەگەن پرەزيدەنتتىڭ باستاماسى الەۋمەتتىك سالاداعى ۇلكەن وزگەرىس دەپ ەسەپتەيمىن. ءبىزدىڭ قولىمىزدا بار دەرەكتەرگە قاراعاندا, استانا مەن الماتىنىڭ وزىندە عانا ستۋدەنتتەردىڭ 30 پايىزى عانا جاتاقحانامەن قامتاماسىز ەتىلگەن. قالعاندارى پاتەر جالداۋعا ءماجبۇر. «اق جول» پارتياسى وتكەن جىلى وسى ماسەلەنى كوتەرگەندە كەيبىر باسىلىمدار ورە تۇرەگەلىپ, جاتاقحانا ماسەلەسىن باسقاشا بۇرمالاپ, كۇلكىگە اينالدىرۋعا تىرىسقان. ۋاقىت – بارىنە دە تورەشى.
ال اۋىل شارۋاشىلىعىنا بولىنەتىن نەسيە كولەمىن ارتتىرۋدى سول اۋىلدىڭ جاعدايىن جاقسارتۋ, اۋىلدىق جەرلەردە جۇمىس ورىندارىن كوبەيتۋ, ەڭ باستىسى, كاسىپكەرلىكتى قولداۋ دەپ تۇسىنگەن ءجون.
«ۇلتتىق بانك كەمىندە 1 تريلليون تەڭگە قارجى تارتاتىن ارنايى كومپانيا قۇرىپ, ول قارجىنى بانكتەردىڭ جوعارىدا ايتىلعان شارتتار بويىنشا بەرەتىن جاڭا يپوتەكالىق نەسيەلەرىن ساتىپ الۋعا جۇمساۋى قاجەت» دەپ اتاپ كورسەتتى ەلباسى. دەمەك, ەندى ۇكىمەت ونىڭ جۇزەگە اسۋىنا بىلەك سىبانا كىرىسەرى ءسوزسىز. وپتيميستىك جوبانىڭ جۇزەگە اسۋى ءۇشىن ەڭ الدىمەن ۇكىمەتىمىزدىڭ قاجىر-قايراتى قاجەت. ۇكىمەت ەلباسى ايتقان بەس باستامانىڭ, اسىرەسە, بانكتەرگە قاتىستى تۇستارىن قاتاڭ باقىلاۋدا ۇستاسا – قاراپايىم حالىق كوپتەن بەرى اسىعا كۇتكەن, كاسىپكەرلەرگە پايدالى ماسەلەلەر وڭ شەشىمىن تابارى ءسوزسىز.
ازات پەرۋاشەۆ,
ءماجىلىس دەپۋتاتى,
«اق جول» فراكتسياسىنىڭ باسشىسى