ەلباسىنىڭ بارلىق باستامالارى دا حالىقتى الەۋمەتتىك تۇرعىدان قولداۋعا باعىتتالىپ كەلگەنى بەلگىلى. بىراق بۇگىنگى باستامالاردىڭ ورنى ءتىپتى ەرەكشە, مۇنى تاريحي باستاما دەپ ايتۋعا بولادى.
ماعان اسىرەسە قاتتى اسەر ەتكەنى – اۋىل تۇرعىندارىنا دەگەن قامقورلىق بولدى. ءبىزدىڭ حالقىمىزدىڭ 42 پايىزعا جۋىعى ءالى دە اۋىل تۇرعىندارى بولىپ ەسەپتەلەدى. مىنە, سول حالىقتى الەۋمەتتىك تۇرعىدان قولداۋدا ايرىقشا قامقورلىق جاسالعالى وتىر. ولارعا جەڭىلدەتىلگەن ءوسىم پايىزىمەن جىلىنا 14 مىڭعا دەيىن نەسيە بەرىلەتىن بولدى. بۇگىنگى كۇنگىدەن بۇل ەكى ەسە كوپ. كەمىندە 40 مىڭعا جۋىق جاڭا جۇمىس ورىندارىنىڭ اشىلۋىنا مۇمكىندىك بەرەدى دەگەن ءسوز. ويتكەنى ءبىر وتباسىنىڭ قاراماعىندا 3-4 ادامى بولادى عوي. ءسويتىپ, اۋىل تۇرعىندارى قاتتى سەرپىلىپ, وزدەرىنىڭ ماتەريالدىق جاعدايىن ارتتىرۋعا قول جەتكىزەتىن بولادى. سونىمەن قاتار مەنى قاتتى ءتانتى ەتكەن ماسەلە – ستۋدەنتتەردىڭ جاتاقحانالارمەن قامتىلۋى بولدى. قازىر گرانتپەن وقىپ, جاتاقحانالاردا تۇرىپ جاتقاندار نەگىزىنەن اۋىل تۇرعىندارى. مىنە, وسى تالاپتى جاستارعا قوسىمشا گرانتتار بولىنۋىمەن قاتار جاڭا جاتاقحانالارمەن قامتاماسىز ەتۋ قاراستىرىلىپ وتىر. اسىرەسە اۋىلشارۋاشىلىق تەحنيكالارىن يگەرۋگە مامانداناتىن جاستارعا ايرىقشا قامقورلىق قاراستىرىلعان. سونىمەن قاتار جالاقىسى تومەن ادامدارعا سالىقتىق جۇكتەمەنى ازايتۋ باستاماسى دا حالىق اراسىندا ۇلكەن سەرپىلىس اكەلەرى ءسوزسىز. ونىڭ كولەمى بۇرىنعى 10 پايىزدان 1 پايىزعا دەيىن تۇسىرىلەتىن بولدى.
مەنىڭشە بۇل باستامالاردى حالىق ۇلكەن قۋانىشپەن قارسى الىپ, قولدايدى. ەلباسى ۇندەۋى بيىلعى ناۋرىز مەرەكەسى قارساڭىندا حالىققا ايرىقشا تارتۋ بولدى دەپ ەسەپتەيمىن.
ءالي بەكتاەۆ,
سەنات دەپۋتاتى,
«اۋىل» پارتياسىنىڭ توراعاسى