پارلامەنت سەناتىندا داريعا نازارباەۆانىڭ توراعالىق ەتۋىمەن حالىقارالىق قاتىناستار, قورعانىس جانە قاۋىپسىزدىك كوميتەتى مەن اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ مۇشەلەرى سۋ قاۋىپسىزدىگى ماسەلەلەرى بويىنشا مەملەكەتتىك مۇددەلى ورگاندار باسشىلارىمەن كەزدەستى.
حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى داريعا نازارباەۆا كەزدەسۋدى اشا كەلىپ, شەكتەۋلى ءارى شاعىن سۋ رەسۋرستارى جاعدايىندا سۋ قاۋىپسىزدىگى ماسەلەلەرى ءبىزدىڭ ەلىمىزدە ۇلتتىق قاۋىپسىزدىكتىڭ ءبىر بولىگى رەتىندە قاراستىرىلاتىنىن ايتتى. جاھاندىق جانە ايماقتىق تابيعات وزگەرىستەرى, سۋ قاتىناستارىنداعى مەملەكەتارالىق كەلىسپەۋشىلىكتەر, سۋ شىعىنى كوپ تەحنولوگيانى جانە سۋدى رەتتەۋ مەن بولۋدە ارتتا قالعان تەحنيكالىق جابدىقتاردى پايدالانۋ ەلىمىزدى سۋمەن قامتاماسىز ەتۋدەگى باستى قاۋىپ بولىپ تابىلادى.
سەناتور كوكتەمگى سۋ تاسۋى جىل سايىنعى وزەكتى ماسەلە بولىپ وتىرعانىن اتاپ ءوتتى. مەملەكەتتىك ورگاندار جۇمىسىنداعى جۇيەلى قاتەلىكتەردىڭ سالدارى داعدىلى تاسيتىن سۋدان كۇتپەگەن اپاتتارعا دۋشار ەتىپ وتىر.
ءسوز العان ىشكى ىستەر ءمينيسترىنىڭ ورىنباسارى يۋري يلين ءىىم ورتالىق جانە جەرگىلىكتى اتقارۋشى مۇددەلى ورگاندارمەن بىرلەسە وتىرىپ, «2017-2020 جىلدارعا ارنالعان تاسقىن سۋ قاۋپىن بولدىرماۋ جانە جويۋ جونىندەگى شارالار كەشەنى» جول كارتاسىن ىسكە اسىرۋدى جالعاستىرىپ جاتقانى تۋرالى حاباردار ەتتى.
يۋ.يلين كوكتەمگى جايىلما سۋعا دايىندىقتا توتەنشە جاعدايلار جونىندەگى ورتالىق جانە ايماقتىق كوميسسيالار قابىلداعان شارالارعا قاراماستان بىرقاتار وزەكتى ماسەلەلەر ساقتالىپ وتىرعانىن, ولاردىڭ ىشىندە ەڭ الدىمەن, سۋدان قورعاۋ كەشەندەرىنىڭ جاعدايى, ەلدى مەكەندەردى قورعاۋ جۇمىستارىن ۇيىمداستىرۋ, بوگەتتەر قۇرىلىسى مەن وزەن ارنالارىن تازالاۋ, كوپىرلەردى جاڭعىرتۋ بار ەكەنىن اتاپ ءوتتى.
اۋىل شارۋاشىلىعى ءمينيسترىنىڭ ورىنباسارى رۇستەم قۇرمانوۆ رەسپۋبليكالىق مەنشىكتەگى سۋدان قورعاۋ كەشەندەرىن بيىلعى سۋ تاسقىنىن وتكىزۋگە دايىنداۋ جانە تاسقىن سۋدىڭ ىقتيمال زارداپتارىنان بولاتىن زيانداردىڭ الدىن الۋ جونىندەگى ەسكەرتۋ شارالارى بويىنشا اۋىل شارۋاشىلىعى مينيسترلىگى قابىلداعان شارالار تۋرالى باياندادى.
كەزدەسۋدى اياقتاي كەلىپ كوميتەت توراعاسى د. نازارباەۆا تالقىلاۋدىڭ قورىتىندىسى بويىنشا ازىرلەنگەن ۇسىنىمدار ۇكىمەتكە جىبەرىلەتىنىن جانە زاڭ شىعارۋ جۇمىستارى بارىسىندا ەسكەرىلەتىنىن ايتتى.