وسكەمەندەگى نازارباەۆ زياتكەرلىك مەكتەبىنىڭ كۋراتورلارى ءبىر اي بويى ۇلتتىق ناقىشتاعى كويلەكتەردى كيىپ جۇرۋگە شەشىم قابىلداپتى. ەل كولەمىندە وسىمەن ءۇشىنشى جىل قاتارىنان اتاپ وتىلگەن العىس ايتۋ كۇنىن ءبىلىم ورداسىنىڭ ۇستازدارى قازاقتىڭ ويۋ-ورنەگىمەن كومكەرىلگەن كويلەكتەردى كيىپ, ۇلتتىق اشەكەيلەردى تاعىپ تاماشا كوڭىل-كۇيمەن قارسى الدى.
زياتكەرلىك مەكتەپتىڭ كۋراتورى شولپان چاكيرتەنوۆا وقۋشىلارعا ۇلتتىق ناقىشتاعى كيىمدەردىڭ اسەمدىگىن, كوركەمدىگىن عانا ەمەس, كيۋگە قولايلىلىعىن دا پاش ەتۋدى ماقسات قىلعاندىقتارىن ايتادى. «بابادان بالاعا قالعان قۇندى مۇرالارىمىزدى ءوزىمىز ناسيحاتتاماعاندا كىم ناسيحاتتايدى؟ اللا ءساتىن سالسا, ناۋرىز مەرەكەسى قارساڭىندا وقۋشى قىزدارىمىز دا اشەكەيلەرىن, سىڭعىرلاعان شولپىلارىن تاعىپ شىعادى», - دەيدى ول.
مەكتەپتىڭ ءباسپاسوز حاتشىسى روزا قۇمارعاجينانىڭ سوزىنە سەنسەك, ءبىلىم ورداسىنىڭ ۇستازدارى جىل سايىن ۇلىستىڭ ۇلى كۇنى قارساڭىندا ۇلتتىق كيىمدەردى كيىپ ءجۇرۋدى يگى داستۇرگە اينالدىرعان. ال ءبىز ءسوز ەتىپ وتىرعان تاماشا اكتسيا وسى ايدىڭ سوڭىنا دەيىن جالعاسادى. يگى باستاماعا شاھارداعى باسقا دا مەكتەپتەردىڭ ۇستازدارى ءۇن قوسسا, قانەكي.
ازامات قاسىم,
«ەگەمەن قازاقستان»
وسكەمەن
سۋرەت وسكەمەندەگى نازارباەۆ زياتكەرلىك مەكتەبىنىڭ ءباسپاسوز قىزمەتىنەن الىندى