"رۋxاني جاڭعىرۋ" باعدارلاماسى اياسىندا ۇيىمداستىرىلىپ جاتقان "وتكەن مەن بولاشاقتىڭ ورتاسى" اتتى كورمە 10 كۇنگە سوزىلادى, دەپ xابارلايدى اتىراۋ وبلىستىق وڭىرلىك كوممۋنيكاتسيالار قىزمەتى.
بۇگىن ش. ساريەۆ اتىنداعى كوركەمسۋرەت جانە قولدانبالى-ساندىك ونەر مۋزەيىندە شەبەرلەر كورمەسىنىڭ اشىلۋ سالتاناتى ءوتتى.
كورمەدە ن. تىلەنديەۆ اتىنداعى كىشى ونەر اكادەمياسىنىڭ تۇلەكتەرى, بۇگىندە ءبىرى ۇستاز, ءبىرى جەكە كاسىبى بار مەيىربەك جاعىپاشوۆ, قايرات شاپبااەۆ, ميراس دجانگۋجيەۆ جانە اسىلبەك باقتيار سىندى شەبەرلەر ءوز ەڭبەكتەرىن قالا تۇرعىندارىنا تانىستىردى.
- بۇل ءبىزدىڭ اتىراۋداعى العاشقى كورمەمىز. ەلگە از دا بولسا پايدامىز ءتيسىن دەگەن نيەتتە ەڭبەك ەتىپ كەلەمىز. نەگىزىنەن, ءار قازاقتىڭ بالاسى, ەلدىڭ ازاماتى ءوز سالاسىندا مىقتى بولىپ, اتا كاسىپتى مەڭگەرسە ەلدىڭ ەڭسەسى بيىك بولۋىنا قوسقان ۇلەسى زور بولادى دەپ ويلايمىن,-دەيدى زەرگەر قايرات شاپاباەۆ.
كورمە قوناقتارى بارلىق كوركەمونەر تۋىندىلارى: ءمۇسىن, زەرگەرلىك اشەكەي بۇيىمدار, گرافيكالىق كەسكىندەمەلەر مەن 3D max ديزاينەرلىك جوبالارىمەن تانىستى. اتىراۋ قالاسىندا اتالعان كورمە 12 ناۋرىزعا دەيىن جالعاسادى.