سەمەيدە «احمەتتىڭ اماناتى» دراماسى ساحنالاندى

سپەكتاكل ايگىلى تۇلعانىڭ جارى ءبادريسافا ەكەۋىنىڭ شاڭىراق كوتەرىپ, كيىز ءۇيدىڭ ۋىقتارىن قاداپ جاتقان شۋاقتى ساتىنەن باستالادى. وسى ۋاقىتتا «ۇشتىكتىڭ» جالاڭداعان جەندەتتەرى كەلىپ, ايەلى مەن قىزىن جىلاتىپ-سىقتاتىپ احاڭدى تۇتقىنداپ اكەتەدى. قويىلىم رەجيسسەرى وسى ءبىر كۇيزەلىسكە تولى ءساتتى ۇسىنۋ ارقىلى بايتۇرسىنوۆتىڭ عانا ەمەس, الاشوردا ۇكىمەتىنىڭ دە شاڭىراعى شايقالىپ, ۇلت سەركەلەرىنىڭ ساعى سىنا باستاعان كەزىن كورسەتكىسى كەلگەن سەكىلدى.

دراماداعى وقيعا جەلىسى نەگىزىنەن باس كەيىپكەر ا.بايتۇرسىنوۆ پەن تەرگەۋشى, ا.بايتۇرسىنوۆ پەن الاشتىڭ جاس جولبارىسى (سپەكتاكلدە اتى اتالمايدى, ءبىز مۇحتار اۋەزوۆ پەن ءالىمحان ەرمەكوۆتىڭ ءبىرى دەپ بولجادىق-ا.ق) اراسىنداعى ديالوگ رەتىندە ءوربيدى. «بايتۇرسىنوۆ, مويىندايسىڭ با؟ قولىڭدى قوي دا, ازاپتان قۇتىل. ەرتەڭگە دەيىن ويلان. تاعى ازاپ كۇتىپ تۇر سەنى» دەيدى زىلدەنگەن تەرگەۋشى. «مەن حالقىما ەشقاشان قارسى بولعان ەمەسپىن. نە ازاپ كورسەم دە الاششىل قايراتكەرلەرىمدى ساتپايمىن. ۇلتىمدى ساتپايمىن. سونى ءبىل» دەيدى بايتۇرسىنوۆ. «دەگەنمەن قايسار بۇل الاشتىقتار, سىندىرام ءالى, سەنى, سىندىرام, ساعىڭدى. نەتكەن قايسار ادام ەدى, بىراق اياماۋ كەرەك, بۇل الاشتاردى» دەپ كىجىنەدى مويىنداتا الماي امالى تاۋسىلعان تەرگەۋشى.

ۇلت ۇستازى مەن اۋەلدە تۇرمەگە قامالىپ, كەيىن بايتۇرسىنوۆتىڭ كەڭەسىمەن كەشىرىم سۇراپ, امان قالعان جاس جىگىتتىڭ اباقتىداعى اڭگىمەسى دە اسەرلى شىققان. ء«ار بۋىن ءوز داۋىرىندە وزىنە ارتىلعان جۇكتى كوتەرۋى ءتيىس. ءبىز, الاشتىقتار وزىمىزگە ارتىلعان جۇكتى كوتەردىك. باعاسىن كەلەر ۇرپاق بەرەدى. سەن بولاشاقسىڭ, بالام, مىنا قاپاستان ءتىرى شىعۋىڭ كەرەك, سوندا عانا اقيقاتتى ايتا الاسىڭ. ءبىز ارمانداعان اسىل كۇندى سەندەر كەلەر ۇرپاق كورەسىڭدەر. ءتۇبى ازات ەل بولادى, الاش! مەن وعان سەنەم» دەيدى ءوز ءومىرىنىڭ سوڭىنا جەتكەنىن بىلسە دە, كەلەشەكتىڭ جارىعىنان ءۇمىت ۇزبەگەن احاڭ. «احا, مەن ەگەر ءتىرى جەتسەم بولاشاققا, مەن مۇنى ءوز اۋزىمنان ايتىپ بەرەم. كەلەر ۇرپاق, جاس بۋىن, جاڭا زامان سىزدەردى اقتاپ الادى دەپ سەنەمىن» دەيدى بولاشاقتان كۇدەر ۇزبەگەن جاس جىگىت. قويىلىمدا ءاليحان بوكەيحانوۆ پەن مىرجاقىپ دۋلاتوۆتىڭ احمەت بايتۇرسىنوۆتىڭ شاڭىراعىندا بولىپ, بولاشاق الاشوردا ۇكىمەتىنىڭ باعىت-باعدارىن تالقىلاعان ساتتەرى دە ساحنالىق شەگىنىس جاساۋ ارقىلى ايشىقتى بەدەرلەنگەن.

درامانىڭ اۆتورى – وسكەمەندىك اقىن اسكەرحان اقتاي. رەجيسسەرى – ەربول جۋاسبەك. اسكەرحان اقتاي بۇل تۋىندىسىن نەگىزىندە بىلتىر الاشوردانىڭ 100 جىلدىعىنا وراي جاريالانعان شىعارماشىلىق بايقاۋعا ارناپ جازعانىن, الايدا بايقاۋ قورىتىندىسى شىقپاعاننان كەيىن وبلىستىق مادەنيەت باسقارماسىنا ۇسىنعانىن ايتادى. «باسقارما ۇسىنىسىمدى قۋانا قابىلداپ, «سەمەيدە قويساق قايتەدى» دەدى. سەمەي تەاترى دا بۇل ىسكە ىركىلمەي كىرىسىپ, قويىلىمدى ساحنالادى. ۇسىنىسىمدى قولداپ, قۋاتتاعان وبلىستىق مادەنيەت باسقارماسى, سەمەيدەگى تەاتر ديرەكتورى باۋىرجان تولەكوۆ, رەجيسسەر ەربول جۋاسبەك پەن ونداعى اكتەرلەردىڭ جۇمىلا كوتەرگەن جۇگىنىڭ ارقاسىندا سپەكتاكل ءساتتى شىققان سەكىلدى. باعاسىن حالىق بەرە جاتار. الاشتىڭ, الاش قايراتكەرلەرىنىڭ رۋحىنا ارنالعان دۇنيە عوي بۇل», - دەيدى دراما اۆتورى.

باس كەيىپكەر احمەت بايتۇرسىنوۆتى كەيىپتەگەن اكتەر بەكزات وماشەۆ: «وڭاي ءرول جوق قوي. ءاربىر ءرولدىڭ ءوز جاۋاپكەرشىلىگى, ءوز قيىندىعى بار. ال سانالى عۇمىرىن ۇلت مۇددەسىنە ارناعان ءوزى عالىم, ءوزى قايراتكەر احمەت بايتۇرسىنوۆتاي كەسەك تۇلعانىڭ ءرولىن سومداۋ ەكى ەسە جاۋاپكەرشىلىك جۇكتەگەنى راس. ءوز رولىمدە الاش قايراتكەرىنىڭ زيالى, بەكزات بولمىسىن كورسەتۋگە تىرىستىم. الاش, الاشوردا تۋرالى ەڭبەكتەردى پاراقتاپ شىقتىم. مۇنىڭ الدىندا مۇستافا شوقاي ءرولىن ويناپ, اتىراۋدا وتكەن فەستيۆالگە قاتىسىپ, تەاترىمىز لاۋرەات اتانعان-دى. بۇل - رەپەرتۋارىمداعى كوسەمدەردىڭ ەكىنشى ءرولى. مۇنداي سالماقتى رولدەر اكتەردى وسىرەدى, شىعارماشىلىعىن ودان ءارى شىڭداي تۇسەدى دەپ ويلايمىن» دەدى. ال احمەت بايتۇرسىنوۆتىڭ جارى ءبادريسافانىڭ ءرولىن سومداعان سۇلۋشاش تولەكوۆا دا قويىلىم وزىنە ۇلكەن جاۋاپكەرشىلىك جۇكتەگەنىن, «دراما قالاي شىعار ەكەن؟!» دەپ تولقىپ, قوبالجۋ سەزىمىن باستان وتكەرگەنىن جاسىرمادى.

«الاش تاقىرىبى قازاقتىڭ جانىنا جاقىن بولعانىمەن ۇلت ۇستازى اتانعان احمەت بايتۇرسىنوۆتىڭ جارىنىڭ ءرولىن العاندا تولقىعانىم راس. ءرولىمدى دۇرىس ويناي الماي الاش تاريحىنا جەتىك ادامدار تاراپىنان سىن ەستىپ قالمايمىن با دەگەن دە ۋايىم بولدى. الايدا اللاعا شۇكىر, قويىلىم جامان ساحنالانباعان سەكىلدى. جۇرتشىلىق جىلى پىكىرلەرىن ءبىلدىرىپ جاتىر. ءبادريسافا اپامىزدىڭ ءرولىن سومداۋ بارىسىندا الاش قايراتكەرلەرى عۇمىر كەشكەن قيلى زاماندى كوز الدىمنان وتكەرگەندەي بولدىم. الاش قايراتكەرلەرىنىڭ مامىراجاي, الاڭسىز شاقتارى كوڭىلىڭە قۋانىش سىيلاپ, ەڭسەڭدى كوتەرسە, تۇرمەگە قامالىپ, ازاپ شەككەن مەزەتتەرى كوزىڭە جاس ءۇيىرىپ, جۇرەگىڭدى اۋىرتادى. بۇل قويىلىمنىڭ جاس ۇرپاققا بەرەر تاعىلىمى مول. سوندىقتان جاستار كوبىرەك كەلىپ كورسە دەيمىز», - دەيدى اكتريسا.

ازامات قاسىم,

«ەگەمەن قازاقستان»

سەمەي