استانا قالاسىنداعى «الاتاۋ» سپورت كەشەنىندە ىشكى ىستەر ءمينيسترى ق.قاسىموۆتىڭ, سپورتشى-وليمپيادا جەڭىمپازدارى د. كارتيكوۆ, س. پودوبەدوۆا, ە.ايدوۆا, د.بابەنكونىڭ جانە 300-گە تارتا مەكتەپ وقۋشىلارىنىڭ قاتىسۋىمەن كامەلەتكە تولماعاندار ءۇشىن تەگىن سپورت سەكتسيالارىنىڭ اشىلۋىنا ارنالعان ءىس-شارا ءوتتى. بۇل تۋرالى ءىىم ءباسپاسوز قىزمەتى حابارلادى.
بۇل الەۋمەتتىك جوبا ىشكى ىستەر مينيسترلىگىنىڭ باستاماسى بويىنشا «باقىتتى بالالىق شاقتى قورعاۋ» جىلىنىڭ شەڭبەرىندە ۇيىمداستىرىلعان بولاتىن. شارانىڭ باستى ماقساتى – قاۋىپسىز بالالىقتى قامتاماسىز ەتۋ, قوعامدا جاسوسپىرىمدەرگە قاتىستى زاڭسىز ارەكەتتەرگە جول بەرمەۋ قاعيداسىن قالىپتاستىرۋ.
«بالا – ءبىزدىڭ بايلىعىمىز. سوندىقتان ولاردىڭ ءومىرى ارقاشان باقىتتى ءارى قاۋىپسىز بولۋى كەرەك. وسى ماقساتتا ىشكى ىستەر مينيسترلىگى ناقتى جانە ماڭىزدى شارالار قابىلداۋدا. وعان ايقىن دالەل – ءبىز 2018 جىلدى «باقىتتى بالالىق شاقتى قورعاۋ» جىلى دەپ جاريالادىق. وسى اتاۋلى جىل اياسىندا ءبىز ەلىمىزدىڭ بارلىق بالالارى ءۇشىن «دينامو» قوعامىنىڭ سپورت سەكتسيالارىن تەگىن وتكىزەتىن بولامىز. سول ارقىلى دەنى ساۋ, باسەكەگە قابىلەتتى ۇرپاق دايىنداۋعا ۇلەس قوساتىن بولامىز. وسى ورايدا مەن اتالعان شارانى قولداۋعا كەلگەن بارلىق قاتىسۋشىلارعا العىس ايتامىن», – دەدى ىشكى ىستەر ءمينيسترى ايتۋلى شارانىڭ اشىلۋ سالتاناتىندا.
بۇدان سوڭ 2016 جىلعى وليمپيادا چەمپيونى دوسجان كارتيكوۆ ءسوز الىپ, قازاقستاننىڭ بارشا بالالارىن سپورتپەن اينالىسۋعا شاقىرىپ, وليمپيادا شىڭىن باعىندىرۋعا تىلەكتەستىگىن ءبىلدىردى.
ايتا كەتەر جايت, «دينامو» – ىشكى ىستەر مينيسترلىگىنىڭ قۇرامىنداعى ىرگەلى سپورت قوعامى. قازاق ەلىنىڭ تالاي مايتالمان سپورتشىلارىن تاربيەلەپ شىعارعان باستى ۇيىم. تاۋەلسىزدىك جىلدارىندا دينامولىق سپورتشىلار بارلىعى 56 وليمپيادالىق مەدالدى ەل قورجىنىنا سالىپ, ەلىمىزدىڭ ابىرويىن الەمدىك دەڭگەيدە اسقاقتاتتى. وسى جۇلدەلەردىڭ 11-ءى التىن, 18-ءى كۇمىس جانە 27-ءسى قولا مەدالدار بولاتىن.
ءىس-شارا بارىسىندا بالالار سپورت سەكتسيالارىنىڭ تاربيەلەنۋشىلەرى, ۇلتتىق ۇلاننىڭ كارابينشىلەر ۆزۆودى, تسيرك ونەرپازدارى, قىزمەتتىك يتتەر ونەر كورسەتتى, سونداي-اق وليمپيادا جەڭىمپازدارىنىڭ قاتىسۋىمەن ويىن-ۆيكتورينالار ۇيىمداستىرىلدى.