كەشە اقتوبەدە قوعامدى نىعايتۋعا, قايىرىمدىلىقتى دامىتۋعا, ازاماتتىق باستامالاردى قولداۋعا, سونداي-اق مۇمكىندىگى شەكتەۋلى جاندارعا كومەك كورسەتۋگە باعىتتالعان ءداستۇرلى الەۋمەتتىك ماڭىزى بار ء«بىز بىرگەمىز!» اكتسياسى ءوتتى, دەپ حابارلايدى اقتوبە وبلىسى اكىمىنىڭ ءباسپاسوز قىزمەتى.
اقتوبە وبلىسىنىڭ اكىمى بەردىبەك ساپارباەۆ اكتسياعا قاتىسۋشىلاردى قۇتتىقتاپ, مۇمكىندىگى شەكتەۋلى اقتوبەلىكتەرگە جۇمىسقا ورنالاسۋ ءۇشىن جولداما بەردى. اكتسيا اياسىندا بارلىعى ەلۋ ادام جۇمىسقا ورنالاستىرىلماق.
«مەملەكەت باسشىسى ايقىنداعان ەلىمىزدىڭ الەۋمەتتىك ساياساتى مۇمكىندىگى شەكتەۋلى ازاماتتاردى جان-جاقتى قولداۋعا باعىتتالعان. بۇل سۇراق قاشان دا مەملەكەتتىڭ باقىلاۋىندا. پرەزيدەنت تاپسىرمالارىنا سايكەس ءبىزدىڭ وڭىردە الەۋمەتتىك ماسەلەلەر, ونىڭ ىشىندە مۇگەدەكتەردى جۇمىسقا ورنالاستىرۋ ماسەلەسىن شەشۋ باسىمدىق بولىپ تابىلادى. بۇگىندە وبلىستا ەڭبەككە جارامدى 5 مىڭعا جۋىق مۇگەدەك ازامات بار. ورتاشا العاندا ءبىز ولاردىڭ 700-800-ءىن جۇمىسقا ورنالاستىرامىز. بىراق بۇل جەتكىلىكسىز. ءبىزدىڭ ماقساتىمىز - لايىقتى جۇمىسپەن قامتاماسىز ەتىپ, سۇرانىسقا يە ماماندىقتارعا وقىتۋ», - دەپ اتاپ ءوتتى ب.ساپارباەۆ.
اكتسيا شەڭبەرىندە مۇگەدەكتىگى بار جانداردىڭ قاتارىنداعى شەبەرلەردىڭ, سۋرەتشىلەر مەن ونەرتاپقىشتاردىڭ كورمەسى ءوتتى. ولاردىڭ ىشىندەگى ەڭ ۇلكەنى – ەكىنشى توپتاعى مۇگەدەك 89 جاستاعى حاكىم بەكمۇحامەد ءوزىنىڭ اعاشتان جاسالعان جادىگەرلەرىن كورسەتتى.
سونداي-اق, اقتوبە قالاسىنىڭ اكىمدىگى, اقتوبە قالاسىنىڭ سال اۋرۋىنا شالدىققان ازاماتتاردى قولداۋ قورى مەن اۋماقتىق كاسىپوداقتار بىرلەستىكتەرىنىڭ اراسىندا مۇگەدەكتەردىڭ قۇقىعىن قورعاۋ جونىندەگى ىنتىماقتاستىق تۋرالى مەموراندۋمعا قول قويىلدى.
قايىرىمدىلىق اكتسياسى 19 جىل قاتارىنان وتكىزىلىپ كەلەدى. ونىڭ وسى جىلعى ۇرانى – «ەڭبەك جانە جۇمىسقا ورنالاسۋ - بۇل ءاربىر قازاقستاندىق ءۇشىن ىنتالاندىرۋ».
شارانى جەرگىلىكتى بيلىك ورگاندارىنىڭ كومەگىمەن اقتوبە قالاسىنىڭ سال اۋرۋىنا شالدىققان ازاماتتاردى قولداۋ قورى ۇيىمداستىردى. اكتسياعا مەملەكەتتىك ورگانداردىڭ, قوعامدىق بىرلەستىكتەردىڭ باسشىلارى, دەپۋتاتتار, كاسىپكەرلەر, مەتسەناتتار, ەرىكتىلەر جانە ەرەكشە قاجەتتىلىكتەرى بار ازاماتتار قاتىستى.