العىس ايتۋ كۇنىن وسكەمەندىكتەر بيىل كەڭ اۋقىمدا, بىرقاتار تاعىلىمدى شارالارمەن اتاپ ءوتتى.
قالاداعى مەرەكەلىك شارالار لەگى وسكەمەننىڭ ىرگەسىندەگى احمەر اۋىلىنداعى بالالار اۋىلىنان باستالدى. وبلىس اكىمىنىڭ ورىنباسارى اسەم ءنۇسىپوۆا مەن وبلىستىق ءبىلىم باسقارماسى باسشىسىنىڭ مىندەتىن اتقارۋشى سايرانگۇل ءجۇمادىلوۆا مەيىرىم مەكەنىنە ارنايى بارىپ, اتا-انا قامقورلىعىنا ءزارۋ بۇلدىرشىندەردى مەرەكەمەن قۇتتىقتاپ, جىلى لەبىزدەرىن جەتكىزدى. ءا.ءنۇسىپوۆا مۇنداعى تاربيەلەنۋشىلەرگە سارا الپىسقىزىنىڭ قۇتتىقتاۋىن وقىپ بەرىپ, وبلىستىق ءبىلىم باسقارماسىنىڭ اتىنان مونوبلوكتى سىيعا تارتتى. بالالار اۋىلىنىڭ تاربيەلەنۋشىلەرى دە قاراپ قالماي «العىسىم شەكسىز, تۋعان ەل» اتتى كونتسەرتتىك باعدارلاماسىن ۇسىندى. بۇگىندە مۇندا 69 ءبۇلدىرشىن تاربيەلەنىپ جاتقانى بەلگىلى. ء«بىزدى ەستەن شىعارماي قامقورلىق تانىتىپ جۇرگەن ۇلكەن جۇرەكتى ازاماتتارعا العىسىمىز شەكسىز. كوڭىلى اشىق, دارحان مىنەزدى 79 مەكەمە باسشىسى بار, ولار باسقارىپ وتىرعان 105 ۇلت پەن ۇلىستىڭ وكىلدەرى جىلىنا ءبىر رەت ءبىزدىڭ بالالاردىڭ ەسەپشوتتارىنا ءبىر ايلىق ەڭبەكاقىلارىن اۋدارىپ كەلەدى. بەس جىلدىڭ ىشىندە بالالاردىڭ شوتىنا 80 ميلليون تەڭگەگە جۋىق قاراجات جينالدى, قازىر 26 ميلليون تەڭگە «تۇرعىن ءۇي-قۇرىلىس جيناق بانكتەگى» شوتتارىندا جاتىر, بولاشاقتا 23 جاسقا تولعاندا ولار باسپانالى بولادى», - دەيدى بالالار اۋىلىنىڭ ديرەكتورى امان يسلياموۆ.
مەرەكەنىڭ اجارىن كىرگىزگەن يگى شارانىڭ ءبىرى - وبلىستىق ارداگەرلەر كەڭەسىنىڭ ۇيىتقى بولۋىمەن تۇڭعىش رەت ۇيىمداستىرىلعان «اق باتا – اسىل مۇرا» اتتى بايقاۋ. دۋالى اۋىز قارتتاردىڭ ونەر دوداسىنا اۋداندار مەن قالالارداعى ىرىكتەۋ سايىسىنان ىركىلمەي وتكەن 22 باتاگوي قاريا كەلىپتى. «سىزدەردى 1 ناۋرىز - العىس ايتۋ كۇنىمەن شىن جۇرەكتەن قۇتتىقتايمىن. ءبىزدىڭ ەڭ ۇلكەن بايلىعىمىز – ەلىمىزدەگى تىنىشتىق, تۇراقتىلىق پەن بەرەكە-بىرلىك. بۇگىن تەك العىس ايتاتىن كۇن عانا ەمەس, تاريحقا كوز جۇگىرتىپ, ەلىمىزگە سىرتتان كوشىرىلىپ اكەلىنگەن حالىقتاردىڭ كورگەن قيىندىعىن, شەككەن مەحناتىن سانامىزدا ءبىر جاڭعىرتىپ, ولارعا ءبىزدىڭ اتا-بابالارىمىزدىڭ كورسەتكەن قۇرمەت, جاساعان قامقورلىقتارىن ەسكە الاتىن كۇن. بۇگىندە ءبىزدىڭ وبلىستا 14 دوستىق ءۇيى, 123 ەتنومادەني بىرلەستىك جۇمىس ىستەيدى. وڭىرىمىزدە 105 ۇلتتىڭ وكىلدەرى تاتۋ-ءتاتتى تۇرمىس كەشۋدە. ەلباسىمىزدىڭ «رۋحاني جاڭعىرۋ» باعدارلاماسى اياسىندا قازىر ءبىز جەتى ۇلكەن باعىتتا جۇمىس ىستەپ جاتىرمىز. بۇل باعدارلاما – ەلىمىزدى مەكەن ەتكەن بارلىق ەتنوستاردىڭ مادەنيەتى مەن تىلدەرىن ساقتاۋعا, داستۇرلەرىن جاڭعىرتۋعا مۇمكىندىك بەرەتىن بىرەگەي جوبا. بۇگىنگى وتكىزىلىپ وتىرعان شارا - سونىڭ دالەلى», – دەدى وبلىس اكىمىنىڭ ورىنباسارى اسەم ءنۇسىپوۆا سايىستىڭ اشىلۋ سالتاناتىندا سويلەگەن قۇتتىقتاۋ سوزىندە. ءۇش كەزەڭنەن تۇرعان بايقاۋ قورىتىندىسىندا باس بايگەنى (100 مىڭ تەڭگە) ۇلاندىق راشيتبەك مۇحامەدجانوۆ اقساقال يەلەنسە, ءبىرىنشى ورىندى جارمالىق باتاگوي مۇرات جارمۇحامەت قانجىعاسىنا بايلادى. ەكى ەكىنشى ورىندى كوكپەكتىلىك شاحان تۇرسىنحانوۆ پەن سەمەيلىك قايىمحان بەيسەنباەۆ, جۇلدەلى ءۇش ءۇشىنشى ورىندى اباي اۋدانىنان كەلگەن اقانعالي ماقاەۆ, اياگوزدىك اقاش كوكسەگەنوۆ پەن تارباعاتايلىق سەرىك بەكسايىنوۆ ءوزارا ءبولىستى.
قالاداعى دوستىق ءۇيى-قوعامدىق كەلىسىم ورتالىعىندا وڭىردەگى ەتنومادەني بىرلەستىكتەردىڭ ۇيىتقى بولۋىمەن العىس ايتۋ كۇنىنە وراي مەرەكەلىك شارا ۇيىمداستىرىلىپ, جۇرت نازارىنا كونتسەرتتىك باعدارلاما ۇسىنىلدى. شارا بارىسىندا قوعامدىق كەلىسىمدى نىعايتۋعا ۇلەس قوسىپ جۇرگەن بىرقاتار ازاماتتارعا قۇرمەت كورسەتىلىپ, العىس حاتتار تابىستالدى.
سونىمەن قاتار شاھارداعى «انا مەن بالا» ورتالىعىندا اشىق ەسىك كۇنى ۇيىمداستىرىلىپ, بىلىكتى دارىگەرلەر بولاشاق انالارعا تەگىن اقىل-كەڭەس بەردى. وسكەمەن قالاسىنىڭ اكىمى قۋات تۇماباەۆ بۇل كۇنى 10 بالانىڭ اناسى كۇليا كەنەمولدينا مەن 7 بالانىڭ اناسى ولگا رانەەۆانى مەرەكەمەن قۇتتىقتاپ, «التىن القا» بەلگىسىن سالتاناتتى تۇردە تابىس ەتتى.
ازامات قاسىم,
«ەگەمەن قازاقستان»
وسكەمەن