وسكەمەندە ە.ورىنباەۆتىڭ «قاس قاعىم ءسات» اتتى فوتوكورمەسى اشىلدى

ونەر مۋزەيى مەن «شىعىس اقپارات» مەدياحولدينگى بىرلەسە ۇيىمداستىرعان كورمەگە سانالى عۇمىرىن وبلىستىق «ديدار» گازەتىنە ارناعان ءفوتوتىلشىنىڭ 60-تان استام سۋرەتتەرى قويىلىپتى. شىعىستىڭ شىرايلى تابيعاتى, كوركەم كولدەرى, تاكاپپار تاۋلارى, شىڭ باسىندا اسىر سالعان بۇعى-مارالدارى, اڭقىلداعان ادامدارى... ايگىلى مۇستافا وزتۇرىكتىڭ وسكەمەنگە كەلگەن ءساتى, التايدىڭ كەربۇعىسى اتانعان اتاقتى جازۋشى ورالحان بوكەي, قارا ءسوزدىڭ حاس شەبەرى قاليحان ىسقاق, قاھارمان قاسىم قايسەنوۆ, ابىز اقساقال بوشاي كىتاپباەۆ, «دوستارىمداي» تۋىندىنى سىيلاعان سازگەر ورالحان كوشەروۆ... شىعىس وڭىرىندەگى قازاق ءباسپاسوزىنىڭ قارا شاڭىراعى «ديدار» گازەتىندە 60,70,80 جىلدارى قىزمەت ەتكەن تۇرعازى نۇقاي, ءمۇسىلىم قۇماربەكوۆ, سەرىك عابدۋللين, كەڭەس يۋسۋپوۆ سىندى قالامگەرلەر بەينەسى... وسىنىڭ ءبارى كورمە تورىنەن ورىن الىپتى. فوتوكورمەگە كەلگەن جۇرت دوس-جاراندارى, ارىپتەستەرى مەن زامانداستارى ەساعاڭ دەپ ەركەلەتكەن اردا ازماتتىڭ قولتاڭباسى قالعان اق-قارا, ءتۇرلى-ءتۇستى سۋرەتتەردى قىزىعا تاماشالادى. كورمەنىڭ تۇساۋكەسەرىندە وبلىستىق «ديدار» گازەتىندە 20 جىلدان استام باس رەداكتور بولعان ءجۇمادىل ادىلباەۆ, ءفوتوتىلشىنىڭ ارىپتەسى عىلىمبەك ءسابيتوۆ, «شىعىس-اقپارات» جشس ديرەكتورى يرينا ياكۋنينا ءسوز الىپ, ە.ورىنباەۆتىڭ ءوز ءىسىنىڭ شەبەرى عانا ەمەس, وتباسىنا قامقور, جولداستارىنا ادال ازامات بولعانىن تەبىرەنە ەسكە الدى. «ەساعاڭمەن 30 جىلعا جۋىق بىرگە جۇمىس ىستەدىم. 90 جىلداردىڭ ورتاسىنا تامان تەحنيكا دامىپ, فوتواپپاراتتىڭ جاڭا تۇرلەرى شىعا باستاعانى بەلگىلى. فوتوتىلشىلەر اسىرەسە وزگە ۇلت وكىلدەرى ساندىق فوتواپپاراتپەن جۇمىس ىستەي باستادى. ءبىزدىڭ ەسىمحان ەسكى ادىسپەن پلەنكاعا ءتۇسىرىپ, قاعازعا شىعارىپ ءجۇردى. ول قاعازى ءبىر كۇنى سارعايىپ, ءبىر كۇنى اعارىپ كەتەدى. كەي كۇندەرى «نەشە كۇن ءجۇرىپ تۇسىرگەن سۋرەتىڭ مىناۋ ما؟» دەپ رەنجىسىپ قالعان كەزدەرىمىز دە بولدى. سوندا ەساعاڭنىڭ: «جۇرت قاتارلى فوتواپپارات الىپ بەرە الماعان رەداكتسيالارىڭ قۇرىسىن» دەگەنى بار. سول ءسوزى قامشى بولدى دا, الماتىداعى تانىستارعا ايتىپ 4 مىڭ دوللار تۇراتىن ساندىق فوتواپپارات الدىرىپ بەردىك. ول كەزدە ءبىر «نيۆاڭىز» 3 مىڭ دوللار تۇراتىن. ودان كەيىن ءبىر جارىم جىلدان كەيىن «ەسكىردى» دەگەن سوڭ تاعى ءبىر ساندىق فوتواپپارات اپەردىك. مىنا كورمەدەگى سۋرەتتەردىڭ كوبى سول فوتواپپاراتپەن تۇسىرىلگەن بولاتىن», - دەدى ءجۇمادىل ادىلباەۆ. بەلگىلى ايتىسكەر اقىن, «شىعىس اقپارات» مەدياحولدينگى ديرەكتورىنىڭ ورىنباسارى سەرىك قۇسانباەۆ:

وسىندا وتىر كوزكورگەن,

تامىرىڭ مەنەن تانىسىڭ.

پەندەلىك تىرلىك كەشپەدىڭ,

دۇنيە ءۇشىن, مال ءۇشىن.

قۇرمەتىن كورگەن حالقىڭا,

سۋرەتى بولىپ جاڭعىردىڭ.

ەسىمحان ءولدى دەگەندە, جۇلدىزى ءسوندى دەگەندە

سەنبەيتىن ءسابي جۇرتىڭا ولمەيتىن مۇرا قالدىردىڭ, - دەپ جىرىن ارنادى.

جەر ءجانناتى جەتىسۋ وڭىرىندە دۇنيەگە كەلىپ, ءتور التايدا ماڭگىلىك تىنىس تاپقان ءفوتوتىلشىنى ەسكە الۋ ماقساتىندا تۇسىرىلگەن شاعىن فيلم دە بۇل كۇنى جينالعان جۇرتشىلىقتىڭ نازارىنا ۇسىنىلدى. فيلمدە ەساعاڭنىڭ ارىپتەستەرى - جازۋشى جۇماعازى يگىسىن, وبلىستىق «ديدار» گازەتىنىڭ باس رەداكتورى ءۋاليحان توقپاتاەۆ, ارداگەر ءفوتوتىلشى سەرگەي سۋروۆ ءوز ەستەلىكتەرىن ايتىپتى. «ول قول باسىنداي فوتواپپاراتىمەن قىزىقتى, جاقسى دۇنيەلەردى قالت جىبەرمەي, ءتۇسىرىپ الىپ, وعان فيلوسوفيالىق ءار بەرىپ, تۇرلەندىرىپ, سونى حالىقتىڭ نازارىنا ۇسىندى. ەساعاڭ سوڭىنا مول مۇرا قالدىردى. بۇگىنگى كورمە قاس قاعىم ساتتە اتقارعان قىرۋار جۇمىستارىنىڭ ءبىر كورىنىسى» دەپ پىكىرىن ءبىلدىرىپتى ج.يگىسىن. 

تاعىلىمدى شارانىڭ ۇيىمداستىرىلۋىنا ۇيىتقى بولعان بەلگىلى جۋرناليست, قالامگەر ايتمۇحامبەت قاسىموۆ تۇساۋكەسەر سوڭىندا كورمەنىڭ وتۋىنە كومەك قولىن سوزعان «KazLider» حولدينگىنىڭ باس ديرەكتورى مارات مۇزاپاروۆ پەن «كم كومپانيالار توبىنىڭ» پرەزيدەنتى قايرات مۋسينگە العىسىن ايتىپ, ەساعاڭنىڭ ومىرلىك سەرىگى ورالدى مەن بالالارىن ساحناعا شاقىرىپ, مارقۇمنىڭ پورترەتى مەن فوتو-البومىن سىيعا تارتتى.

ونەر مۋزەيىندەگى بۇل فوتوكورمە ءبىر اي بويى جۇرتشىلىق نازارىنا ۇسىنىلاتىن بولادى.

ازامات قاسىم,

«ەگەمەن قازاقستان»

وسكەمەن