بۇل تۋرالى تۇركى اكادەمياسى حالىقارالىق ۇيىمىنىڭ (TWESCO) باسشىسى دارحان قىدىرالى بۇگىن استاناداعى ورتالىق كوممۋنيكاتسيالار قىزمەتىندە وتكەن بريفينگتە ايتتى.
بەلگىلى بولعانداي, تۇركى اكادەمياسىنىڭ بيىلعى نەگىزگى باعىتتارىنىڭ ءبىرى – ورتالىق ازيا مەملەكەتتەرى بولادى.
وسى ورايدا, اكادەميانىڭ 2018 جىلعى جوسپارلارىندا وزبەكستانعا ارحەولوگيالىق ەكسپەديتسيا ۇيىمداستىرۋ بار. سونىمەن قاتار, TWESCO قازىر وزبەكستان عىلىم اكادەمياسىمەن ىنتىماقتاستىق مەموراندۋمىن بەكىتۋگە كەلىسسوزدەر جۇرگىزىپ جاتىر. ايتا كەتۋ كەرەك, اكادەميا 2017 جىلى وتكىزگەن ءىى « ۇلى دالا» گۋمانيتارلىق عىلىمدار فورۋمىنا العاش رەت وزبەكستاننان اۋقىمدى دەلەگاتسيا قاتىسقان بولاتىن.
جۋرناليستەرمەن وتكەن جيىندا سونداي-اق, كورشى قىرعىزستاندىق عالىمدارمەن كوپتەگەن ورتاق جوبالار جوسپارلانعانى بەلگىلى بولدى. 2018 جىلى ادامزاتتىڭ ايتماتوۆى اتانعان ايگىلى جازۋشى شىڭعىس ايتماتوۆتىڭ 90 جىلدىعى. تۇركى اكادەمياسى بۇل داتانى دا كەڭ كولەمدە, حالىقارالىق ءىس-شارالارمەن اتاپ وتەتىن بولادى. قازىر جازۋشىنىڭ مۇراسىنا بايلانىستى قىرعىز عالىمدارمەن بىرگە دايىندالعان ەكى تومدىق ۇلكەن مونوگرافيا باسپاعا ءازىر.
سونىمەن قاتار, بيىل قىرعىز ەلىمەن بىرگە اتاقتى ماناسشى ساعىمباي ورازباقوۆتىڭ 150 جىلدىعىنا وراي بىرقاتار حالىقارالىق ءىس-شارالار وتكىزۋ جوسپارلانعان.
مۇنىڭ سىرتىندا TWESCO-نىڭ تۇرىكمەنستان جانە تاجىكستانمەن عىلىمي ينتەگراتسيانى ارتتىرىپ, بىرلەسكەن جوبالار جۇرگىزۋدى قولعا العانى تۋرالى ايتىلدى.