قارجى مينيسترلىگىنىڭ مەملەكەتتىك كىرىستەر كوميتەتىندە اۋماقتىق مەملەكەتتىك كىرىستەر ورگاندارى باسشىلارىنىڭ قاتىسۋىمەن القا وتىرىسى ءوتتى. القا وتىرىسىندا مەملەكەتتىك كىرىستەر ورگاندارىنىڭ 2017 جىلعى قىزمەتىنىڭ ناتيجەلەرى قارالدى جانە 2018 جىلعا ماقساتتار مەن مىندەتتەر ايقىندالدى.
القا وتىرىسىندا 2018 جىلى جاڭعىرتۋ 3.0 شەڭبەرىندە «سالىقتاردىڭ جينالۋىن ۇلعايتۋ» جوباسىن جۇزەگە اسىرۋ, سالىقتىق جانە كەدەندىك اكىمشىلەندىرۋدى جاقسارتۋ, سوتقا دەيىنگى ءوندىرىستى ۇيىمداستىرۋدىڭ ساپاسىن ارتتىرۋ, مەملەكەتتىك كىرىستەر ورگاندارىنىڭ قۇقىق قورعاۋ جانە قاداعالاۋشى ورگاندارمەن, سونداي-اق بيزنەس-قوعامداستىقپەن ءوزارا ارەكەت ەتۋىنىڭ تيىمدىلىگىن كوتەرۋ ماسەلەلەرى تالقىلاندى.
نەگىزگى باياندامانى جاساعان كوميتەت توراعاسى ارداق تەڭگەباەۆ 2017 جىلى «جىلدام جەڭىستەر» ۇلگىسىندەگى بىرقاتار قىسقا مەرزىمدى ءىس-شارالار جۇزەگە اسىرىلىپ, فيسكالدىق راسىمدەردى وڭايلاتۋ ناتيجەسىندە ەكونوميكاداعى كىشى جانە ورتا بيزنەستىڭ ۇلەسى وسكەندىگىن اتاپ ءوتتى.
2017 جىل ءۇشىن ەڭبەكاقى تولەۋ قورىنىڭ 400 ملرد تەڭگەگە وسكەنى بايقالادى. ەلىمىزدەگى ورتاشا جالاقى 150 مىڭ تەڭگە دەپ العاندا, بۇل قوسىمشا 223 مىڭ جۇمىس ورنى قۇرىلعانىن بىلدىرەدى. وسىعان سايكەس جەرگىلىكتى بيۋدجەت تۇسىمدەرى 96 ملرد تەڭگەگە وسكەن ەكەن.
ارداق تەڭگەباەۆ مەملەكەتتىك قىزمەت كورسەتۋلەر جانە اكىمشىلەندىرۋ تسيفرلى فورماتقا كوشىرىلىپ جاتقاندىعىن ايتتى.
– «بيزنەس-پروتسەستەردى جەڭىلدەتۋ جانە جەدەلدەتۋ ءۇشىن قولدانىلاتىن اۆتوماتتاندىرىلعان پروتسەدۋرالاردىڭ ۇلەسى جىل سايىن ارتىپ كەلەدى. 2017 جىلدان باستاپ Egov پورتالى ارقىلى بارلىق مەملەكەتتىك ورگانداردىڭ 34 ميلليوننان استام مەملەكەتتىك قىزمەتى كورسەتىلسە, مۇنىڭ 17 ميلليونى بىزگە تيەسىلى. دەمەك قازاقستانداعى بارلىق ەلەكتروندى قىزمەتتەردىڭ 50 پايىزىن مەملەكەتتىك كىرىستەر ورگاندارى ۇسىنىپ وتىر, – دەدى ول.
جالپى العاندا 2017 جىلدىڭ قورىتىندىسى بويىنشا بيزنەس قۇرىلىمدار مەملەكەت قازىناسىن 8 812,0 ملرد تەڭگەنىڭ سالىعىمەن تولىقتىردى.
القا ماجىلىسىندە پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى ۆلاديمير جۇماقانوۆ, باس پروكۋروردىڭ ورىنباسارى ەرلىك كەنەنباەۆ جانە كوميتەتتىڭ جاۋاپتى قىزمەتكەرلەرى ءسوز الىپ, اتقارىلعان جۇمىستار مەن الدا تۇرعان مىندەتتەر تۋرالى وي ءبولىستى.
ءىس-شارا سوڭىندا مەملەكەتتىك قىزمەتتەردى كورسەتۋ قورىتىندىلارى شىعارىلىپ, ءۇش سانات بويىنشا جۇلدە بەرىلدى. نوميناتسيالار بويىنشا «رەسپۋبليكانىڭ ەڭ ۇزدىك قىزمەت كورسەتۋ ورتالىعى» دەپ الماتى قالاسىنداعى اۋەزوۆ اۋدانىنىڭ مەملەكەتتىك كىرىستەر باسقارماسى, «اۋىل نەمەسە قالادا ورنالاسقان ەڭ ۇزدىك قىزمەت كورسەتۋ ورتالىعى» دەپ شىعىس قازاقستان وبلىسى كۋرچاتوۆ قالاسىنىڭ مەملەكەتتىك كىرىستەر باسقارماسى, «رەسپۋبليكانىڭ ەڭ ۇزدىك كەدەندىك راسىمدەۋ ورتالىعى» دەپ الماتى قالاسىنىڭ «المالى-كرو» كەدەندىك بەكەتى تانىلدى.
سۇڭعات ءالىپباي, «ەگەمەن قازاقستان»