كەشە قازمەديا ورتالىعىنىڭ 5-ءشى ستۋدياسىندا «قازاقستان» رترك اق باسقارما توراعاسى ەرلان قارين ۇلتتىق ارنانىڭ كوكتەمگى تەلەۆيزيالىق ماۋسىمىمەن تانىستىرىپ, 2017 جىلدىڭ نەگىزگى جەتىستىكتەرىن اتاپ ءوتتى.
الدىمەن باسقارما توراعاسى ارنانىڭ وتكەن جىلداعى تولاعاي تابىستارى مەن جەمىستى جەتىستىكتەرىن ءسوز ەتتى. ايتالىق, قازاقتىڭ ءتول ونەرىن دارىپتەيتىن «مەن قازاقپىن» حالىقارالىق مۋزىكالىق جوباسى مەن 8 مەملەكەتتە تىكەلەي ترانسلياتسيا ارقىلى كورسەتىلگەن «SilkWayStar» مەگاجوباسى كورەرمەندەر اراسىندا جوعارى باعالانىپ, وتكەن ماۋسىمنىڭ باستى جاڭالىعى بولعاندىعىن ايتتى. سونداي-اق, 2017 جىلى «پاراسات مايدانى», «1ستۋديا», «باستى تاقىرىپ», «ماسەلە», «ەلدەن حابار» سياقتى قوعامدىق-ساياسي جانە اقپاراتتىق-ساراپتامالىق جوبالاردىڭ سانى ارتىپ, كورەرمەنگە جول تارتقان.
«وتكەن جىلى كونتەنتتى جاڭارتۋ بارىسىندا الەۋمەتتىك جوبالاردىڭ سانى ارتتى, اقپاراتتىق-ساراپتامالىق باعدارلامالاردىڭ فورماتى وزگەردى. ەڭ باستىسى, ءوزىمىزدىڭ ىشكى تەلەونىمنىڭ ۇلەسى 80 پايىزعا ءوستى, ياعني بۇل سىرتتان ساتىپ الىنباعان كونتەنت. ءبىز ءارى قاراي دا كونتەنتتى جاڭارتۋ جۇمىستارىن جالعاستىرىپ, ساپالى تۋىندىلاردىڭ سانىن ارتتىرۋعا اتسالىسامىز», دەدى ەرلان قارين.
ءماسليحاتتا ءمالىم بولعانداي, ۇلتتىق تەلەارنادا جاڭا تەلەۆيزيالىق ماۋسىم ءداستۇر بويىنشا, ناۋرىز ايىنىڭ باسىنان باستالماق. «Qazaqstan» تەلەارناسىنان بىرنەشە جاڭا جوبالار مەن تەلەحيكايالار كورەرمەنگە جول تارتپاق. الداعى ۋاقىتتا ەلىمىزدىڭ تاريحىنان سىر شەرتەتىن «الاش اقيقاتى» باعدارلاماسى مەن «بالا كوڭىلى» اتتى بالالار تاربيەسىن قوزعايتىن گۋمانيتارلىق-اعارتۋشىلىق جوبا شىعاتىن بولادى. ولاردىڭ قاتارىندا كوكتەمگى ماۋسىمنىڭ باستى تۇساۋكەسەرى ء«جۇرسىننىڭ جۇيرىكتەرى» اتتى اقىندار سايىسى دا بار.
جوعارىدا ايتىلعانداي, ۇلتتىق ارنا وزدەرىنىڭ تۇراقتى كورەرمەندەرىن جاڭا ماۋسىم اياسىندا بىرقاتار جاڭا وتاندىق تەلەحيكايالارمەن قۋانتپاق. اتاپ ايتا كەتسەك, اعىمداعى جىلدىڭ 26 ناۋرىزدا الاش زيالىلارىنىڭ حح عاسىردىڭ باسىندا تاۋەلسىزدىك جولىنداعى تاعدىرىن باياندايتىن «تار زامان» تەلەحيكاياسى ەفيرگە شىقپاق. سونىمەن بىرگە كورەرمەندەر «تۋعان جەر», «سۇيە بىلسەڭ-2», «جارالانعان جۇرەكتەر», «ىڭكار جۇرەك-3» سىندى تەلەحيكايالاردى تاماشالايتىن بولادى.
«ۇلتتىق ارنادا ءار جىلدارى كوپتەگەن تانىمال تۇلعالار, زيالى قاۋىم وكىلدەرى ەڭبەك ەتىپ, قازاق تەلەۆيزياسىنىڭ دامۋىنا ۇلكەن ۇلەسىن قوستى. ولاردىڭ اتقارعان وراسان ەڭبەكتەرىن ۇمىتپاۋ – ءبىزدىڭ پارىزىمىز. اقپاننىڭ باسىنان باستاپ, ءار جەكسەنبى سايىن ۇلتتىق ارنانىڭ «التىن قورىندا» ساقتالعان, كەزىندە كورەرمەننىڭ كوڭىلىنەن شىققان بۇرىنعى باعدارلامالاردى ەفيرگە شىعارۋدى ۇيعاردىق. سونداي-اق, ۇلتتىق ارنانىڭ «تاڭشولپان», «دارا جول», «كەلبەت» جانە باسقا دا باعدارلامالارىندا وتاندىق تەلەۆيزيا ارداگەرلەرىنىڭ قاتىسۋىمەن ارنايى شىعارىلىمدار جارىق كورەدى. مۇنىمەن قوسا, كورەرمەندەرگە توسىن سىي رەتىندە, بۇرىنعى تەلەجۋرناليستەر مەن ديكتورلار جۇرگىزۋشى بوپ ەفيرگە شىعاتىن بولادى», دەدى باسقارما توراعاسى ەرلان قارين.
ميراس اسان,
«ەگەمەن قازاقستان»