ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ اقپاراتتىق تەحنولوگيالار فاكۋلتەتىنىڭ ستۋدەنتەرى مەن ماگيسترانتتارى مەيىرحان ەسەەۆ, گالى ماحمۋد, لەسبەك شاعي, نۇرداۋلەت راحىمبەردى قازاقتىڭ ۇلتتىق «توعىزقۇمالاق» ويىنىن (PlayMarket جانە AppStore) قولجەتىمدى ءارى ءموبيلدى نۇسقادا ازىرلەدى. بۇل ۇلتتىق ويىنداردى تسيفرلاندىرۋدىڭ يدەيالىق دەم بەرۋشىسى ءارى اۆتورى – ەۇۋ رەكتورى ەرلان سىدىقوۆ. ال جوبانىڭ جەتەكشىسى اقپاراتتىق تەحنولوگيالار فاكۋلتەتىنىڭ دەكانى جانات نۇربەكوۆا.
بۇل جاعىمدى جاڭالىق ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا باياندالعان مىندەتتەردى ەلىمىزدە جۇزەگە اسىرۋعا ەۇۋ ستۋدەنتتەرى مەن ماگيسترانتتارىنىڭ قوسقان سۇبەلى ونەرتابىسى. باسقاشا ايتقاندا, ۇلتتىق مادەني قۇندىلىقتاردىڭ تانىمالدىعىن ارتتىرۋ ءۇشىن مۋلتيمەديالىق پلاتفورما قۇرۋدىڭ ناقتى قادامى.
قازىر ەۋرازيا ۇلتتىق ۋنيۆەرسيتەتىندە وسى ماقساتتا قازاق حالقىنىڭ ۇلتتىق مۇراسىن تسيفرلاندىرۋ بويىنشا تىڭعىلىقتى جۇمىستار جۇرگىزىلۋدە. ونىڭ ءبىر دالەلى – «كوپ دەڭگەيلى ويىنداردىڭ كروسس-پلاتفورماسىن جاساۋ» اتتى عىلىمي-قولدانبالى جوبانىڭ باستالۋى. ونەرتاپقىش جاستار قازىر اتالمىش جوبا شەڭبەرىندە م.اۋەزوۆتىڭ «كوكسەرەك» شىعارماسى اتاۋىمەن كومپيۋتەرلىك ويىندار: توعىزقۇمالاق جانە اسىق اتۋ جوباسىنىڭ تۇجىرىمداماسىن ازىرلەدى.
مەرەي دىلداباەۆ