توقماديگە قاتىستى سوت پروتسەسى جالعاسۋدا

ارادا تالاي جىل وتكەندە بۇرىنعى بانك باسشىسىنىڭ ولىمىنە قاتىستى قايتادان ءىس قوزعالىپ وتىر. بۇل ءىستىڭ اناۋ-مىناۋ ەمەس, اتىشۋلى مۇحتار ابليازوۆكە قاتىس­تىلىعى دا كوپتىڭ كوڭىلىن­دەگى كۇمان­دى قايتا قويۋلاتا تۇسكەن­دەي.

 ناقتى ايتساق, وسىدان ءبىراز ۋاقىت بۇرىن جامبىل وبلىسىنىڭ قىلمىس­تىق ىستەر بويىنشا مامانداندىرىلعان اۋدانارالىق سوتىندا «كازسترويستەكلو» كومپانياسىنىڭ بۇرىنعى باسشىسى, بيزنەسمەن مۇراتحان توقماديگە قاتىس­تى سوت وتىرىسى باستالعان. مۇرات­حان توقماديدى الماتى سوتى وتكەن جىلى قازان ايىندا بوپسالادى جانە زاڭسىز قارۋ ساقتادى دەپ ايىپتاپ, ءۇش جىلعا باس بوستاندىعىنان ايىرعان ەدى. مۇنىڭ الدىندا بيلىك بيزنەسمەننىڭ پروكۋرورمەن «كىناسىن مويىندايتىنى تۋرالى» پروتسەسسۋالدىق كەلىسىم جاساستى دەپ مالىمدەگەن 52 جاستاعى مۇرات­حان توقمادي وتكەن جىلى 12 ماۋسىم كۇنى الماتى قالاسىندا ارنايى قۇرى­لىم­داردىڭ وپەراتسياسى كەزىندە ۇستالىپ, قامالعان بولاتىن. تۇرمەدە وتىرعانىنا جەتى اي بولعاندا بايىرعى بيزنەسمەننىڭ ەرجان تاتىشەۆتىڭ ولىمىنە تىكەلەي قاتىسى بار ەكەنى انىقتالىپ, قايتادان سوت پروتسەسى باستالدى.

 جامبىل وبلىسىندا ءوتىپ جاتقان سوت وتىرىسى كەزىندە پروكۋرور ايىپتاۋ اكتىسىن وقىعان سوڭ سۋديا ازامات تىلەپوۆ مۇراتحان توقماديدەن ەرجان تاتىشەۆتىڭ ولىمىنە قاتىسى بار ەكەنى تۋرالى سۇراعاندا, بيزنەسمەن بانكيردى ولتىرگەنىن مويىنداعان. بىراق ونىڭ نە سەبەپتى بانكيردى ولتىرگەنىن وسى ۋاقىتقا دەيىن ايتپاي, ەندى ايتىپ وتىرعانى كوپشىلىك ءۇشىن تۇسىنىكسىز جاعداي. «شىنى كورولى» دەگەن اتقا يە بولعان توقمادي جامبىل وبلىسىنىڭ وتار جازىعىندا اڭ اۋلاپ ءجۇرىپ ماشينا ىشىندە ونىڭ قولىنداعى قارۋدان وق ەرجان تاتىشەۆتىڭ باسىنا ابايسىزدا ءتيىپ كەتتى دەپ تە اقتالعانى ەل ەسىندە. بىراق ارادا تالاي جىل وتكەندە بارىپ قانا تاتىشەۆتى ولتىرگەنىن مو­يىنداپ وتىرعان توقمادي سول كەزدە وسى قىلمىسى ءۇشىن ءبىر جىلعا عانا سوتتالىپ, ءتىپتى كەيىن راقىمشىلىققا ءىلىنىپ, بوستاندىققا دا شىققان. سونىمەن بۇل ءىس جابىلىپ, ەرجان تاتىشەۆتىڭ قاساقانا ەمەس, ابايسىزدا ءولىم قۇشقانى تۋرالى قورىتىندى شىعارىلعان.

جوعارىدا ايتقانىمىزداي, مۇرات­حان توقماديگە «الدىن الا ءسوز بايلاسۋ ارقىلى ادامدار توبى جاساعان, پايدا تابۋ ماقساتىمەن, سول سياقتى جالدانىپ نە قاراقشىلىقپەن, قورقىتىپ الۋ­شىلىقپەن نە بانديتيزممەن ۇشتاسقان ادام ءولتىرۋ» ايىبى تاعىلعان ەدى.

كوپشىلىكتىڭ ەسىندە بولسا, وتكەن جىلى قازان ايىندا كتك تەلەارناسىنان توقماديگە قاتىستى دەرەكتى فيلم كورسەتىلگەن بولاتىن. وندا مۇراتحان توقمادي «تۇرانالەم» بانكىنىڭ بۇرىنعى باسشىسى ەرجان تاتىشەۆتى «اڭعا شىققان كەزىندە قاساقانا اتىپ ولتىرگەنىن», ال وعان تاپسىرىستى «بانكير مۇحتار ءابليازوۆ بەرگەنىن» مالىمدەگەن ەدى. ءتىپتى 2004 جىلى ەرجان تاتىشەۆكە ءوزىنىڭ حابارلاسىپ, اڭ اۋلاۋعا ۇسىنىس جاساعانى دا ايتىلعان. ونىڭ بۇل مويىنداۋى نەگىز­سىز دە ەمەس سياقتى.

ءباسپاسوز بەتتەرىندە جاريالانعان «تۇرانالەم» بانكى ديرەكتورلار كەڭەسىنىڭ بۇرىنعى توراعاسى سەرىك ۋاليەۆ ماسەلەنىڭ ءبارى بۇرىن بىرگە جۇمىس ىستەگەن ءابليازوۆ پەن تاتىشەۆ اراسىنداعى ارازدىقتان شىققانىن ايتقانى بار. ياعني تاتىشەۆتى جۇرتتىڭ «قارجى ءىسىنىڭ گەنيى» دەپ اتاۋى ابليازوۆقا ۇناماعان. سونىمەن قاتار اتالعان بانكتىڭ ديرەكتورلار كەڭەسىنىڭ بۇرىنعى مۇشەسى جاقسىلىق جارىمبەتوۆتىڭ دە «مۇحتار ءوزىن ەرجان لاقتىرىپ كەتتى دەپ ءبىلىپ, وسى سەبەپتى ونى جەك كوردى. مۇنى ول اشىق ايتاتىن» دەگەن پىكىرى دە ءباسپاسوز بەتتەرىندە جاريالانعان. كەيىننەن اراعا جىلدار سالىپ «بتا» بانكىنىڭ باسشىسى قىزمەتىن اتقارعان مۇحتار ءابليازوۆ ميلليونداعان قارجىنى شەتەل اسىرىپ جىبەرگەنى ءۇشىن قارجى جىمقىرۋ بابىمەن ايىپتالعانى دا بەلگىلى.

«شىنى كورولى» دەگەن اتقا يە بولعان بايىرعى بيزنەسمەن شىنىن اي­تىپ وتىر ما, جوق پا, بۇل اراسىن جامبىل وبلىسىندا ءوتىپ جاتقان سوت بارىسى انىقتايتىن بولادى.  قالىڭ كوپشىلىك بەلگىلى بانكير ەرجان تاتىشەۆتىڭ ولىمىنە شىن مانىندە كىم جاۋاپتى ەكەنىن جاريالايتىن كۇن دە الىس ەمەس سياقتى.

حاميت ەسامان,

«ەگەمەن قازاقستان» 

جامبىل وبلىسى