قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا ەلشىلەردەن سەنىم گراموتالارىن قابىلدادى, دەپ حابارلادى akorda.kz.
مەملەكەتتىك حاتشىعا فيليپپين رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى كارلوس د.سوررەتا, چاد رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى مباتنا باندجانگ, ەكۆادور رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى حۋليو پرادو ەسپينوزا, ەكۆاتورلىق گۆينەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى حوسە ەسونو ميچا اكەنگ, نەپال فەدەراتيۆتىك دەموكراتيالىق رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى ريشي رام گحيميرە, ارگەنتينا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى ريكاردو ەرنەستو لاگوريو, مەكسيكا قۇراما شتاتتارىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى بەرناردو كوردوۆا تەللو, يەمەن رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مىندەتىن قوسا اتقارۋشى موحاممەد موتاحار الاشابي سەنىم گراموتالارىن تاپسىردى.
فيليپپين ەلشىسىمەن اڭگىمە بارىسىندا گۇلشارا ابدىقالىقوۆا قازىرگى كەزدە قازاقستان تەرروريزمنەن ازات الەمگە قول جەتكىزۋ ءۇشىن مىنەز-ق ۇلىق كودەكسىن قابىلداۋ جونىندەگى پرەزيدەنت باستاماسىن ىلگەرىلەتۋ جۇمىسىن جۇرگىزىپ جاتقانىن ايتتى.
مەملەكەتتىك حاتشى چاد ەلشىسىمەن كەزدەسۋدە ساحەل بەستىك توبىنىڭ قىزمەتىن تەرروريزممەن كۇرەس جۇرگىزۋدىڭ ماڭىزدى تەتىگى رەتىندە اتاپ ءوتتى.
– قازاقستان الدىنا الەمدەگى وزىق دامىعان 30 ەلدىڭ قاتارىنا قوسىلۋ مىندەتىن قويىپ وتىر. ءبىز تەحنولوگيالاردى ترانسفەرتتەۋ جانە شەتەلدىك سەرىكتەستەرىمىزدى ەلىمىزدەگى يننوۆاتسيالىق جاڭارۋلار ىسىنە تارتۋعا مۇددەلىمىز, – دەدى گ.ابدىقالىقوۆا ەكۆادور ەلشىسىمەن كەزدەسۋدە.
ەكۆاتورلىق گۆينەيا ەلشىسىمەن كەزدەسۋ بارىسىندا گۇلشارا ابدىقالىقوۆا بۇل ەلدىڭ بۇۇ قاۋىپسىزدىك كەڭەسىنىڭ 2018-2019 جىلدارداعى تۇراقتى ەمەس مۇشەسى بولىپ سايلانۋىمەن قۇتتىقتادى. مەملەكەتتىك حاتشى حالىقارالىق تەرروريزممەن جانە زورلىق-زومبىلىق سيپاتىنداعى ەكسترەميزممەن كۇرەس جۇرگىزۋ باسىم باعىتتىڭ ءبىرى ەكەنىن اتاپ ءوتتى.
– اۋىل شارۋاشىلىعى, حيميا ونەركاسىبى, تۋريزم, بانك ءىسى, كومىرسۋتەك شيكىزاتىن ءوندىرۋ جانە تاسىمالداۋ ىنتىماقتاستىقتىڭ پەرسپەكتيۆالى باعىتتارى بولىپ سانالادى, – دەدى مەملەكەتتىك حاتشى نەپال ەلشىسىمەن اڭگىمەلەسۋ كەزىندە.
ارگەنتينا ەلشىسىمەن كەزدەسۋدە گ.ابدىقالىقوۆا بۋەنوس-ايرەس قالاسىنىڭ 2023 جىلى ەكسپو كورمەسىن وتكىزۋ قۇقىعىن جەڭىپ الۋىمەن قۇتتىقتادى. بيىلعى جولداۋدا مەملەكەت باسشىسى قازاقستاننىڭ ءتورتىنشى ونەركاسىپتىك رەۆوليۋتسيا جاعدايىندا ودان ءارى دامۋى جونىندەگى مىندەتتەردى ايقىنداپ بەرگەن ەدى. وسى ورايدا مەملەكەتتىك حاتشى يننوۆاتسيالار مەن تسيفرلىق تەحنولوگيالار سالاسىنداعى ىنتىماقتاستىقتى دامىتۋدىڭ كەلەشەگى زور ەكەنىن اتاپ ءوتتى.
– امەريكا ەلدەرى اراسىندا مەكسيكا ماڭىزدى سەرىكتەسىمىزدىڭ ءبىرى بولىپ سانالادى, – دەدى گۇلشارا ابدىقالىقوۆا وسى ەلدىڭ ەلشىسىمەن اڭگىمەلەسۋ بارىسىندا.
مەملەكەتتىك حاتشى ەكسپو-2017 الاڭىنداعى «استانا» حالىقارالىق قارجى ورتالىعى, «جاسىل» تەحنولوگيالاردى دامىتۋ جونىندەگى حالىقارالىق ورتالىق جانە بۇۇ قولداۋىمەن جۇزەگە اسىرىلاتىن ينۆەستيتسيالىق جوبالار, IT-ستارتاپتاردىڭ حالىقارالىق تەحنوپاركى جوبالارى بويىنشا ىنتىماقتاسۋعا شاقىردى.
يەمەن ەلشىسىمەن كەزدەسۋ كەزىندە مەملەكەتتىك حاتشى بەيبىتسۇيگىش مەملەكەت رەتىندە قازاقستان اسكەري ستسەناريدىڭ ورىستەگەنىن قۇپتامايتىنىن ايتتى. ءبىزدىڭ ەل اۋماقتىق تۇتاستىقتى, ەگەمەندىكتى جانە زاڭدى تۇردە سايلانعان بيلىكتى قۇرمەتتەۋ قاعيداتتارىن قولدايتىنىن اتاپ ءوتتى.
ءراسىم سوڭىندا مەملەكەتتىك حاتشى گۇلشارا ابدىقالىقوۆا ەلشىلەردى قازاقستانداعى ديپلوماتيالىق قىزمەتتەرىنىڭ باستالۋىمەن قۇتتىقتاپ, تابىس تىلەدى.