قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەدي ۇلى اتىراۋ وبلىستىق ماحامبەت اتىنداعى قازاق دراما تەاترىنا «اكادەميالىق» مارتەبە بەرۋ تۋرالى رەسمي قۇجاتتى تابىستادى.
ۇكىمەتتىڭ قاۋلىسىمەن 80 جىلدىق تاريحى بار ماحامبەت اتىنداعى قازاق دراما تەاترىنا «اكادەميالىق» مارتەبە بەرىلدى. وسى جوعارى دارەجەلى مارتەبەنى مادەنيەت جانە سپورت ءمينيسترى ارىستانبەك مۇحامەدي ۇلى اتىراۋ وبلىسىنا ساپارى بارىسىندا وڭىردەگى مادەنيەت جانە سپورت سالاسى قىزمەتكەرلەرىمەن كەزدەسۋى كەزىندە سالتاناتتى تۇردە تابىس ەتتى.
ۆەدومستۆا باسشىسى اتىراۋ وبلىسى مادەنيەت, ونەر جانە سپورت سالاسىندا الدىڭعى قاتاردا كەلە جاتقان وبلىستاردىڭ ءبىرى ەكەندىگىنە توقتالدى.
– «اكادەميالىق» مارتەبەسى ءوز سالاسىندا جەتەكشى بولىپ تابىلاتىن, قازاقستان رەسپۋبليكاسىنىڭ ۇلتتىق مادەنيەتى مەن ونەرىن قالىپتاستىرۋعا, دامىتۋعا جانە ناسيحاتتاۋعا ەلەۋلى ۇلەس قوسقان مەملەكەتتىك مادەنيەت ۇيىمدارىنا, جەكەلەگەن كاسىبي كوركەم جانە شىعارماشىلىق ۇجىمدارعا بەرىلەدى. بۇل مارتەبە – ەڭ جوعارعى ماراپات بولىپ تابىلادى, – دەگەن مينيستر «وبلىستىق ماحامبەت اتىنداعى قازاق دراما تەاترى» كوممۋنالدىق مەملەكەتتىك قازىنالىق كاسىپورنىنا «اكادەميالىق» مارتەبە بەرۋ تۋرالى پرەمەر-ءمينيستردىڭ ارنايى قاۋلىسىن وقىپ بەردى.
جاڭا مارتەبەنى بەرۋ تۋرالى رەسمي قۇجاتتى وبلىس اكىمى نۇرلان نوعاەۆ پەن تەاتر باسشىسى بەرەك دجامەنوۆكە مينيستر ارىستانبەك مۇحامەدي ۇلى جانە الاشتىڭ ابىزى اتانعان كسرو حالىق ءارتىسى, مەملەكەتتىك سىيلىقتىڭ يەگەرى, قازاقستاننىڭ ەڭبەك ەرى ءاسانالى ءاشىموۆ سالتاناتتى تۇردە ۇسىندى.
– وسى زور مارتەبەنى قابىلداي وتىرىپ, جوعارى دارەجەلى اتاققا لايىق بولۋعا انت ەتەمىز, – دەدى تەاتردىڭ ديرەكتورى بەرىك كەلەكەش ۇلى.
– ەندى ماحامبەت اتىنداعى قازاق دراما تەاترىنىڭ دارەجەسى مۇحتار اۋەزوۆ اتىنداعى تەاترمەن تەڭدەستى. بۇل قۋانىشتى كەشە عانا ارامىزدان وتكەن جازۋشى راقىمجان كورسە, جۇرەگى جارىلىپ قۋانار ەدى, – دەدى حالىق ءارتىسى ءاسانالى ءاشىموۆ ءوز كەزەگىندە.