پرەزيدەنتتىڭ جارلىعىمەن بەكىتىلگەن جاڭا ءالىپبيدى قولدايمىن. كورىنىسى بۇرىنعىدان دۇرىس, ويتكەنى مۇندا بۇرىنعىداي اپوستروفتار جوق. جانە «يدەالنىي» ءالىپبي جاساۋ مۇمكىن ەمەس. قانشاما ادام بولسا, سونشاما پىكىر بار. ءالىپبي قابىلدانۋى ءتيىس. سوزدەن ىسكە كوشۋ قاجەت. ابدەن توسەلىپ كەتكەنشە بىرەۋگە ۇناپ, بىرەۋگە ۇناماۋى زاڭدىلىق. كەسەك-كەسەك كەرەعار كوزقاراستار لەگى بىردەن تاۋسىلمايدى. ويتكەنى ءالىپبي اۋىستىرۋ وڭاي اتقارىلا سالاتىن شارۋا ەمەس. بۇل – ءداۋىرلى وزگەرىس!
ەندىگى جەردە بوس داۋ-دامايدى توقتاتىپ, تەزىرەك لاتىن گرافيكاسىنا كوشەتىن كۇن كەلدى. ۋاقىت دەگەن زىمىراپ زۋلاپ بارادى. تاعى دا ايتامىز, سوزدەن ىسكە اۋىساتىن كەزەڭ كەلىپ جەتتى. ەندى ونى قايتا-قايتا وزگەرتە بەرسەك, وزگەلەردىڭ كەلەمەج-كۇلكىسىنە قالاتىن ءتۇرىمىز بار.
مەن وتكەن جولعى نۇسقاسىن دا قولداعانمىن. الدىڭعى نۇسقاسى دا حالقىمىزدىڭ بۇل ىسكە اسا مۇددەلى ەكەنىن كورسەتىپ بەردى. ەشكىم بۇل باستاماعا بەيجاي قارامايتىنىن بىلدىك. حالىق بۇل ۇلى باستامانى ءوزى جارنامالادى. سەبەبى ءالىپبي اۋىستىرۋ ءالى تۋماعان ءسابيدى ايتپاعاندا, ماڭگىلىك كەلەشەكتىڭ دە ماسەلەسى بولىپ تۇر. سوندىقتان وسى نۇسقاسىن ناقتى قولدانىپ, تەزىرەك تاجىريبەگە ەنگىزۋ قاجەت.
دەگەنمەن ءبىر اپوستروفتىڭ ورنىنا نەگىزگى لاتىن ءالىپبيىنىڭ بازاسىندا قولدانىلماي قالعان ءۇش ءارىپ بار. سونىڭ ءبىرىن الۋعا دا بولاتىن ەدى. بىراق ءارتۇرلى نۇسقالاردى قۇرا بەرۋگە بولادى. مەنىڭشە وسى نۇسقاسى كوڭىلگە قونادى. لاتىن الىپبيىنە اۋىسۋ ءالى دە قايتا-قايتا قۇبىلا بەرەدى دەگەن پىكىر قالىپتاسپاۋى ءۇشىن وسى نۇسقاسىنا توقتاعان دۇرىس.
ەندى ونى اۋىستىرا بەرسەك, پىكىر الا-قۇلالىعى جالعاسا بەرەدى.
ەڭ سوڭىنداعى ش مەن چ دەگەن ەكى ءارىپ بار. چ ارپىندە داۋ جوق. ال ش دەگەن ءارپىن الساق, «اسحانا» قالاي وقىلادى؟ «اشانا» دەپ وقىلادى. اسحات, اۋەسحان, ىلەسحان دەگەن اتتار قالاي جازىلادى؟ دەمەك, بۇل جەردە گرامماتيكا سالاسىنداعى عالىمدارىمىز وسىنىڭ وقۋ ءتارتىبىن جونگە سالىپ, اراجىگىن انىقتاپ بەرگەنى ءجون. وسىنداي كىلتيپانى بار تۇستاردى ماماندارمەن تولىعىمەن شەشىپ الساق, وندا جاڭا الىپبيگە تەز بەيىمدەلىپ الۋعا بولادى. ياعني عالىمدار قابىلدانعان ءالىپبيدىڭ وقىلۋ, جازىلۋ ەرەجەسىن جاساپ بەرۋى كەرەك. ءتىل ماماندارى وسى ماسەلەلەردى تۇسىنىكتى ەتىپ جىكتەپ بەرسە قۇبا-قۇپ.
ماسەلەن ش ءارپى قاي كەزدە ش, قاي كەزدە س بولىپ وقىتىلۋى كەرەك دەگەندەي. سول سياقتى 11-ءشى I دەگەن ءارىپ بار. ول لاتىن الىپبيىندەگى كومپيۋتەردە جوق. ونى باسقا قوسىمشا جاقتان الۋعا تۋرا كەلەدى. نەگىزىنەن لاتىن گرافيكاسىنىڭ ءۇش قورى بار. ءبىرىنشىسى 26 ارىپتەن تۇرادى. ەكىنشى جانە ءۇشىنشى قورىندا 30 شاقتى ارىپتەن بار. جاڭا الىپبيدەگى ي بولىپ وقىلاتىن 11-ءشى ءارپىمىز تۇرىكتەردە ى دەپ وقىلادى. ول ءارىپ تۇركى الەمىنە جات ەمەس. ونى قويۋعا بولادى. بىراق قازاقستاننىڭ كلاۆياتۋراسى اعىلشىن كلاۆياتۋراسىنىڭ ستاندارتىنا كەلمەيتىن بولىپ تۇر. سوندىقتان جۇمىس جالعاسۋى ءتيىس. ايتپەسە اركىمنىڭ ءوز پىكىرى بار. جۇرە بەرەتىن ءتۇرىمىز بار. الايدا كۇيىپ-جانىپ, قيراتىلىپ بارا جاتقان ەشتەڭە جوق. وزگەرىستەر وزدىگىنەن جۇرمەيدى. ءالىپبيدى اۋىستىرۋ وڭاي دەپ كىم ايتتى. مىنا ىرگەمىزدەگى وزبەك حالقى قانشاما جۇمىس ىستەدى, قانشاما ءجۇردى.
جاڭا ءالىپبيدى ستاندارتتى كومپيۋتەردە وتىرىپ قولدانساق, اسا قيىندىق تۋعىزبايدى. ەلباسىنىڭ جارلىعىمەن قابىلدانىپ وتىرعان بۇل نۇسقانىڭ ارتىقشىلىعى دا وسى جەردە. ءو, ع ارىپتەرىن و, گ ارىپتەرىمەن بەرە بەرۋگە بولادى. تۇسىنبەي قالاتىن تۇگى جوق. ويتكەنى ستاندارتتى كومپيۋتەردە 26 ءارىپ بار. ءبىز وسىنىڭ اياسىنان شىعىپ كەتتىك. اپوستروفتارمەن جازىلاتىن 7 ءارىپ پايدا بولدى. ولاردى لاتىن ءالىپبيىنىڭ ەكىنشى جانە ءۇشىنشى بازالارىنان الۋعا تۋرا كەلىپ تۇر. وسىنى ستاندارتتى كومپيۋتەرگە قوسىمشا ەنگىزۋدى قاراستىرۋ كەرەك.
مۇرات جۇرىنوۆ, ۇلتتىق عىلىم اكادەمياسىنىڭ پرەزيدەنتى, اكادەميك
الماتى