ەلىمىزدەگى بىرقاتار وڭىرىندەگى 160 ەلدى مەكەندى ەرىگەن قار سۋىنىڭ باسۋ قاۋپى بار. بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ىشكى ىستەر ءمينيسترى قالمۇحانبەت قاسىموۆ ايتتى, دەپ حابارلايدى قازاقپارات.
«ناقتى جۇمىستار جۇرگىزىلگەنىمەن وڭىرلەر كوكتەمگى سۋ تاسقىنىنا تولىقتاي دايىن دەپ ايتۋعا كەلمەيدى. شەشۋدى قاجەت ەتەتىن بىرقاتار پروبلەمالى ماسەلە بار. ءبىرىنشىسى, سۋ قويمالارىنىڭ بارلىعى بىردەي تاسقىن سۋدى قابىلداۋعا دايىن ەمەس. ماسەلەن, سۋ كودەكسىنە سايكەس سۋ شارۋاشىلىعى ۇيىمدارى سۋدىڭ زياندى اسەرىنەن ەلدى مەكەندەردى, ونەركاسىپتىك نىسانداردى, اۋىل شارۋاشىلىعى جەرلەرىن قورعاۋدى جوسپارلاپ, ەسكەرتۋ شارالارىن جۇرگىزۋى ءتيىس. دەگەنمەن, مۇنى جەرگىلىكتى جەرلەردە جاساپ وتىرعان جوق», - دەدى قالمۇحانبەت قاسىموۆ.
ماسەلەن, ونىڭ دەرەگىنشە, اقتوبە وبلىسىندا گيدروتەحنيكالىق قۇرىلعىلار بويىنشا ەسكەرتۋ جوسپارى ازىرلەنبەگەن. اقمولا وبلىسىندا الدىن الۋ شارالارى رەسپۋبليكالىق مەنشىكتەگى 15 گيدروتەحنيكالىق قۇرىلعىلاردا عانا جوسپارلانعان. ال كوممۋنالدىق مەنشىكتەگى 68 نىسانعا قاتىستى ەش جوسپار جوق. ءدال وسىنداي جاعداي سولتۇستىك قازاقستان وبلىسىندا دا ورىن الۋدا. كوممۋنالدىق مەنشىكتەگى 17 گيدروتەحنيكالىق قۇرىلعىنى قورعاۋ شارالارى ۇيىمداستىرىلماعان.
«قازىردىڭ وزىندە قاراعاندى وبلىسىنداعى سامارقاند پەن ىنتىماق سۋ قويمالارىندا جيناقتالعان سۋدىڭ كولەمى 2017 جىلعى كورسەتكىشتەن اسىپ تۇسەدى. قار كۇرت ەرىپ, سۋ قارقىندى كەلە باستاعان جاعدايدا سۋدى اپاتتى جاعدايدا اعىزۋعا تۋرا كەلەدى. ال بۇل وزەنىڭ تومەنگى ساعاسىندا ورنالاسقان 44 ەلدى مەكەندى سۋ استىندا قالدىرۋ قاۋپىن تۋدىرادى», - دەدى ول.
ءمينيستردىڭ اتاپ وتۋىنشە, ەكىنشىدەن, ەلدى مەكەندەردى دالانىڭ ەرىگەن قار سۋىنان قورعاۋدا دا ماسەلەلەر بار.
«تەك سوڭعى جىلدا عانا ەرىگەن قار سۋىنان 57 ەلدى مەكەن زارداپ شەكتى. قازىرگى ۋاقىتتا اقمولا, الماتى, شىعىس قازاقستان, باتىس قازاقستان, قاراعاندى, پاۆلودار, سولتۇستىك قازاقستان وبلىستارىنداعى 160 ەلدى مەكەندى ەرىگەن قار سۋىنىڭ باسۋ قاۋپى ساقتالىپ وتىر. جەرگىلىكتى اتقارۋشى ورگاندار بۇل پروبلەمانى شەشۋ ءۇشىن كەشەندى شارالار قاراستىرۋى ءتيىس», - دەدى قاسىموۆ.