قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ مەملەكەت باسشىسىنىڭ تاپسىرماسى بويىنشا ميۋنحەن قاۋىپسىزدىك كونفەرەنتسياسىنا قاتىستى, دەپ حابارلادى پارلامەنت سەناتىنىڭ ءباسپاسوز قىزمەتى.
16-18 اقپاندا وتكەن فورۋمعا الەمدىك دەڭگەيدەگى ساياساتكەرلەر مەن قوعام قايراتكەرلەرى قاتىسىپ, حالىقارالىق قاۋىپسىزدىكتىڭ ماڭىزدى ماسەلەلەرىن تالقىلادى. جەكەلەگەن سەسسيالار ەۋروپا وداعىنىڭ رەسەي جانە اقش-پەن ءوزارا ءىس-قيمىلىنا, تاياۋ شىعىس پەن كورەي تۇبەگىندەگى شيەلەنىستەردى رەتتەۋگە ارنالدى. كيبەرقاۋىپسىزدىك, ەنەرگەتيكا جانە ازىق-ت ۇلىك قاۋىپسىزدىگىنىڭ وزەكتى ماسەلەلەرى, اركتيكاداعى جاعداي جونىندە تاقىرىپتىق دوڭگەلەك ۇستەلدەر بولدى.
كونفەرەنتسيادا مەملەكەتتەر مەن ۇكىمەتتەردىڭ باسشىلارى, پارلامەنتتەردىڭ توراعالارى مەن حالىقارالىق ۇيىمداردىڭ جەتەكشىلەرى, ىقپالدى قوعام قايراتكەرلەرى مەن تالداۋ ورتالىقتارىنىڭ وكىلدەرى ءسوز سويلەدى. شاراعا بارلىعى 500-دەن استام ادام قاتىستى.
ق.توقاەۆ فورۋم اياسىندا بىرقاتار كەزدەسۋلەر وتكىزدى. سەنات توراعاسىنىڭ بۇۇ قورشاعان ورتا جونىندەگى باعدارلاماسىنىڭ اتقارۋشى ديرەكتورى ەريك سولحەيممەن كەزدەسۋىندە قازاقستاننىڭ بۇۇ قۇرىلىمدارىمەن ءوزارا ءىس-قيمىل ماسەلەلەرى تالقىلاندى.
ق.توقاەۆ يادرولىق قارۋدى جويۋ جونىندەگى حالىقارالىق كامپانيانىڭ (ICAN) اتقارۋشى ديرەكتورى بەاتريس ءفيندى ۇيىمعا نوبەل بەيبىتشىلىك سىيلىعىنىڭ تابىس ەتىلۋىمەن قۇتتىقتادى. ب.فين قازاقستاننىڭ جاپپاي قىرىپ-جويۋ قارۋىنان ازات الەم قۇرۋداعى ۇلەسىن جوعارى باعالادى, سونداي-اق قارۋسىزداندىرۋ سالاسىنداعى حالىقارالىق باعدارلامانى ىسكە اسىرۋعا ءوزارا ءىس-قيمىل قاجەتتىگىن اتاپ ءوتتى.
Schaeffler AG كونتسەرنى بايقاۋشىلار كەڭەسىنىڭ توراعاسى گەورگ شاففلەرمەن جانە Schaeffler AG-تىڭ ورتالىق جانە شىعىس ەۋروپا, تاياۋ شىعىس جانە افريكا بويىنشا اتقارۋشى باس ديرەكتورى راينەر ليندنەرمەن تەحنولوگيالىق جانە ينۆەستيتسيالىق ىنتىماقتاستىقتىڭ كەلەشەگى تۋرالى اڭگىمە ءوربىدى. سەنات توراعاسى ەكونوميكانى تەحنولوگيالىق تۇرعىدا جەدەل جاڭعىرتۋ قازاقستانداعى كەشەندى رەفورمانىڭ ماڭىزدى قۇرامى ەكەنىنە نازار اۋدارا كەلىپ, نەمىس بيزنەسىن ءبىزدىڭ ەلىمىزدىڭ اۋماعىنداعى بىرقاتار ءىرى جوبالاردى ىسكە اسىرۋعا قاتىسۋعا شاقىردى.