سىرتقى ىستەر ءمينيسترى قايرات ءابدىراحمانوۆتىڭ ەلىمىزدە اككرەديتتەلگەن ەۋروپالىق وداققا مۇشە مەملەكەتتەردىڭ ديپلوماتيالىق ميسسيالارىنىڭ باسشىلارىمەن وتكىزگەن جۇمىس كەزدەسۋى بارىسىندا قازاقستان مەن ەۋروپالىق وداق اراسىنداعى ىنتىماقتاستىقتىڭ نەگىزگى قورىتىندىلارى, سونداي-اق اعىمداعى جىلعا ارنالعان جوسپارلار تالقىلاندى.
سىرتقى ساياسات ۆەدومستۆوسى باسشىسىنىڭ ەو ەلدەرىنىڭ ەلشىلەرىمەن كەزەكتى جۇمىس كەزدەسۋىنىڭ كۇن ءتارتىبى ەكىجاقتى جانە كوپجاقتى ىنتىماقتاستىقتىڭ اۋقىمدى ماسەلەلەرىن قامتىدى.
مينيستر ءوز سوزىندە ەۋروپالىق وداق ەلدەرىنىڭ بەلسەندى قاتىسۋلارىمەن وتكەن, وتكەن جىلدىڭ باستى وقيعالارىنىڭ ءبىرى حالىقارالىق ماماندىرىلعان «ەكسپو-2017» كورمەسىنىڭ قورىتىندىلارىنا ەگجەي-تەگجەيلى توقتادى. الداعى كەزەڭنىڭ نەگىزگى مىندەتى رەتىندە EXPO مۇراسىن ساقتاپ قالۋ قاجەتتىلىگىن اتاپ ايتتى. بۇل تۇرعىدا, مينيستر ەۋروپالىق ديپلوماتتارعا «استانا» حالىقارالىق قارجى ورتالىعىنىڭ, «بولاشاق ەنەرگياسى» حالىقارالىق ورتالىعىنىڭ جانە IT-ستارتاپتار حالىقارالىق پاركىنىڭ بولاشاق قىزمەتتەرى تۋرالى ايتىپ بەردى.
شەت ەلدەردىڭ رەسمي وكىلدەرى مەن ىسكەرلىك توپتارىمەن ارىپتەستىك ورناتۋ ءۇشىن تۋىندايتىن جاڭا مۇمكىندىكتەردى ەسكەرە وتىرىپ, ق. ءابدىراحمانوۆ ەۋروپالىق سەرىكتەستەردى وسى جاڭا پلاتفورمالار نەگىزىندە ىنتىماقتاستىق ورناتۋعا شاقىردى.
كەزدەسۋ قاتىسۋشىلارى قازاقستاننىڭ بۇۇ قاۋىپسىزدىك كەڭەسىندەگى توراعالىعىنىڭ قورىتىندىلارىن تالقىلاپ, ونىڭ باستى ءىس-شارالارى رەتىندە مەملەكەت باسشىسى نۇرسۇلتان نازارباەۆتىڭ توراعالىعىمەن وتكەن جاپپاي قىرىپ-جويۋ قارۋىن تاراتپاۋ سالاسىنداعى سەنىم شارالارىن نىعايتۋ بويىنشا جوعارى دەڭگەيدەگى تاقىرىپتىق بريفينگتى, سونداي-اق اۋعانستان مەن ورتالىق ازيا تاقىرىبى بويىنشا مينيسترلىك پىكىرتالاستى اتاپ ءوتتى. ديپلوماتتار اتالعان ءىس-شارالاردىڭ قورىتىندىلارى بويىنشا قابىلدانعان بۇۇ قاۋىپسىزدىك كەڭەسى توراعالىعىنىڭ مالىمدەمەلەرى وسى بەدەلدى قۇرىلىمداعا قازاقستان توراعالىعىنىڭ تابىستى وتۋىنە زور ىقپال جاساعانىن اتاپ ايتتى.
ەلىمىزدىڭ وتكەن جىلداعى سىرتقى ساياساتىنىڭ باسقا دا جەتىستىكتەرى قاتارىندا «استانا ۇدەرىسى» اياسىندا سيريا داعدارىسىن رەتتەۋگە باعىتتالعان كەلىسسوزدەردىڭ جالعاسۋى جانە 2017 جىلعى تامىزدا وتكەن اتوم ەنەرگەتيكاسى جونىندەگى حالىقارالىق اگەنتتىگىنىڭ تومەن بايىتىلعان ۋران بانكىنىڭ اشىلۋى تۋرالى ءسوز قوزعالدى.
جالپى, ەۋروپالىق ديپلوماتتار قازاقستاندا جانە شەتەلدە وتكىزىلگەن ءىس-شارالار جوعارى دەڭگەيدە ۇيىمداستىرىلعانىن ايتا كەلە, ولاردىڭ ناتيجەلەرى ەل الدىندا ودان دا بيىك ماقساتتار قوياتىنىنا نازار اۋداردى.
مينيستر 2018 جىلى سىرتقى ساياساتتىڭ باسىمدىقتارى رەتىندە ەلىمىزدىڭ بۇۇ قاۋىپسىزدىك كەڭەسىنە مۇشەلىگىن لايىقتى تۇردە اياقتاۋدى, قازاقستاننىڭ ءارتۇرلى كوپجاقتى فورماتتاعى جوعارى دەڭگەيدەگى كەزدەسۋلەرىن, سونىڭ ىشىندە كاسپي جاعالاۋى مەملەكەتتەرىنىڭ ءسامميتىن ۇيىمداستىرۋ, استانانىڭ 20-جىلدىعىن مەرەكەلەۋگە شەتەلدىك ارىپتەستەردىڭ قاتىسۋىن قامتاماسىز ەتۋ, سونداي-اق, الەمدىك جانە ءداستۇرلى دىندەر ليدەرلەرىنىڭ VI سەزىن وتكىزۋدى اتاپ ءوتتى.
كەزدەسۋدىڭ ماڭىزدى بولىگى ەۋروپالىق وداقپەن ىقپالداستىقتىڭ سەرپىندى دامۋىنا ارنالدى. ەۋروپالىق وداق قازاقستاننىڭ ءىرى ساۋدا-ەكونوميكالىق جانە ينۆەستيتسيالىق ارىپتەسى بولىپ قالا بەرەتىندىگى اتالىپ ءوتتى (ەۋروپالىق وداق قازاقستاننىڭ ساۋدا سەرىكتەستەرى اراسىندا جالپى 49,8% ۇلەسكە يە; 2017 جىلى قازاقستان مەن ەو اراسىنداعى تاۋار اينالىمى 6 ملرد. دوللارعا ارتىپ, جالپى 30 ملرد. دوللاردان استى). قازاقستاننىڭ ەو-مەن ساۋدا-ساتتىقتى ارتاراپتاندىرۋعا مۇددەلىلىگى جانە قازاقستاننان ەۋروپا ەلدەرىنە شيكىزاتتىق ەمەس ەكسپورتتى كەڭەيتۋدىڭ ىقتيمال جولدارىن ىزدەستىرۋ قاجەتتىلىگى ايتىلدى.
ىنتىماقتاستىقتىڭ ماڭىزدى ناتيجەلەرىنىڭ ءبىرى 2015 جىلى قازاقستان مەن ەۋروپالىق وداق اراسىنداعى كەڭەيتىلگەن ارىپتەستىك جانە ىنتىماقتاستىق تۋرالى كەلىسىمگە قول قويىلۋى, ونى 2016 جىلدىڭ مامىر ايىنان باستاپ جارتىلاي قولدانىلۋىنىڭ باستالۋى, سونداي-اق ەو-عا مۇشە مەملەكەتتەرىمەن راتيفيكاتسيالاۋىنىڭ وڭ قارقىنى (ەو-نىڭ 28 مۇشە-مەملەكەتتەرىنىڭ 21-ءى راتيفيكاتسيالادى) جانە ونىڭ ەۋروپالىق پارلامەنتتىمەن ماقۇلدانۋى. كەلىسىمنىڭ تولىق كۇشىنە ەنۋى ءۇشىن قۇجاتتى ەو-نىڭ بارلىق ەلدەرىنىڭ راتيفيكاتسيالاۋى قاجەت.
مينيستر ەۋروپا ەلدەرىنىڭ وكىلدەرىن مەملەكەت ءباسشىسىنىڭ «تورتىنشى يندۋستريالدى رەۆوليۋتسيا جاعدايىندا دامۋدىڭ جاڭا مۇمكىندىكتەرى» تاقىرىبىنداعى قازاقستان حالقىنا جولداۋىنا ەنگەن مودەرنيزاتسيالاۋ, تسيفرلاندىرۋ, يننوۆاتسيالىق تەحنولوگيالاردى ەنگىزۋ جانە ىسكەرلىك احۋالدى جاقسارتۋ سياقتى پەرسپەكتيۆالى سالالاردا قولجەتىمدى مۇمكىندىكتەردى بەلسەندى پايدالانۋعا جانە ەو-نىڭ مۇددەلى كومپانيالارىن قازاقستانعا تارتۋ بويىنشا جۇمىس جۇرگىزۋگە شاقىردى.
ەۋروپالىق وداقپەن ىنتىماقتاستىقتى دامىتۋدىڭ تاعى ءبىر ماڭىزدى مىندەتى ۆيزالىق رەجيمدى جەڭىلدەتۋ بولىپ تابىلادى, ول ءۇشىن قازاقستان مەن ەۋروپالىق وداق وسى ماسەلەنى شەشۋدە ەلەۋلى قادام جاساۋعا ىقپال ەتەتىن بەلسەندى كونسۋلتاتسيالار جۇرگىزەدى.
تالقىلاۋ بارىسىندا ەۋروپالىق ديپلوماتتار قازاقستاندا زاڭنىڭ ۇستەمدىگىن قامتاماسىز ەتۋ جانە قوعامدىق ءومىردىڭ ءتۇرلى سالالارىندا زاڭنامانى جەتىلدىرۋ ءۇشىن ينستيتۋتسيونالدىق رەفورما جۇرگىزۋ بويىنشا سۇراقتارىنا جاۋاپ الدى. سىرتقى ىستەر ءمينيسترى ەلشىلەردىڭ قازاقستاندىق بيلىكتىڭ حالىقارالىق ماسەلەلەر بويىنشا ساراپشىلارمەن جانە قۇقىقتىق ماسەلەلەر بويىنشا مامانداندىرىلعان ۇكىمەتتىك ەمەس ۇيىمدارمەن ىنتىماقتاستىقتا اشىق ەكەنىن كورسەتەتىندىگىنە نازارىن اۋداردى. كەز كەلگەن قىزىعۋشىلىق تۋدىراتىن جاعدايدا, سىندارلى ءوزارا ارەكەتتەسۋگە جانە ءتۇسىندىرۋ جۇمىستارىنا ەرەكشە ءمان بەرىلەدى. قازاقستاننىڭ بۇل ۇستانىمى كوپتەگەن شەتەلدىك سەرىكتەستەر اراسىندا تۇسىنىستىك پەن قولداۋ تابادى.
كەزدەسۋ قاتىسۋشىلارى 2019 جىلى اياقتالۋى جوسپارلانعان ەو-نىڭ ورتالىق ازيا ءۇشىن ستراتەگياسىنىڭ جاڭارتۋ پروتسەسىن قۇپتادى. ق. ءابدىراحمانوۆ قازاقستاننىڭ وڭىردەگى بارلىق ەلدەردىڭ مۇددەلەرىن ەسكەرە وتىرىپ, ستراتەگيانىڭ تيىمدىلىگىن قامتاماسىز ەتۋ ماقساتىندا ونى جەتىلدىرۋ جونىندەگى جۇمىستى بەلسەندى تۇردە جالعاستىرۋعا دايىن ەكەندىگىن اتاپ ءوتتى. قازاقستاندىق تاراپ باسىمدى باعىتتاردىڭ قاتارىندا شاعىن جانە ورتا بيزنەستىڭ دامۋى, كولىكتىك-لوگيستيكالىق ينفراقۇرىلىم, ەنەرگيا تيىمدىلىگى, قورشاعان ورتانى قورعاۋ, ءبىلىم بەرۋ جانە باسقالارىن دا اتاپ ءوتتى.
ەسكە سالايىق, 2018 جىلعى 2 اقپانىندا قازاقستان مەن ەۋروپالىق وداق اراسىنداعى ديپلوماتيالىق قارىم-قاتىناستارىنىڭ ورناعانىنا 25 جىل تولدى.