بۇگىن اقپارات جانە كوممۋنيكاتسيالار مينيسترلىگىندە قر پرەمەر-ءمينيسترىنىڭ ورىنباسارى اسقار جۇماعاليەۆتىڭ قاتىسۋىمەن كەڭەيتىلگەن القا وتىرىسى ءوتتى.
كەزدەسۋ بارىسىندا «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما توراعاسى ابىلايحان وسپانوۆ 2017 جىلى اتقارىلعان جۇمىستاردىڭ قورىتىندىسى مەن بيىلعى جىلدىڭ ماقسات-مىندەتتەرى تۋرالى باياندادى. سونداي-اق ول بىلتىر 29 جەلتوقساندا ىسكە قوسىلعان بالا تۋ بويىنشا پرواكتيۆتى قىزمەت جەلىسىمەن دە ءبولىستى. وسى جوباعا سايكەس جاڭا بوسانعان 34 مىڭنان استام ايەلگە مەملەكەتتىك قىزمەتتەردى تەلەفون ارقىلى الۋ ۇسىنىسىمەن SMS-حابارلاما جولدانىپ, ونىڭ 16 مىڭنان استامى بۇل مۇمكىندىكتى ءتيىمدى پايدالانعان. پرواكتيۆتى مەملەكەتكە كوشۋگە باعىتتالعان جوبا اياسىندا فرونت-وفيسكە بارماي-اق, ءتىپتى ۇيدەن شىقپاي-اق, تۋ تۋرالى كۋالىك پەن ءتيىستى جاردەماقىلاردى راسىمدەۋگە, ءسابيدى بالاباقشاعا كەزەككە قويۋعا بولادى. جۋىردا جاڭا تۋعان بالانى SMS كومەگىمەن تۇرعىلىقتى جەرگە تىركەۋ قىزمەتى دە ىسكە قوسىلادى.
«بيىل ءبىز جىلجىمايتىن م ۇلىك يەسىنىڭ مالىمەتتەرىنىڭ وزگەرۋىنە, زەينەتاقى جيناقتارىنىڭ ساقتالۋىنا مەملەكەتتىك كەپىلدىك تولەنۋىنە, سونداي-اق مۇگەدەكتىكتى بەلگىلەۋ مەن اتقارۋشىلىق ءىس جۇرگىزۋدى قوزعاۋعا قاتىستى مەملەكەتتىك قىزمەتتەردى كورسەتۋ بارىسىن دا پرواكتيۆتى تاسىلگە كوشىرەمىز», - دەدى ا. وسپانوۆ. سونداي-اق بيىل حالىقتىڭ تسيفرلىق ساۋاتتىلىعىن 77 پايىزعا دەيىن ارتتىرۋ كوزدەلگەن. وسى ماقساتتا الداعى ۋاقىتتا ەل بويىنشا تاعى 15 تسيفرلىق حالىققا قىزمەت كورسەتۋ ورتالىعى (حقو) اشىلادى. قازىرگى تاڭدا تسيفرلىق حقو تەك استانا قالاسىندا بار.
ەسكە سالا كەتەيىك, 2017 جىلى مەملەكەتتىك كورپوراتسيا 38 ميلليوننان استام مەملەكەتتىك قىزمەت كورسەتىپ, ونىڭ 63 پايىزىن ەلەكتروندىق نۇسقادا ۇسىندى.
ايا ءومىرتاي,
«ەگەمەن قازاقستان»