«استانا ەكسپو-2017» ۇلتتىق كومپانياسى استانا قالاسىنىڭ ءبىلىم باسقارماسىمەن بىرلەسىپ, وقۋشىلارعا «نۇر الەم» سفەراسى – «بولاشاق ەنەرگياسى» مۇراجايىنا ەكسكۋرسيا ۇيىمداستىردى, دەپ حابارلادى كومپانيانىڭ قوعاممەن بايلانىس دەپارتامەنتى.
اقپان ايىنىڭ 6-سى مەن 28-ءى ارالىعىندا ەكسپو-2017 كورمە كەشەنىنىڭ نىساندارىن استانا قالاسىنىڭ 3-11 سىنىپ ارالىعىنداعى 50 مىڭ وقۋشىسى ارالاماق.
«اتالعان ەكسكۋرسيالىق باعدارلاما 5 ساعاتقا شامالانعان. وقۋشىلار «نۇر الەم» سفەراسىنىڭ 8 قاباتىن ارالاپ, كەيىن «ۇزدىك تاجىريبەلەر ايماعىنا» بارادى. بالالار جاڭارتىلعان ەنەرگيا كوزدەرىمەن قولدانىسقا ەنگىزىلگەن ۇزدىك تاجىريبەلەرمەن تانىسپاق» - دەپ اتاپ ءوتتى, بالالار مەن جاسوسپىرىمدەردىڭ تۋريزم جانە ولكەتانۋ ورتالىعىنىڭ ديرەكتورى مەلس ابەنوۆ.
بۇدان بىلاي ۇلتتىق كومپانيا وقۋشىلارعا «Kids Future Energy» اشىق ساباعىن جانە «جۇلدىزدى ەكسكۋرسيالار مەن تۋرلار» وتكىزۋگە كورنەكتى وقىمىستىلاردى, عارىشكەرلەردى, ونەر قايراتكەرلەرىن شاقىرماق.
«ەكسپو-2017 مۇراسى نىساندارى ءبىلىم ەكسكۋرسيالارىن وتكىزۋدە سورە الاڭى بولۋى مۇمكىن. وسىلايشا كومپانيا ءبىلىم ءتۋريزمىن دارىپتەۋگە باعىتتالعان شارالاردى وتكىزۋگە نيەتتى. ونداي اشىق ساباقتاردى ءبىز «Kids Future Energy» دەپ اتادىق. سونىڭ ىشىندە, بولاشاق ەنەرگياسى تاقىرىبىندا فيزيكا, ماتەماتيكا, جاراتىلىستانۋ عىلىمدارىن قامتىماق. وسى سياقتى «اشىق» ساباقتار وقۋشىلارعا پاندەردى جاقسى مەڭگەرۋگە كومەكتەسپەك,» - دەپ سانايدى, ۇلتتىق كومپانيا باس مەنەدجەرى روزا اسانباەۆا.
ەستەرىڭىزگە سالساق, 2017 جىلعى 11 قاراشادا ەكسپو-2017 حالىقارالىق مامانداندىرىلعان كورمەسى نىساندارى ءوز جۇمىسىن قايتا باستاعان. كەلەم دەۋشىلەرگە ءوز ەسىكتەرىن كورمە كەشەنىنىڭ تۋريستىك ايماعىنىڭ «نۇر الەم» سفەراسى – «بولاشاق ەنەرگياسى» مۇراجايى, ۇزدىك تاجىريبەلەر ايماعى, ەنەرگيا حولى مەن كونگرەسس-ورتالىعى اشتى.