2017 جىلى تەرروريزم مەن ءدىني ەكسترەميزمدى, سۋيتسيد, زورلىق-زومبىلىقتى ناسيحاتتايتىن 9 مىڭعا جۋىق سايت جۇمىسى توقتاتىلعان. بۇل تۋراسىندا اقپارات جانە كوممۋنيكاتسيالار مينيسترلىگىنىڭ كەڭەيتىلگەن القا وتىرىسىندا بايانداما جاساعان مينيستر داۋرەن اباەۆ حابارلادى.
«مينيسترلىك اقپاراتتىق كەڭىستىكتە ءتيىستى زاڭنىڭ ساقتالۋىن قامتاماسىز ەتۋ بويىنشا جۇمىستى جالعاستىرادى. وتكەن جىلى تەرروريزم مەن ءدىني ەكسترەميزمدى, سۋيتسيد, زورلىق-زومبىلىقتى ناسيحاتتايتىن 9 مىڭعا جۋىق سايت جۇمىسى توقتاتىلعان. الەۋمەتتىك جەلىلەردە وسى سارىنداعى 230 مىڭ ماتەريال جويىلدى», دەدى ول.
ەستەرىڭىزگە سالا كەتسەك, استانادا پرەمەر-ءمينيستردىڭ ورىنباسارى اسقار جۇماعاليەۆتىڭ, مينيستر داۋرەن اباەۆتىڭ قاتىسۋىمەن اقپارات جانە كوممۋنيكاتسيالار مينيسترلىگىنىڭ كەڭەيتىلگەن القا ءماجىلىسى ءوتىپ جاتىر. وندا مينيستر مەملەكەتتىك تاپسىرىس اياسىندا بىلتىر 40 سەريال تۇسىرىلگەنىن حابارلادى. سونىمەن قاتار داۋرەن اباەۆتىڭ ايتۋىنشا, بيىل ماڭعىستاۋ مەن جامبىل وبلىستارىنا تسيفرلىق ەفيرلىك تەلە-راديو حابارلارىن تاراتۋ جۇيەسى ەنگىزىلمەك.
ايا ءومىرتاي,
"ەگەمەن قازاقستان"