«تەسلا» كومپانياسىنىڭ نەگىزىن سالۋشى امەريكالىق ميللياردەر يلون ماسكقا تيەسىلى SpaceX كورپوراتسياسى Falcon Heavy دەپ اتالاتىن اۋىر راكەتانى سىناقتان وتكىزىپ, ونىڭ ۇدەمەلى بلوكتارىن ءساتتى قوندىردى.
فلوريدا شتاتىنداعى «كەننەدي» عارىش ايلاعىنان كوككە سامعاعان زىمىران اسپانعا 64 توننا جۇكتى كوتەرىپ شىعا الادى. بۇرىن مۇنداي اۋىر سالماقتى جۇكتى عارىشقا كوتەرۋ مۇمكىن ەمەس-تۇعىن.
يلون ماسك زىمىراننىڭ نەگىزگى بولىگىنە ءوزىنىڭ جەكە Tesla Roadster اۆتوكولىگىن ورناتىپتى. راكەتا اسپانعا كوتەرىلگەن سوڭ, كولىك مارسقا قاراي ءوز ساپارىن جالعاستىرماق. بولجام بويىنشا, ول جەردەن 400 ميلليون شاقىرىم قاشىقتىققا دەيىن ۇشۋى كەرەك. عارىش كولىگىنىڭ جىلدامدىعى سەكۋندىنا 11 شاقىرىمعا تەڭ.
Falcon Heavy – ادامزات تاريحىنداعى ەڭ قۋاتتى زىمىران. ونىڭ 27 قوزعالتقىشى بار جانە بيىكتىگى 70 مەترگە جەتەدى. وسى سىناق بارىسىندا راكەتانىڭ ەكى ۇدەمەلى بلوگى «كەننەدي» ايلاعىنا ءساتتى قوندىرىلدى. الايدا ءبىر بولىگى اتلانت مۇحيتىنا قونۋ بارىسىندا اپاتقا ۇشىراپ, جانىپ كەتتى.
بۇعان الاڭداپ وتىرعان ي.ماسك جوق. ويتكەنى ەكى ۇدەمەلى بلوكتى قوندىرۋدىڭ ءوزى زور ابىروي. بۇعان دەيىن عارىشتى يگەرۋدە مۇنداي تابىسقا قول جەتكىزىلمەگەن بولاتىن. بۇل, سىناق بلوكتاردى ءساتتى قوندىرۋعا مۇمكىندىك مول ەكەنىن كورسەتتى.
شولۋدى دايىنداعان
اباي اسانكەلدى ۇلى,
«ەگەمەن قازاقستان»