الماتىداعى ونەر وشاقتارىنىڭ ىشىندەگى ەڭ ىرگەلى شىعارماشىلىق ەكى ۇجىم – قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترى مەن مەملەكەتتىك «سالتانات» ءان-بي ءانسامبلى تولىق قۇرامدا بىرىگە وتىرىپ, وركەستردىڭ ۇلكەن كونتسەرت زالىندا پرەزيدەنت نۇرسۇلتان نازارباەۆتىڭ حالىققا جولداۋىن تالقىلادى.
بۇكىل الەم قارقىندى دامىتىپ جاتقان تەحنولوگيالىق رەۆوليۋتسيادان قازاقستان دا تىسقارى تۇرا المايدى. الەمگە ءتان وزگەرىس – قازاقستاندىقتارعا دا تيەسىلى. اقپاراتتىق-كوممۋنيكاتسيالىق تەحنولوگيالار سالاسىنداعى ەڭبەك ونىمدىلىگىن ارتتىرىپ, قالىپتى ىرعاقپەن دامىتا ءتۇسۋ ءۇشىن ناقتى شارالار بۇگىننەن باستاپ قولعا الىنۋى ءتيىس.
ۇلتتىق ونەردى دامىتۋ جولىندا ايىرىقشا ەڭبەك ءسىڭىرىپ كەلە قوس ۇجىمنىڭ دا باسشىلارى وسى تۇرعىدا ءسوز الىپ, مەملەكەت باسشىسىنىڭ جولداۋىندا نازار اۋدارىلىپ وتىرعان بارلىق باسىمدىقتاردىڭ ماڭىزىنا توقتالدى. مەملەكەتتىك «سالتانات» ءان-بي ءانسامبلىنىڭ ديرەكتورى ماقسات زاكيروۆ ورتاق ماقسات جولىنا جۇمىلدىراتىن بيىلعى جولداۋدىڭ ەكى ۇجىمنىڭ دا ازاماتتارىنا زور جاۋاپكەرشىلىك جۇكتەيتىنىن ايتتى. «ەلباسىنىڭ زاماناۋي دامۋ جولدارىن ەسكەرە وتىرىپ, قازاق ءتىلىنىڭ وركەندەۋىنە, رۋحاني جاڭعىرۋعا, حالىقتىڭ دەنساۋلىعىن نىعايتۋعا باسا نازار اۋدارعانى حالقىنىڭ بار قادىر-قاسيەتىن بويىنا جيناعان ۇلتتىق رۋحىن كورسەتتى. الداعىنى بولجاپ, ەرتەڭگىسىن ويلايتىن, قازاقستاندىقتاردى, بۇكىل مەملەكەتتى الەمدىك وركەنيەتكە جەتەلەيتىن كورەگەن باسشى, ساياسي قايراتكەر, تاريحي تۇلعا ەكەنىن تاعى ءبىر دالەلدەدى», دەدى ماقسات دەمەش ۇلى. بالەت ءبيشىسى دەنيس ۆيتچەنكو بولسا, ەلىمىز دامۋىنىڭ ەندىگى كەزەڭى ءۇشىن بۇل جولداۋدىڭ ناقتى ءىس-ارەكەتتەرگە ورايلاستىرىلعان ءبىرتۇتاس ۇلت بولۋ قادامىمىزدى ايقىنداي تۇسەتىن قۋاتقا يە قۇجات ەكەنىن جەتكىزدى. قازاقستان دامۋىنىڭ بارلىق كوكجيەگىن كەڭەيتە تۇسەتىن بۇل جولداۋمەن ءاربىر ادام مۇقيات تانىسىپ, وزىنشە زەردەلەۋى ءتيىس. ول ءوز ارىپتەستەرىن ەلباسى بەلگىلەپ بەرگەن نەگىزگى ون مىندەتتىڭ ورىندالۋىنا اتسالىسىپ, وعان تولىق قولداۋ بىلدىرۋگە شاقىردى.
ايگۇل احانبايقىزى, «ەگەمەن قازاقستان»
الماتى