الماتىدا يران يسلام رەسپۋبليكاسىنىڭ باس كونسۋلدىعى جانىنداعى مادەني وكىلدىگى جانە ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ ۇيىمداستىرۋىمەن يران يسلام رەسپۋبليكاسى تاۋەلسىزدىگىنىڭ جانە يسلام رەۆوليۋتسياسى جەڭىسىنىڭ 39 جىلدىعى مەرەيتويىنا ارنالىپ «يران ەلىنىڭ ۇلتتىق قولونەرى» اتتى كورمەسى اشىلدى.
الەمدەگى ەڭ كونە وركەنيەت وشاقتارىنىڭ ءبىرى, فيردوۋسي, حايام, ساادي جانە حافيزدىڭ وتانى. يران دەسە كوڭىلىمىزدە پارسى ەلىنىڭ سالتاناتتى ساۋلەت ونەرى, مەشىتتەردىڭ كۇن تۇستەس كۇمبەزدەرى, كوزدىڭ جاۋىن الار ويۋلارى مەن ناقىشتارى, اسەم ىدىس–اياعى مەن ءۇي جاراقتارى, كونە سارايلار مەن كىتاپ بەتتەرىنىڭ قايتالانباس مينياتيۋرالارى, سۋرەت ونەرى مەن قولونەرى قىلاڭ بەرەتىنى ءسوزسىز. يران مادەنيەتى مەن قولونەرى الەمدىك ونەر مۇراسى مەن جەتىستىكتەرى ايدىنىندا وزىنە لايىق ورنى مەن قۇرمەتىن تاپقان جانە ونەر سۇيەر قاۋىم ءۇشىن ارقاشان اسىعا كۇتەتىن مەرەكەگە اينالعان.
اتالعان كورمەدە يران قولونەرىنىڭ تالانتتى ونەرپازدارىنىڭ, سۋرەتشىلەرىنىڭ, مينياتيۋرشىلارىنىڭ, كوركەم جازۋ جانە اعاش ونەرى شەبەرلەرىنىڭ تۋىندىلارى كورەرمەن نازارىنا ۇسىنىلادى. سونىمەن قاتار كوركەم جازۋ ونەرى بويىنشا شەبەرلىك ساباقتارى وتكىزىلەدى.
كورمەنىڭ اشىلۋ سالتاناتىنا الماتى قالاسىنداعى يران يسلام رەسپۋبليكاسىنىڭ باس كونسۋلدىعى جانىنداعى مادەني وكىلدىك باسشىسى سەيەد دجاۆاد دجالالي كياساري, باس كونسۋل حاميد رەزا ارشادي, قازاقستاندىق مادەنيەتتانۋشى عالىمدار, ونەرتانۋشىلار, ۇستازدار مەن ستۋدەنتتەر قاتىستى.
ونەردىڭ تىلسىم سىرىن ۇقتىرار عاجايىپتار قويىلعان كورمەدە موزايكا, مينياتيۋرا, اعاش ويۋ جانە جازۋ ونەرى ەكسپوناتتارى سىزگە سول سىردان ۇزىك-ۇزىك وي ايتار دەپ ويلادىق. قاعاز بەن تەمىر بەتىنە توگىلگەن مىڭ-سان ورنەكتەر قيالىڭدى الديلەپ قانات بىتىرگەندەي بولادى.تامسانىپ كورىپ كەرەمەت ونەرگە تاڭداي قاعاسىز.
ساپارباي پارمانقۇل,
«ەگەمەن قازاقستان»
الماتى