اتىراۋ وبلىستىق تاريحي-ولكەتانۋ مۋزەيىنىڭ قورىندا 60 دومبىرا بار. «ولكە مادەنيەتى مەن ادەبيەتى» ەكسپوزيتسيالىق زالىندا كۇي اتاسى قۇرمانعازى ساعىرباي ۇلى تۋرالى دەرەكتەر, دينا نۇرپەيىسوۆانىڭ دومبىراسى, وڭىردەن شىققان بەلگىلى ونەر شەبەرلەرىنىڭ تۇتىنعان بۇيىمدارى مەن اسپاپتارى جيناقتالعان. «رۋحاني جاڭعىرۋ» جوباسى اياسىندا مۋزەيدە تاعى ءبىر يگىلىكتى شارا ءوتىپ, «دومبىرا-داستان» اتتى كىتاپتىڭ تۇساۋكەسەرى ۇيىمداستىرىلدى.
كىتاپتا عاسىرلار بويى ءار قازاقتىڭ تورىنەن ورىن العان ۇلتتىق اسپاپ, ونىڭ شىعۋ تاريحى, ءانشى-كۇيشىلەردىڭ جان سەرىكتەرىنە اينالعان دومبىرالار جايلى جازىلعان. دومبىرا جاساۋشى قولونەر شەبەرلەرىنىڭ ەڭبەكتەرى دە جيناقتان تىس قالمادى. ۇلتتىق مۇرانى جىرعا قوسقان اقىنداردىڭ ولەڭدەرى دە كىتاپقا ەنگىزىلدى.
شاراعا قاتىسقان قازاقستاننىڭ جانە قىرعىزستاننىڭ ەڭبەك سىڭىرگەن قايراتكەرى, كومپوزيتور يليا جاقانوۆ, قازاقستان جۋرناليستەر جانە جازۋشىلار وداقتارىنىڭ مۇشەسى, ولكەتانۋشى وتەپبەرگەن الىمگەرەەۆ پەن ايماقتاعى زيالى قاۋىم وكىلدەرى جاڭا كىتاپتىڭ ماڭىزى تۋرالى باياندادى. «دينا نۇرپەيىسوۆا اتىنداعى حالىقتىق مۋزىكا اكادەمياسى» اتىراۋ مۋزىكا كوللەدجىنىڭ ستۋدەنتتەرى مۋزەيدە تۇرعان قارشىعا احمەدياروۆ, حاميت ەرعاليەۆ, رىسباي عابديەۆ, مەكەس تورەشەۆ, ءشامىل ابىلتاەۆ, ناريمان ۇلكەنباي ۇلى, عاتاۋ يبىشەۆ سىندى ونەر تارلاندارىنىڭ دومبىرالارىمەن كۇي تارتتى.
– كۇللى قازاققا ەسىمدەرى بەلگىلى ونەر يەلەرى دومبىرالارىنىڭ ءبىزدىڭ مۋزەيدە ساقتالۋى – ماقتانىش. جاس دومبىراشىلار دا وزدەرى ۇلگى ەتەتىن اعا-اپالارى ويناعان اسپاپتاردا كۇي تارتۋ مارتەبەسىنە يە بولدى. «دومبىرا-داستان» كىتابى بەس بولىمنەن تۇرادى, وندا قازاقتىڭ ءداستۇرلى ونەرى جايلى كوپ ماعلۇمات بار, – دەيدى مۋزەيدىڭ ەتنوگرافيا جانە ولكە تابيعاتى عىلىمي-زەرتتەۋ ءبولىمىنىڭ سەكتور جەتەكشىسى س.نۇرپەيىسوۆا.
باقىتگۇل باباش, «ەگەمەن قازاقستان»
اتىراۋ