بۋراباي اۋدانىندا اعاشتىڭ ۇنتاقتالعان جاڭقاسىنان ەكولوگيالىق قاۋىپسىز بيووتىن وندىرەتىن زاۋىت ىسكە قوسىلدى. بۇل ءىستى جەرگىلىكتى ورمان شارۋاشىلىعىمەن اينالىساتىن «ورماندى ايماق» جشس قولعا الىپ وتىر.
اعاش قالدىقتارى دەمەكشى, جاقىندا ءبىر ۋكراينالىق ونەرتاپقىش اعاش جاڭقاسىن جاعۋ ارقىلى جەڭىل اۆتوكولىك قوزعالتقىشىن ىسكە قوساتىن قۇرىلعى ويلاپ تاپقانى جونىندە ءبىر قىزىقتى اقپاراتتى ەستىدىك. ءبىر سالعاننان ەلۋ شاقىرىمدى ەڭسەرەتىن الگى اۆتوكولىك يەسىنە تاڭداي قاققانىمىز دا راس. سويتسەك, ونەرتاپقىشتار وزىمىزدە دە جەتىپ ارتىلادى ەكەن.
اعاش ۇنتاعىن وندىرىستىك كولەمدە ءوندىرىپ كەلە جاتقان «ورمان ايماعى» جشس ەلىمىزدەگى ەكولوگيالىق تازا وتىن وندىرەتىن بىردەن-ءبىر كاسىپورىن. مۇنداي العاشقى زاۋىت پەتروپاۆل قالاسىندا ىسكە قوسىلىپتى. ال بۋراباي اۋدانىنداعى زاۋىت تەك 2017 جىلدىڭ سوڭىندا اشىلعان. از ۋاقىتتا كاسىپورىن 500 تونناعا جەتەتىن اعاش جاڭقاسىن ءوندىرىپ ۇلگەرىپتى. زاۋىتتىڭ جىلدىق قۋاتى 3000 توننا وتىن وندىرۋگە جەتەدى ەكەن.
كومپانيا باسشىسى اندرەي پەتروچەنكونىڭ سوزىنە قاراعاندا, اعاش قالدىقتارىن وتىن رەتىندە پايدالانۋ ەۋروپا ەلدەرىندە, اقش-تا, جاپونيادا, رەسەيدە كەڭىنەن قولدانىلادى. دامىعان ەلدەردە ول وتكەن عاسىر- دىڭ ورتا شەنىنەن بار ەكەن.
– اعاش جاڭقاسى – قۇنارى جوعارى وتىن. ونىڭ پايدالى اسەر كوەففيتسيەنتى 95 پايىزعا جەتەدى. بۇل رەتتە كومىردىكى شامامەن 50 پايىز بولسا, گاز نەبارى 30 پايىزعا پارا-پار. ول قىمبات تۇراتىن ديزەل وتىنىنىڭ تونناسىن نەمەسە سۇيىتىلعان گازدى الماستىرا الادى, – دەپ اتاپ ءوتتى ا.پەتروچەنكو.
قازىرگى تاڭدا ءبىر توننا بيووتىننىڭ قۇنى 35 مىڭ تەڭگەنى قۇرايدى. كومپانيا باسشىسىنىڭ ايتۋىنشا, ول ازىرلەگەن وتىنعا دەگەن سۇرانىس كۇن سايىن ارتىپ كەلەدى. ەكولوگيالىق تازا ءونىمنىڭ ەلىمىزدىڭ باسقا ايماقتارىنا عانا ەمەس, سونىمەن بىرگە قىتاي نارىعىنا كوپتەپ شىعارىلۋى سوزىمىزگە ناقتى دالەل بولسا كەرەك. ونىڭ ۇستىنە بالامالى وتىن ءوندىرۋ جوباسىن جۇزەگە اسىرۋ قۇرىلتايشىنىڭ ءوز قارجىسى ەسەبىنەن جۇرگىزىلۋدە. ول زاۋىت سالىپ, جۇمىسىن جۇرگىزۋگە 120 ميلليون تەڭگە جۇمساپتى.
ەلباسىنىڭ بيىلعى ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى حالىققا ارناعان جولداۋىندا ءححى عاسىر- دا الەمنىڭ تابيعي رەسۋرستارعا دەگەن مۇقتاجدىعى جالعاسۋدا ەكەندىگى ايتىلعان. وسى تۇرعىدان العاندا «ورمان ايماعى» جشس سياقتى كاسىپورىندارعا مەملەكەت تاراپىنان قولداۋ كورسەتىلىپ, عىلىمي ينستيتۋتتارمەن تىعىز بايلانىستار ورناتۋ – ۋاقىت تالابى. مەملەكەت پەن جەكەمەنشىك سەرىكتەستىگىن ارتتىرۋ ارقىلى ەلىمىز ەكونوميكاسىن ايتارلىقتاي العا جىلجىتۋعا بولاتىنىن ۋاقىتتىڭ ءوزى دالەلدەپ وتىر.
اسقار تۇراپباي ۇلى, «ەگەمەن قازاقستان»
اقمولا وبلىسى