تاياۋدا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە قازاقستان تاريحشىلارىنىڭ V ۇلتتىق كونگرەسى ءوتىپ, وندا تۇڭعىش پرەزيدەنتى نۇرسۇلتان نازارباەۆتىڭ «تاۋەلسىزدىك ءداۋىرى» كىتابى تالقىلاندى. كونگرەسكە رەسپۋبليكامىزدىڭ تاريح, گۋمانيتارلىق عىلىمدار سالاسىنىڭ كورنەكتى وكىلدەرى, مەملەكەت جانە قوعام قايراتكەرلەرى, سونىمەن قاتار شەتەلدىك قوناقتار قاتىستى.
جالپى, ەلباسى ن.نازارباەۆتىڭ «تاۋەلسىزدىك ءداۋىرى» اتتى ەڭبەگى قوعامدا, سونىڭ ىشىندە كاسىبي تاريحشىلار مەن گۋمانيتارلىق سالا ماماندارىنىڭ ۇلكەن رۋحاني سىلكىنىسىن تۋعىزدى. وسى ارنادا ۇلتتىق رۋحاني ورلەۋ جانە قوعامدىق سانانىڭ جاڭعىرۋ ماسەلەلەرى, ءبىلىم بەرۋ ءىسى جانە تاريح عىلىمىنىڭ وزەكتى ماسەلەلەرىن تالداۋ, ارحيۆتەر مەن مۋزەيلەردىڭ جۇمىسىن جاڭا ساپالىق دەڭگەيگە كوتەرۋ, ۇلتتىق تاريح كونتەكسىندەگى جوعارى وقۋ ورىندارى مەن مەكتەپ وقۋلىقتارىنىڭ مازمۇندىق جاعدايىن جاقسارتۋ باستى نازاردا بولماق.
عىلىمي فورۋمنىڭ پلەنارلىق وتىرىسىندا ءسوز سويلەگەندەر دە كىتاپتىڭ وسىنداي ءتۇيىندى كەزەڭدەرىنە توقتالدى. مەملەكەت باسشىسى ءوزىنىڭ جاڭا كىتابىندا قازاقستاننىڭ تاۋەلسىزدىك جىلدارىنداعى تاريحىن پۋبليتسيستيكالىق جانردا بايانداپ, ەلىمىزدىڭ قازىرگى ۋاقىتتاعى جەتىستىكتەرىنە قالاي قول جەتكىزگەنىن وتە ايشىقتى تىلمەن جەتكىزگەن. ماسەلەن, جاڭا ساناتتاعى مەملەكەتتىك قۇرىلىستىڭ نەگىزدەرىنىڭ قالانۋى, قوعامنىڭ الەۋمەتتىك-ەكونوميكالىق جانە ساياسي تۇرعىدا جاڭعىرۋى, رۋحاني ورىستەگى تۇبەگەيلى وزگەرىستەر, جاڭا استانانىڭ سالىنۋى, سىرتقى ساياساتتى ءتۇزۋ, قانداستارىمىزدى ەلگە قايتارۋ سىندى وزەكتى تاقىرىپتار ءوز ۋاقىتىندا ورنەكتى ايتىلعان.
القالى جيىنعا ز.قابىلدينوۆ, ب.جاپاروۆ, ءا.راقىمجانوۆ, م.ەسكەندىروۆ, م.كەمەل, ە.ءابىل, ب.ابدىعالي ۇلى, ت.سادىقوۆ سىندى عالىمدار قاتىسىپ, بايانداما جاسادى. ولار گۋمانيتارلىق ءبىلىم بەرۋ نەگىزدەرى كۇشەيگەن قازىرگى زاماننىڭ دامۋ جاعدايىندا ءبىلىم مەن عىلىمنىڭ بىرەگەيلىگىن جانە قوعامداعى تاريح عىلىمىنىڭ ءرولىنىڭ قارقىندى تۇرعىدا ورلەۋىن ەرەكشە اتاپ ءوتتى.
شاكارىم اتىنداعى سەمەي مەملەكەتتىك ۋنيۆەرسيتەتىنىڭ رەكتورى مەيىر ەسكەندىروۆتىڭ بايانداماسىندا ايتىلعانداي, كەزىندە بۇگىنگى تۇركيا مەملەكەتىنىڭ ىرگەتاسىن قالاعان اتاتۇرىك تاريحي زەرتتەۋلەردە وبەكتيۆتىلىك قاعيداسىن ۇستانۋدىڭ ماڭىزدىلىعىن «تاريحتى جازۋ, تاريحتى جاساۋداي ماڭىزدى. جازعان جاساعانعا ادال بولماسا, وزگەرمەيتىن اقيقات ادامدى تاڭعالدىراتىن سيپات الادى» دەگەن سوزدەرىمەن تۇسىندىرگەن. اتاتۇرىكتىڭ وسى اكسيوماسى ۇلى دالا كەڭىستىگىندە ەلباسىنىڭ ەڭبەگىمەن دəلەلدەنۋدە. اتالعان ىرگەلى ەڭبەكتە مەملەكەتشىلدىك ۇستانىم, ەلدىك سانا, ۇلتتىق رۋح ۇتىمدى ۇيلەسىم تاپقان. قازاقستاننىڭ تəۋەلسىزدىك شەجىرەسىنە كوز جۇگىرتكەن əر ادامعا بۇل كىتاپ جول باستاۋشى بولارى ءسوزسىز, دەدى عالىم م.ەسكەندىروۆ.
كەلەلى كەڭەس ءوزارا كەلىسە كەلە جيىن سوڭىندا پرەزيدەنتتىڭ «تاۋەلسىزدىك ءداۋىرى» كىتابىنداعى نەگىزگى قاعيداتتارىن باسشىلىققا الا وتىرىپ, قوعامدىق سانانى جاڭعىرتۋدى جانە ۇلتتىق رۋحاني ورلەۋدى ناقتى جۇزەگە اسىرۋ, ۇلتتىق كودتى قايتا ورىستەتۋ, قاسيەتتى ورىندار باعىتىنداعى زەرتتەۋلەردى, ولكەتانۋ مەن ارحيۆ جۇمىستارىن كۇشەيتۋ جانە وتاندىق تاريح عىلىمى مەن ءبىلىمىن دامىتا جەتىلدىرۋ ماقساتىندا, جالپى عىلىمي جانە قولدانبالىق-باعىتتاما ۇستانىمدارىن كەلىستىرە ءوز ۇسىنىستارىن ءتۇزىپ, قارار قابىلدادى.
اتاپ ايتقاندا, ءبىلىم جانە عىلىم مينيسترلىگىنە جانە ەلىمىزدىڭ ءبىلىم بەرۋ سالاسىنداعى مەملەكەتتىك مەكەمەلەرىنە ەلباسى نۇرسۇلتان ءابىش ۇلى نازارباەۆتىڭ «تاۋەلسىزدىك ءداۋىرى» كىتابىن مەكتەپتەردە, كوللەدجدەردە جانە جوعارى وقۋ ورىندارىندا مىندەتتى وقىتۋ جۇيەسىنە ەنگىزۋ, «قازاقستاننىڭ قازىرگى زامان تاريحى» وقۋلىقتارىنىڭ اۆتورلارىنا اتالعان كىتاپ بويىنشا دەربەس پاراگرافتار قوسۋعا, مادەنيەت جانە سپورت مينيسترلىگىنە پرەزيدەنتتىڭ جاڭا كىتابىن بۇۇ تىلدەرىنە اۋدارۋعا ۇسىنىس جاسادى. سونىمەن قاتار سىرتقى ىستەر مينيسترلىگىنە شەتەلدەردە بۇل كىتاپتىڭ تۇساۋكەسەر راسىمدەرىن وتكىزۋ, دۇنيەجۇزى قازاقتارى قاۋىمداستىعىنا كىتاپتىڭ تۇساۋكەسەرىن قازاق دياسپوراسى جيناقى تۇراتىن جەرلەرىندە وتكىزۋ ۇسىنىلدى.
مۇنىڭ سىرتىندا ەل تۇرعىندارىنىڭ بارلىق الەۋمەتتىك توپتارىنا اتالعان كىتاپتى وقىتىپ-يگەرتۋ, ناسيحاتتاۋ جانە ونىڭ تەوريالىق ماعىناسىن ءتۇسىندىرۋ ماقساتىندا ۇكىمەتتىك ەمەس ۇيىمدارعا الەۋمەتتىك جوبالار بەرۋ, قازاقستان رەسپۋبليكاسى تۇڭعىش پرەزيدەنتى – ەلباسى كىتاپحاناسىنا اتالعان كىتاپتىڭ نەگىزگى مازمۇنى بويىنشا جوعارى سىنىپ وقۋشىلارىنا, ستۋدەنتتەرگە, جالپى ءبىلىم بەرەتىن مەكتەپ مۇعالىمدەرىنە, ارحيۆتەر, مۋزەيلەر جانە گۋمانيتارلىق باعىتتاعى عزو قىزمەتكەرلەرىنە, جوو وقىتۋشىلارىنا وقىتۋ سەمينارلارىن ۇيىمداستىرۋ جانە وتكىزۋ جايى دا كۇن تارتىبىنە كوشسە دەگەن تىلەك ايتىلدى.
ميراس اسان, «ەگەمەن قازاقستان»