اقمولا وبلىسىنا قاراستى ساندىقتاۋ اۋداندىق سوتى سۋديالارىنىڭ ۇسىنىسىمەن جانە جەرگىلىكتى اكىمدىكتىڭ قولداۋىمەن وسى اۋدانداعى كەيبىر ەلدى مەكەندەردە كوشە اتاۋلارى قازاقتىڭ تاريحي تۇلعالارىنىڭ ەسىمىمەن وزگەرتىلدى. اتالعان شارا «رۋحاني جاڭعىرۋ» باعدارلاماسى اياسىندا جۇزەگە اسىرىلدى.
كوشە اتاۋلارىن وزگەرتۋ تۋرالى شەشىم قوعامدىق كەڭەس وتىرىسىندا اشىق داۋىس بەرۋ ارقىلى قابىلدانعاندىعىن ايتا كەتۋ كەرەك. سونىڭ ناتيجەسىندە ساندىقتاۋ اۋدانىنا قاراستى كامەنكا اۋىلىنىڭ بيداي دايارلاۋ اتاۋىنا يە زاگوتزەرنو كوشەسى قاناي بي بولىپ وزگەرتىلدى. قاي جاعىنان قاراساڭ دا بۇل اتاۋ ءوزىن اقتاپ تۇر. ال ۆاسيلەۆكا اۋىلىنىڭ شكولنايا اتتى كوشەسىن ساقۇلاق بي دەپ اتاۋ تۋرالى شەشىم دە جەرگىلىكتى تۇرعىنداردىڭ كوڭىلىنەن شىققان سياقتى. سول سياقتى ۇلان اۋىلىنداعى گۆاردەيسكايا كوشەسى قازاقتىڭ بەلدى ءۇش ءبيىنىڭ ءبىرى ايتەكە بي ەسىمىمەن اتالاتىن بولدى. وسى ەلدى مەكەندەگى تاعى ءبىر كوشە, ياعني ستەپنايا كوشەسى قاناي بي اتاۋىن السا, شكولنايا اتاۋى تولە بي بولىپ وزگەرتىلدى.
تاعى ءبىر ەلدى مەكەندەگى, ياعني مىسوك اۋىلىنداعى نابەرەجنايا كوشەسى قازىبەك بي بولىپ شىعا كەلدى. وسىلايشا بۇرىن ەشقانداي تاريحي ماڭىزى جوق كوشە اتاۋلارى قازاقتىڭ ءبىرتۋار بيلەرىنىڭ ەسىمىمەن اتالدى. قازاق مەملەكەتتىگىنىڭ نىعايۋىنا جانە قۇقىقتىق قوعام قالىپتاستىرۋداعى بيلەردىڭ ەرەڭ ەڭبەكتەرىن ۇرپاق جادىندا ماڭگى قالدىرۋ ماقساتىندا وزگەرتىلگەن كوشە اتاۋلارى وسكەلەڭ ۇرپاق تاربيەسىندە وزىندىك ۇلەس قوسارىنا ەشكىمنىڭ داۋى بولا قويماس. رەتى كەلگەندە ءبىر كەزدەرى كەڭەستىك ساياسات سالدارىنان تاريحي اتاۋىن جويعان ەلدى مەكەندەردىڭ ءوز اتاۋلارىن يەمدەنەتىن كۇن دە الىس ەمەس دەۋگە تولىق نەگىز بار.
اسقار تۇراپباي ۇلى,
«ەگەمەن قازاقستان»
اقمولا وبلىسى